Kryeson Arsenali, barazim pa vlerë
mes Manchester United e Chelsea

Arsenali pas 19 javësh merr kryesimin e kampionatit anglez të futbollit, të paktën për një natë, pasi neser do të luajë Leicester përballë Mancehster City ndeshjen e fundit të fazës së parë.

Arsenali fitoi ndeshjen përballë Bournemouth 2-0 lehtësisht. Petr Cech ka hyrë në histori, si portieri që ka mbajtur portën e paprekur për më shumë minuta në Premier League.

Çeku ka arritur numrin e 170 ndeshjeve pa pranuar gol në karrierën e tij në Premier League, duke lënë pas David James, që kishte mbajtur rrjetën e paprekur në 169 ndeshje.

Por vëmendja ishte përqendruar e gjitha në ndeshjen mes Manchster United dhe Chelsea, e cila u mbyll në barazim pa gola.

Të dyja skuadrat krijuan raste për shënim, United disa më shumë, teksa goditi shtyllën dhe traversën, por nuk arriti që të gjente rrjetën, që do të qetësonte edhe trajnerin Van Gal që është me një këmbë jashtë ‘Djajve të Kuq’, pasi fundi i fazës së parë ka qenë shumë negativ.

“Kur lojtarët japin kaq shumë me kaq shumë presion nuk ka arsye për të dhënë dorëheqje për mua. Ndoshta mediat dëshirojnë por unë nuk do të jap dorëheqje. Nuk është çështja te qëndrimi, por te përmbushja e kontratës”, tha Van Gal pas ndeshjes.

“Djajtë” e mbyllin fazën e parë në vendin e gjashtë, nëntë pikë larg Arsenalit kryesues. E ndërsa në ndeshjen e dy gjigantëve kishte raste pa fund, golat spaktakolarë erdhën nga shqiptari nga Kosova, që luan me përfaqësuesen zvicerane dhe Stoke City, Xherdan Shaqiri, i cili shënoi dy gola në fitoren ndaj Evertonit 3-4. Nga dy golat e shënuar, i pari ishte spektakolar duke u futur në kandidatët për golin më të mirë të edicionit. 


d.b/shqiptarja.com