Që Dua Lipa është një nga yjet më të dashura të muzikës pop në botë, kjo dihet prej kohësh. Sipas listës The Sunday Times Rich List 2026, pasuria e saj arrin në 150 milionë paund, nga 115 milionë që ishte një vit më parë. Por jo të gjithë e dinë se ajo është edhe një lexuese e pasionuar.

Këngëtarja ka themeluar Service95, një platformë që ajo vetë e përshkruan si një “shërbim kulturor concierge”, ku përfshihen një faqe interneti, një buletin informativ, një klub libri dhe një podcast. Pikërisht falë një libri ajo njohu bashkëshortin e saj aktual, Callum Turner, me të cilin festoi “dasmën e vitit” në Sicili, mes rreth 200 të ftuarve, ku morën pjesë emra të njohur si Elton John, Donatella Versace, Charli XCX dhe figura të tjera të njohura të jet-setit ndërkombëtar.

E lindur në vitin 1995 në Londër nga prindër shqiptarë të Kosovës, Dua Lipa konsiderohet mishërim i gruas moderne dhe qytetares së botës. Turneu i saj Radical Optimism Tour e ka çuar në katër anët e globit, me 81 koncerte në Azi, Amerikën e Veriut dhe të Jugut, Evropë dhe Oqeani, nga nëntori 2024 deri në dhjetor 2025.

“Të gjithë më thonë se jam gjithmonë me pushime, por nuk është e vërtetë. Thjesht përpiqem të jetoj sa më mirë kohën mes një koncerti dhe tjetrit, ndaj provoj restorante dhe vizitoj vende të ndryshme”, ka thënë ajo me humor.

Turneu i fundit ka qenë më fitimprurësi i karrierës së saj, me 141.1 milionë dollarë të ardhura vetëm nga 59 koncertet e para, sipas Billboard. Emrin e ka marrë nga albumi i saj i tretë në studio, Radical Optimism, i cili në vitin 2024 debutoi në vendin e parë të klasifikimeve britanike. Më parë ajo kishte publikuar albumet Future Nostalgia (2020) dhe Dua Lipa (2017).

Përveç suksesit komercial, Dua Lipa ka fituar tre çmime Grammy Awards nga 10 nominime dhe shtatë çmime Brit Awards.

Dashuria për kulturën dhe librat

Artistja është vlerësuar edhe për angazhimin e saj kulturor. Gazeta The Guardian ka pyetur madje nëse ka ardhur koha që ajo të kurorëzohet si “intervistuesja më e mirë në fushën e letërsisë”, falë bisedave të saj me figura si Patti Smith, Tim Cook, Pedro Almodóvar dhe Margaret Atwood.

Ajo mbajti gjithashtu fjalimin hapës në ceremoninë e ndarjes së çmimeve Booker Prize 2022 dhe së fundmi u emërua kuratore e edicionit të këtij viti të London Literature Festival.

Ikonë e modës

Dua Lipa është kthyer edhe në një ikonë mode. Ajo ka bashkëpunuar me marka prestigjioze si Saint Laurent dhe Chanel. Së bashku me mikeshën e saj Donatella Versace, ajo bashkëprojektoi koleksionin La Vacanza, i prezantuar gjatë Festivalit të Kanës 2023.

Për ceremoninë civile të martesës në Londër, në Old Marylebone Town Hall, ajo veshi një kostum të bardhë të krijuar posaçërisht nga Schiaparelli, frymëzuar nga pamja legjendare e Bianca Jagger në martesën me Mick Jagger.

Për festimet në Sicili zgjodhi një fustan sirenë të personalizuar nga Bottega Veneta, duke konfirmuar reputacionin e saj si një prej figurave më me ndikim në botën e modës.

Familja dhe lidhja me rrënjët shqiptare

Dua Lipa lindi dhe u rrit në Londër. Babai i saj, Dukagjin Lipa, ishte këngëtar dhe kitarist i grupit rock Oda.

Familja u largua nga Prishtina në vitin 1992 për shkak të luftërave në Ballkan dhe nisi jetën nga e para në Mbretërinë e Bashkuar. Edhe pse hoqi dorë nga karriera muzikore, Dukagjini vazhdoi të luante muzikë në shtëpi, duke ndikuar që Dua të fillonte të këndonte që në moshën pesëvjeçare.

Ajo ka edhe dy motër e vëlla më të vegjël, Rina dhe Gjin. Familja u kthye në Prishtinë në vitin 2008, pas shpalljes së pavarësisë së Kosovës, por në moshën 15-vjeçare Dua u rikthye në Londër për të ndjekur ëndrrën e saj muzikore.

Kontrata e parë profesionale u nënshkrua në vitin 2013, ndërsa dy vjet më vonë publikoi këngën New Love. Më pas erdhën sukseset ndërkombëtare që e ngjitën në majat e muzikës botërore.

Lidhja me të atin mbetet shumë e fortë. Së bashku ata organizojnë Sunny Hill Festival, festivalin më të madh muzikor në Kosovë.

Më 27 nëntor 2022, Dua Lipa mori shtetësinë shqiptare nga Bajram Begaj, ndërsa më 31 korrik 2025 iu dha edhe shtetësia e Kosovës. Këngëtarja, e cila flet rrjedhshëm shqip, ka deklaruar shpesh se identiteti i saj i dyfishtë është një nga pikat e saj më të forta.

Dashuria me Callum Turner

Dua Lipa dhe Callum Turner u martuan fillimisht në Londër më 31 maj, në një ceremoni të vogël familjare, përpara se të organizonin festën madhështore në Bagheria të Sicilisë.

Historia e tyre e dashurisë nisi në vitin 2024 në Los Anxhelos. Të ulur pranë njëri-tjetrit në një takim mes miqsh, zbuluan se po lexonin të njëjtin roman, Trust të Hernan Diaz, madje kishin arritur pothuajse në të njëjtën faqe.

“Pra, jemi në të njëjtën faqe”, i tha Turner, duke përdorur shprehjen angleze që do të thotë se dy persona janë në harmoni të plotë. Që nga ai moment, historia e tyre vazhdoi mes udhëtimeve romantike, paraqitjeve publike dhe fotografive që pushtuan rrjetet sociale.

Para Turner, Dua Lipa ka pasur lidhje të njohura me modelin dhe kuzhinierin britanik Isaac Carew, modelin Anwar Hadid, vëllain e Gigi Hadid dhe Bella Hadid, si dhe me regjisorin francez Romain Gavras.

Sot, me martesën e saj me Callum Turner, ylli me origjinë shqiptare vazhdon të jetë një nga figurat më të suksesshme dhe më me ndikim të skenës ndërkombëtare./ Corriere della Sera