Banka e Shqipërisë ende funksionon me vetëm një zëvendësguvernator, ndonëse është në kompetencë të Këshillit të saj Mbikëqyrës ta zgjedhë zëvendësguvernatorin e dytë ndër anëtarët e tij. Megjithatë, Elisabeta Gjoni vijon të jetë e vetmja në këtë funksion. BSH është kompletuar faktikisht me anëtarët e Këshillit Mbikëqyrës, por asaj vijon t’i mungojë drejtuesi i sektorit të rëndësishëm të kontrollit, mbetur bosh pas shkarkimit të Elivar Golemit. Emërimi i saj është kompetencë e Kuvendit të Shqipërisë.
Këshilltarët
Emrat e këshilltarëve dhe koordinatorit pranë guvernatorit të BSH nuk janë të panjohur për publikun. Miranda Ramaj është bashkëshorte e Agimit, vëllait të Liri Berishës dhe kunatit të ish-kryeministrit Sali Berisha. Ajo ka qenë gjatë gjithë kohës së qeverisjes së Berishës në krye të Bordit të Autoritetit të Mbikëqyrjes Financiare, një kohë edhe bashkë me Elisabeta Gjonin. Kjo e fundit njihet për lidhje të vjetra me familjen e Sali Berishës.
Me një këshilltare direkt në krushqi me Berishën dhe një zëvendësguvernatore me miqësi të vjetër me familjen e tij, e pakta që mund të supozohet është se ish-kryeministri do të ketë mundësi të njihet me problematikën e Bankës së Shqipërisë, e ndoshta do të ketë mundësi edhe të ndikojë në vendimmarrjen e drejtuesve të saj.
Për më tepër, kur, në shkelje të qartë të ligjit mbi BSH, në Këshillin Mbikëqyrës mbetet gjithnjë anëtar Petraq Milo, ish-këshilltar i Berishës, ndonëse është zgjedhur tashmë prej muajsh në organet drejtuese të Partisë Demokratike. Po kështu, edhe Dhori Kule, i njohur për kontributin e tij në veprimtarinë politike të PD-së.
Nga ana tjetër, në stafin e këshilltarëve janë shtuar Fatos Ibrahimi dhe Xhilda Konini. I pari ka qenë zëvendësguvernator dhe më pas drejtor i Departamentit të Kontabilitetit dhe Financës pranë Bankës së Shqipërisë deri në nëntor të vitit 2013, kur është larguar nga ky post prej Ardian Fullanit. Kanini ka qenë drejtore e Departamentit të Teknologjisë së Informacionit pranë Bankës së Shqipërisë, gjithashtu shkarkuar në të njejtën kohë nga ish-guvernatori.
Edhe Gramos Kolasi është larguar më parë nga drejtimi i Departamentit të Politikave Monetare.
Ndërkohë që është treguar i shpejtë në emërimin e stafit pranë tij, guvernatori Sejko ende po toleron faktin që departamentet e BSH të drejtohen ende nga shtatë drejtorë “të komanduar”.
Shkrimi u botua në Shqiptarja.com (print) në 26 Mars 2015
Redaksia Online
(d.a/shqiptarja.com)