Policia e Shtetit ka sqaruar të gjithë drejtuesit në lidhje me akreditimin e  mjeteve të tyre dhe se kush lejohet të qarkullojë. Policia shprehet se  pronarët e bizneseve prodhuese dhe ato që ofrojnë shërbime nuk duhet të dërgojnë email apo të telefonojnë në numrat në dispozicion por duhet të regjistrohen direk në sektorin e policisë rrugore ku banojnë apo ku kanë aktivitetin. Vetëm ato biznese që e shtrijnë aktivitetin edhe jashtë qarkut Tiranë duhet të aplikojnë për akreditimin në adresën e email-it dhe numrat e vendosura në dispozicion.

“Nisur nga fluksi i madh i telefonatave të qytetarëve drejt numrave të dedikuar 069 41 22223 dhe 069 41 22224, si dhe nga email-et shumta të ardhura në adresën e dedikuar: [email protected], për akreditim apo informacione të ndryshme në lidhje me masat kufizuese për mospërhapjen e COVID-19, sqarojmë gjithë qytetarët se: Të gjithë pronarët e bizneseve prodhuese apo ata që ofrojnë shërbime për qytetarët, të cilët duan të akreditojnë automjetet për lëvizje personeli apo mallra brenda qarkut, të mos dërgojnë email në adresën [email protected] dhe as të mos telefonojnë në dy numrat e dedikuar, por t’i drejtohen Sektorit të Policisë Rrugore të qarkut ku kanë vendbanimin dhe ushtrojnë aktivitetin e tyre.

Ndërsa ata pronarë apo administratorë që kanë aktivitet/biznes edhe jashtë qarkut, si dhe ata që banojnë në qarkun Tiranë, të vazhdojnë të bëjnë kërkesa për akreditim nëpërmjet email-it [email protected] dhe dy numrave të dedikuar”, sqaron Policia.

Policia sqaron gjithashtu se oraret e lëvizjes së automjeteve është vetëm për ato të akredituara dhe me leje të posaçme dhe jo për qytetarët e thjeshtë, të cilët mund të dënohem me 3 vjet heqke të patentës. Në lidhje me automjetet e firmave prodhuese dhe furnizuese, ato mund të lëvizin në çdo moment. Ndërsa për urgjencat mjekësor, qytetarët duhet të telefonojnë në 129 apo 112 që të parashtrojnë problemin që kërkojnë lëvizje.

“Orari i lëvizjes 06:00 deri 08:00 dhe në pasdite 16:00 deri në 17:00 nuk është për lëvizjen e lirë të qytetarëve, por për  personelin/ punonjësit e ndërmarrjeve  prodhuese, të cilët do lejohen të kenë aktivitet, sipas konfirmimeve të bëra nga Policia e Shtetit, si dhe për punonjësit e institucioneve shtetërore të pajisur me dokument identifikimi të institucionit.  Në këto orare nuk do lejohet lëvizja e lirë e qytetarëve me automjete private. Punonjësit e Policisë së Shtetit, ata të Policisë së Burgjeve, të SHPSF-ve, personeli shëndetësor dhe gazetarët lejohen të qarkullojnë në oraret e ndërrimit të turneve, duke patur me vete dokumentim e lëshuar nga institucioni ku punojnë. Automjetet e firmave prodhuese dhe furnizuese, kadet, furgonçinat, kamionçinat dhe kamionët lejohen të lëvizin në çdo moment, por duke argumentuar lëvizjen me faturat e shpërndarjes së mallit apo të furnizimit me mall. Për urgjenca mjekësore, personat të telefonojnë në numrin 129/112 dhe në dy numrat e dedikuar, duke bërë prezent problemin për lëvizjen që kërkojnë.

Policia e Shtetit apelon për të gjithë drejtuesit e automjeteve që nuk janë të përfshirë në listën që u lejohet të qarkullojnë, të respektojnë me rigorozitet kufizimet dhe të mos dalin në qarkullim, pasi dalja i penalizon me 3 vjet të heqjes së Lejes së Drejtimit”, shkruan policia.