Kuvendi rrëzon dekretet/ Meta: SPAK të nisë hetimet! Deputetët kanë qëllime klienteliste, po minohet integrimi në BE

TIRANË- Pas kthimit të tre dekreteve nga Komisioni për Ekonominë dhe Financat, Presidenti Ilir Meta ka ashpërsuar tonet ndaj Kuvendit. Kreu i Shtetit i ka bërë thirrje SPAK që të nisin hetimet për 3 projektligjet e propozuar që bëhet fjalë për heqjen e TVSH së jahteve, të koncesionin në Porto-Romano, Durrës dhe 'Për shërbimet e pagesave'.

Sipas Metës, këta deputetë me anë të këtyre ligjeve duan të përmbushin qëllimet e tyre favorizuese klienteliste. Meta shprehet se një veprim i tillë, pra kthimi i dekreteve të tij është bërë e përsëritur dhe në shkelje flagrante me ligjin, teksa e quan si një “korrupsion legjislativ”.

"Është akti më i rëndë i shpërdorimit të pushtetit publik", shprehet mes të tjera Meta, duke thënë se këto interesa klienteliste, siç ai i quan, ndikojnë negativisht në integrimin e vendit në Bashkimin Europian. Më herët, ai nuk i ka kursyer kritikat për deputetët në Kuvendin e Shqipërisë për një cilësi të dobët në procesit të ligjbërjes nga ana e tyre. 

LEXO EDHE:
Spahiu: Komike, Erion Veliaj pyetet për 4 bileta në 2011, Berisha nuk pyetet as për 4 të vrarë në 2011 gjithashtu

Presidenti Meta nuk ka dekretuar ligjin për heqjen e TVSH për jahtet duke argumentuar se nuk është në harmoni me nevojat emergjente. Ka kthyer në kuvend ligjin për portin e ri të hidrokarbureve në Porto Romano duke argumentuar se cenohet gara e lirë që duhet ndjekur një procedurë koncesioni. Meta gjithashtu nuk ka dekretuar ligjin “Për shërbimet e pagesave” për të cilin thotë se është i paqartë e nuk saktëson kushtet për licencimin e institucioneve të pagesave. Të tre këto dekrete të Presidentit janë rrëzuar nga Komisioni parlamentar i Ekonomisë dhe Financave.

Argumentet e plota të presidentti Ilir Meta
"I bëjmë thirrje Prokurorisë së Posaçme Antikorrupsion (Ë) të nisë hetimet për të gjitha procedurat e propozimit dhe shqyrtimit të këtyre ligjeve për të vënë përpara përgjegjësisë autorët, të cilët përmes ligjit duan të përmbushin qëllimet e tyre favorizuese klienteliste. Komisioni për Ekonominë dhe Financat, ditën e djeshme dhe të sotme, në datat 16 dhe 17 Qershor 2020, ka shqyrtuar dhe ka vendosur rrëzimin e tre Dekrete të Presidentit të Republikës Sh.T.Z Ilir Meta:

Dekretin e Presidentit të Republikës nr. 11486, datë 22.05.2020 “Për kthimin e ligjit nr. 58/2020 “Për miratimin e shtesës së kontratës së koncesionit të formës ‘BOT’ (ndërtim, shfrytëzim dhe transferim) të një porti të llojit MBM në Porto-Romano, Durrës, miratuar me ligjin nr. 104/2015, ndërmjet Ministrisë së Infrastrukturës dhe Energjisë dhe shoqërisë koncesionare ‘Porti MBM (Multy Buoy Mooring)’, të ndryshuar” Dekretin e Presidentit të Republikës nr. 11493, datë 1.06.2020 “Për kthimin e ligjit nr. 55/2020 “Për shërbimet e pagesave”. Dekretin e Presidentit të Republikës nr. 11504, datë 08.06.2020 “Për kthimin e ligjit nr. 64/2020 “Për  një shtesë në ligjin nr. 92/2014, ‘Për tatimin mbi vlerën  e shtuar në Republikën e Shqipërisë’, të ndryshuar” (përjashtimi nga TVSH i mjeteve lundruese të luksit dhe i jahteve);

Komisioni për Ekonominë dhe Financat nuk ka njoftuar Institucionin e Presidentit të Republikës për të qënë prezent në shqyrtimin e Dekreteve, përmes përfaqësuesve të Tij. Ky veprim i Komisionit të Ekonomisë dhe Financave është i përsëritur, sidomos kur shqyrtohen Dekrete për kthimin e ligjeve që denoncojnë antikushtetutshmërinë e tyre, cenimin e interesit publik e kombëtar, si dhe cenimin e  financave të shtetit me ligje speciale me efekt favorizues për një grup të caktuar individësh. Ky veprim i Komisionit të Ekonomisë dhe Financave është i papranueshëm dhe në kundërshtim me parimet kushtetuese të transparencës në procesin legjislativ. Qëllimisht, kur shqyrtohen Dekretet e Presidentit të Republikës, ftohen për të qënë të pranishëm vetëm përfaqësues të Qeverisë, që bëjnë reklamimin e rradhës së ligjit, duke fshehur të metat e rënda që paraqesin këto akte të reja ligjore.

Këto veprime kanë për synim keqinformimin e publikut, fshehjen e antikushtetutshmërisë së këtyre ligjeve, cenimin e interesit publik, si dhe fshehjen e kostove që do të prodhojnë këto ligje, kosto që do të duhet t`i paguajnë të gjithë qytetarët shqiptarë në të ardhmen. Procesi ligjbërës po shpërdorohet haptazi, në mënyrën më flagrante të mundshme, ku tashmë nuk po shkelet ligji për të kryer favore, por po bëhen ligje të posaçme për t`i realizuar ato.

Në gjuhën juridike, kjo do të thotë “korrupsion legjislativ”, që është akti më i rëndë i shpërdorimit të pushtetit publik. Arsyetimet e kthimit të ligjeve me Dekret nga Presidenti i Repulikës janë publike, dhe ftohen gjithë qytetarët t`i lexojnë, ashtu siç ftohen dhe të gjithë deputetët para seancës plenare, të njihen me to për të kuptuar në emër të cilave subjekte do të shkojnë votat e tyre “Pro”: për zhdoganime jahtesh e mjetesh lundruese luksi, apo dhënie licencash për aktivitete në fushën e shërbimeve të pagesave.

Ligji nuk mund të bëhet për një individ, as për dy. Ligji i adresohet gjithë shoqërisë dhe të gjithë duhet të jenë të barabartë përpara tij. Nëse ligji përdoret për të krijuar ombrellë mbrojtëse nga përgjegjësia penale e vendimmarrjeve në fusha sensitive, atëherë Kuvendi nuk po kujdeset më për të mirën publike, por për interesa të një grupi njerëzish të lidhur drejtpërdrejt me shumicën parlamentare. Procesi ligjbërës dhe interesat klienteliste nuk mund të fusin në qorrsokak procesin e integrimit europian. I bëjmë thirrje Prokurorisë së Posaçme Antikorrupsion (Ë) të nisë hetimet për të gjitha procedurat e propozimit dhe shqyrtimit të këtyre ligjeve për të vënë përpara përgjegjësisë autorët, të cilët përmes ligjit duan të përmbushin qëllimet e tyre favorizuese klienteliste".

TAG:
• Ilir Meta
• spak
• Kuvendi i Shqiperise

Sondazhi i ditës:

Si ka qenë për ju viti 2024?

• I mirë

  44%

• I keq

  22.8%

• As i mirë as i keq

  33.2%

Vota total: 1494

Votat totale janë unike

• Sondazhi i ditës:

  Si ka qenë për ju viti 2024?

  I mirë I keq As i mirë as i keq