28 hektarë sipërfaqe me sera në fshatin Salcë-Kozare në Njësinë Administrative Kozare, Kuçovë janë ende me prezencë uji, pas përmbytjes së ditëve më parë si pasojë e vërshimit të ujit pas hapjes së portave të hidrocentralit të Banjës. Përmbytjet kanë dëmtuar edhe rreth 60 ha tokë bujqësore e pemë frutore, ndërkohë që si pasojë e kësaj situate raportohet se në këtë zonë gjithashtu kanë ngordhur edhe disa kokë dele e kafshë shtëpiake.

Banorët pohojnë se uji në sera ka arritur në nivelin e 1 m, si asnjëherë më parë, teksa theksojnë se të gjitha të mbjellat ishin në fazën e prodhimit të tyre. Sipas fermerëve dëmet janë të pallogaritshme, në një kohë kur ekonomia e tyre familjare është e bazuar vetëm tek të ardhurat nga shitja e prodhimit të serave e tokave bujqësore-që edhe sot janë në ujë. Ata shprehen se prodhimi, që ishte në fazë vjelje është shkatërruar plotësisht, ndërkohë që apelojnë për ndihmë nga shteti, pasi në të kundërt do të shkojnë drejt falimentimit.

Fermerët shprehen se dhjetëra hektar toka me sera dhe kultura perimore kanë mbetur të përmbytura për periudha të zgjatura dhe kjo ka sjellë kalbje të rrënjëve dhe humbje të fidanëve. Sipas tyre-duhet filluar i gjithë cikli i prodhimit nga e para ,por kjo mund të kryhet vetëm pas 3-4 muajve deri në tharjen e plotë të tokës.Ata pohojnë se është kryer verifikimi i dëmeve.