Është shoqëruar sërish me tensione edhe seanca e sotme plenare, e cila është mbyllur me përjashtimin e Flamur Nokës nga senaca. Ka qenë deputeti i Partisë Demokratike, Flamur Noka, që ka kërkuar të marrë fjalën menjëherë sapo është larguar nga foltorja e Kuvendit ish-kryeministri Sali Berisha. Noka ka ndërhyrë nga salla, duke kërkuar të marrë fjalën për procedurë, ndërsa është ndërprerë nga Gramoz Ruçi, i cili i ka kaluar fjalën deputetit të LSI, Shezai Rrokaj. 

Shkak për situatën e tensionuar, që solli dhe përjashtimin e deputetit Noka, është bërë pretendimi i deputetëve të Partisë Demokratike, sipas të cilëve kryeministri Edi Rama ka fyer ish-kryeministrin Sali Berisha jashtë mikrofonit, duke e quajtur ‘të rrjedhur’.

Deputeti demokrat është nisur drejt foltores së Kuvendit për të marrë fjalën, duke përdorur dhe fjalë fyese ndaj Ruçit, teksa e ka quajtur këtë të fudnit "rrugaç". Drejt foltores janë drejtuar dhe deputetë të tjerë, ndërsa kreu i Kuvendit ka marrë masën disiplinore ndaj Nokës, pas disa paralajmërimeve, duke e përjashtuar atë nga punimet e Kuvendit për dhjetë ditë. Noka nuk është larguar nga salla, duke detyruar Ruçin të ndërpresë seancën dhe rinisjen e saj në orën 17:00.

Ndërkohë, një situatë e tillë është krijuar dhe një javë më parë, ku ishte kreu i PD, Lulzim Basha, që u përjashtua nga Kuvendi për shkak se bllokoi foltoren, por u fal nga kryeparlamentari, për faktin se është deputet i ri.

opozita bllokon foltoren

debate kuvend opozita

Redaksia Online
D.Ç./Shqiptarja.com