“The Economist”: Demokraci hibride
Shqipëria, dyshime për zgjedhjet

TIRANE - Shqipëria është një “regjim hibrid” sa i përket nivelit të demokracisë në vend dhe nga shtetet europiane le pas vetëm Bosnje-Hercegovinën. Ky është konkluzioni i analizës për demokracinë nëpër botë, reflektim i situatës në fund të vitit 2012, që bën prestigjozja britanike “The Economist”, përmes grupit të saj të “inteligjencës financiare”, “The Economist Intelligence Unit”.

Ky indeks është një ndër dokumentet më serioze që mat dhe skedon “barometrin” demokratik kudo në botë dhe tregon shkallën e demoracisë për vitin 2012 në 200 vende të botës, ku Shqipëria renditet në vendin e 90.

Për vendet që kanë demokraci të plotë, indeksi i demokracisë llogaritet në shifrën 10. Sipas klasifikimit sektorial, në Shqipëri me 5.67 pikë vlerësohet procesi elektoral, pluralizmi politik me 7 pikë, funksionimi i qeverisë 4, pjesëmarrja politike 5, kultura politike 5 dhe të drejtat civile 7.35 pikë. Raporti vlerëson se, nga 28 vende të Evropës Lindore, 1 vend është me demokraci të plotë, 14 vende me demokraci të dobët, 6 vende me regjim hibrid dhe 7 vende me regjim autoritar.

Në grup me Shqipërinë me klasifikimin "demokraci hibride" janë në botë vende si Siri Lanka, Hondurasi, Bangladeshi, Nikaragua dhe Uganda.

Në këtë listë Shqipëria mbetet pas shumë shteteve të Amerikës Latine, Azisë dhe Afrikës. Shtete si Hong-Kongu, Malavia, Timori Lindor dhe Senegali janë përmirësuar më shumë, duke mundur të klasifikohen këtë vit një kategori më lart se Shqipëria, si vende me “demokraci me të meta”.

KATEGORIZIMI

“The Economist” shpjegon se regjimet hibride janë ato, që kanë probleme të mprehta me parregullsi zgjedhore, që shpesh nuk i lejojnë zgjedhjet të jenë të lira e të ndershme. Presioni qeveritar mbi partitë e opozitës dhe kandidatët në to është shumë i përhapur si fenomen. Dobësi serioze këtu ka në drejtim të kulturës politike, funksionimit të Ekzekutivit dhe pjesëmarrjes politike.

Korrupsioni është shumë i përhapur dhe sundimi i ligjit konsiderohet i dobët. E tillë është edhe shoqëria civile. Tipike e këtyre regjimeve është trysnia mbi mediat dhe fakti që Gjyqësori nuk është i pavarur.

NDRYSHIMI

Krahasuar me vitin 2011, Shqipëria ka bërë hapa prapa. Gjatë këtij viti indeksi i demokracisë ka qënë 5.81, ndërsa gjatë 2012 indeksi është 5.51. Sa i përket lirisë së medias, indeksi ka kaluar në 5.67, ndërsa në vitin 2011 ku indeks ka qenë 5.81.

Shkrimi u botua sot në Gazetën Shqiptarja.com (print) 18.04.2013

Redaksia Online
(b.m/shqiptarja.com)