Kryetari i partisë së Lirisë, Ilir Meta ka akuzuar kryeministrin, Edi Rama si shkaktarin kryesor tyë largimit të të rinjve nga vendi drejt Britanisë së Madhe dhe vendeve të tjera të Europës.

Në një postim në rrjetin social facebook, Meta shkruan se nuk ikja e të rinjve shqiptarë, nuk ishte faji i Britanisë së Madhe por e vetë kryeministrit Rama.

 

“Shqipëria renditet e para në botë për aplikimet për azil në raport me popullsinë, duke lënë pas edhe Sirinë. Në Shqipëri, për çdo 1000 banorë kanë aplikuar për azil gati 5 banorë; 2.4 në vendet e Bashkimit Europian dhe 2.6 në Mbretërinë e Bashkuar. Pse të rinjtë shqiptarë ikin nga Shqipëria si nga asnjë vend tjetër i rajonit nuk është faji i Britanisë së Madhe, siç vjell vrer pa fre Rama. Është qeverisja e korruptuar 10 vjeçare e Ramës që ka detyruar rininë shqiptare t'u hipi gomoneve të shpresës. Përgjegjësia e shpopullimit të Shqipërisë është e Ramës, ndaj largimi i tij është domosdoshmëri për shpëtimin e vendit!”- shkruan Meta në postimin e tij.

Ndërkohë kryeministri, Edi Rama në deklaratat e bëra së fundmi edhe në samitin e Berlinit, ka kritikuar Britaninë e Madhe, duke thënë se në vend që të konsideronte fluksin e emigracionit si “pushtim” nga shqiptarët, duhej të bashkëpunonte për të gjetur një zgjidhje.