Ministri i Jashtëm rus, Sergei Lavrov thotë se ka ende shumë punë për të bërë përpara se të arrihet një marrëveshje paqeje midis Moskës dhe Kievit, sipas agjencisë shtetërore ruse të lajmeve RIA.

Lavrov shtoi se nuk ka arsye për të pasur një perceptim entuziast të situatës.

Një ditë më parë, kryediplomati rus akuzoi administratën e Donald Trump se nuk po i zbaton marrëveshjet midis Vladimir Putin dhe presidentit të SHBA-së në Alaska.

Sipas tij, SHBA-të ishin tërhequr nga ato që ai i quajti “Marrëveshjet e Ankorimit” midis Trump dhe Putin gjatë takimit të tyre në gusht të vitit të kaluar.

Lavrov u shpreh se SHBA-të i kishin thënë Rusisë se mund ta bindnin Ukrainën të hiqte dorë nga i gjithë rajoni i Donbasit në mënyrë që t’i jepte fund luftimeve, diçka që Kievi e kishte përjashtuar më parë.

“Ata na thonë se çështja ukrainase duhet të zgjidhet. Në Anchorage, ne e pranuam propozimin e SHBA-së. Ata bënë një ofertë, ne ramë dakord dhe problemi duhej të ishte zgjidhur. Duket se ata e propozuan dhe ne ishim gati - dhe tani ata nuk janë më", tha Lavrov dje.

Rusia e ka Donbasin një prioritet strategjik, një pikë që e ka theksuar vazhdimisht në bisedimet e vazhdueshme të paqes të ndërmjetësuara nga Shtetet e Bashkuara.

Gjatë gjithë dimrit, Rusia ka shënjestruar banesat e civilëve në të gjithë Ukrainën, si dhe rrjetin energjetik dhe objektet e ngrohjes së vendit.

Javën e kaluar, Kievi dhe Moska përmbyllën dy ditë bisedimesh të ndërmjetësuara nga SHBA-ja në Abu Dabi. Megjithatë, nuk pati përparime të mëdha, një tjetër sinjal se sa të vështira janë përpjekjet për t’i dhënë fund luftës gati katërvjeçare.

Rendit zhvillimet sipas orarit:
Ora 09:17
Franca nënshkruan marrëveshjen me Ukrainën, do të nisë prodhimi i armëve me Kievin

1770711521_luftaneukraine.avif

Foto: Një pikë karburanti në Ukrainë i shkatërruar nga sulmet ruse

Ukraina dhe Franca kanë arritur një marrëveshje për të nisur prodhimin e përbashkët të armëve, njoftoi të hënën ministri ukrainas i Mbrojtjes pas një takimi me homologen e tij franceze në Kiev.

Ministri ukrainas Mykhailo Fedorov bëri të ditur se të dy vendet kanë nënshkruar një marrëveshje, e cila hap rrugën për “projekte të përbashkëta në shkallë të gjerë në sektorin e industrisë së mbrojtjes”. Ai nuk dha detaje mbi llojet e armëve që do të prodhohen apo afatin e nisjes së prodhimit.

“Ne po kalojmë nga furnizimet drejt prodhimit të përbashkët dhe zgjidhjeve afatgjata që forcojnë në mënyrë sistematike mbrojtjen tonë”, shkroi Fedorov në rrjetin Telegram, pas takimit me ministren franceze të Forcave të Armatosura, Catherine Vautrin.

Palët diskutuan gjithashtu për dërgesa të reja të armëve dhe pajisjeve ushtarake franceze drejt Ukrainës. Në fokus ishin raketat Aster, avionët luftarakë Mirage 2000 dhe sistemet e mbrojtjes ajrore SAMP-T.

Ndërkohë, presidenti ukrainas Volodymyr Zelenskyy njoftoi se Ukraina planifikon të hapë eksportet e armëve të prodhuara në vend, si pjesë e një strategjie për të shfrytëzuar përparimet teknologjike të arritura gjatë luftës dhe për të siguruar burime të reja financiare.

“Siguria e Evropës është ndërtuar mbi teknologjinë dhe dronët. E gjithë kjo do të bazohet kryesisht në teknologjinë ukrainase dhe specialistët ukrainas", tha Zelensky.

Xh.K/Shqiptarja.com