Vila Valguarnera ishte e blinduar nga masat e sigurisë. Diskrecion maksimal nga ana e personelit të sigurisë, policëve dhe punonjësve që takuam teksa mbërrinin që në orët e para të mëngjesit. Festa e dasmës së Dua Lipa dhe Callum Turner në Bagheria u shoqërua nga një atmosferë misterioze.

Kur do të fillonte ceremonia? Në çfarë ore do të mbërrinin të ftuarit? Festimet nisën në orën 17:00, ndërsa të ftuarit e parë mbërritën një orë më herët. Sipas zërave që qarkullonin, ata kishin pasur në dispozicion grimerë dhe parukierë direkt në vilë.

Përpara darkës, e organizuar në sallat e rezidencës dhe e përgatitur edhe nga shefa kuzhine të Bagherias, Dua Lipa dhe Callum Turner i thanë sërish “po” njëri-tjetrit përpara rreth 200 të ftuarve. Në karriget e vendosura në lëndinë, të zbukuruara me fjongo të bardha, ishte vendosur një qeskë me inicialet e çiftit të ndara nga një zemër, si edhe një shami me mbishkrimin: “Mbetu i çmendur pas meje përgjithmonë.”

Për të ftuarit ishte vendosur gjithashtu një kënd fotografik (photo booth), ku ata mund të realizonin fotografi kujtimi për t’i marrë me vete. Tenda ishte dekoruar me emrat e dy të sapomartuarve. Në fund të banketit, festa vazhdoi në ambientet e jashtme me një set muzikor nga DJ, i pajisur me një sistem të sofistikuar audio që parandalonte përhapjen e zhurmës jashtë vilës.

Kur do të përfundonin festimet? “Ne e mbyllim turnin në orën 06:00 të mëngjesit”, thanë punonjësit e sigurisë. Zona përreth perlës së shekullit XVIII ishte mbyllur për publikun që prej orës 14:00. Hyrja lejohej vetëm për klientët e pak aktiviteteve që qëndronin hapur (dy parukeri, një dyqan veshjesh dhe një dyqan artikujsh shtëpiakë) si dhe për banorët e zonës. Kryetari i bashkisë konfirmoi se nuk ishte vendosur asnjë zonë ndalim-fluturimi (no fly zone), por organizatorët kishin garantuar mbrojtjen e zonës nga dronët.

Po të ftuarit? Pas ditësh spekulimesh, u konfirmua prania e Elton John, i cili interpretoi në piano dhe këndoi këngën e famshme Your Song për çiftin. Të pranishëm ishin gjithashtu Donatella Versace, këngëtarja Charli XCX me bashkëshortin e saj George Daniel, DJ-ja Mark Ronson me bashkëshorten Grace Gummer, vajza e Meryl Streep, si dhe aktori Joe Alwyn, ish-partneri i Taylor Swift.

Emri i Madonna qarkulloi vazhdimisht si e ftuar e mundshme, por dy burime të brendshme pohuan se ajo nuk ishte e pranishme. “Përmenden shumë emra që në fund nuk vijnë fare, por nuk mund t’ju them më shumë”, shpjeguan burimet.

Gjatë gjithë ditës pati një lëvizje të pandërprerë furgonësh, autobotësh dhe minibusësh. Sipas disa banorëve të Bagherias që jetojnë pranë vilës, Dua Lipa kishte mbërritur në Villa Valguarnera shumë përpara se të vinin të ftuarit e parë.

Rreth orës 17:30 pothuajse të gjithë të ftuarit kishin mbërritur. “Ndoshta mungon vetëm një ose dy makina”, thanë banorët. Rreth orës 18:15 mbërritën edhe furgonët e fundit – të paktën katër – të shoqëruar nga policia.

Nuk munguan as episodet kurioze. Një shofer doli me vrap nga një lokal pranë zonës së rrethuar pas një telefonate të shpejtë. “Mamaja e Dua Lipës ka harruar këpucët në makinë, duhet të shkoj”, i tha ai baristes teksa largohej me nxitim.

Siç kishte konfirmuar për Corriere kryebashkiaku i qytetit, qindra të rinj të zonës u përfshinë në organizimin e dasmës, si kamerierë, staf salle, punonjës sigurie dhe kuzhinierë për përgatitjen e menusë. Punonjësve iu kërkua të linin telefonat celularë në hyrje, në një tendë të ngritur posaçërisht për këtë qëllim. Një masë e ngjashme ishte zbatuar edhe të premten gjatë festës së parë të çiftit në qendrën historike të Palermos.

Ashtu si të premten, edhe dje nuk munguan polemikat, të cilat u minimizuan nga kryetari i Bashkisë së Bagherias, Filippo Maria Tripoli. Fillimisht pati ankesa nga disa tregtarë lokalë për uljen e numrit të klientëve si pasojë e bllokimeve të zonës. Më pas erdhi reagimi ndaj një titulli të gazetës britanike The Telegraph, e cila e përshkruante Bagherian si “strehë të mafias”, gjë që e shtyu presidentin e Rajonit të Sicilisë, Renato Schifani, t’u kërkonte dy të sapomartuarve të distancoheshin nga ky përshkrim.

“E kuptoj pakënaqësinë për mbylljet, por nuk kishte alternativë. Ato ishin pjesë e një plani sigurie të kërkuar nga policia”, deklaroi Tripoli për Corriere. Sa i përket titullit të Telegraph, ai shtoi: “Ata që protestojnë janë ndalur vetëm te titulli, i cili më pas u ndryshua. Artikulli thotë diçka krejt tjetër. Për mua këto polemika janë absurde. Do të doja të kishim 100 dasma si ajo e Dua Lipës çdo vit. Një ngjarje e tillë duhet të na bëjë të kuptojmë se mund të bëjmë edhe më shumë.”/ Corriere della Serra