Levan-Tepelenë, Berisha
përuroi rrugën që e vonoi 7 vjet

Kryeministri Sali Berisha ka përuruar dje gjysmën e rrugës nga Levani në Tepelenë, duke vijuar një ritual të ri, të prerjes së shiritave disa herë për një vepër, që e ka vendosur kohët e fundit.  Ai preu dje shiritin për një segment prej 38 km të rrugës së re që lidh Levanin me Tepelenën, duke akuzuar opozitën se është përpjekur ta sabotojë këtë vepër. “Nuk votuan në parlament shtesën që u kërkua për ndërtimin e kësaj rruge. Nuk votuan, sepse donin me çdo kusht të bllokonin përfundimin e tyre para zgjedhjeve. Kishin problemin që të mos i inauguronim para zgjedhjeve, por ne do të përurojmë rrugë në të katër anët e vendit. Jo bllokimi, por zhvillimi është ajo që kanë nevojë fëmijët tuaj, ju dhe brezat që do të vijnë. Ne do të shfrytëzojmë gjithçka për të zhvilluar Shqipërinë", deklaroi para banorëve Berisha.

Në fakt, marrëveshjen e Shqipërisë me donatorët për këtë vepër qeveria e PD e ka gjetur të gatshme, pasi financimi ishte nënshkruar që më 2 qershor të vitit 2005, para se të vinte Berisha në pushtet. Në emër të qeverisë shqiptare, marrëvëshjen e ka nënshkruar atëherë ministri i Financave, Arben Malaj. Sipas projektit të zbatimit, vlera e punimeve të ndërtimit parashikohej të ishte rreth 70 milionë euro. Bashkëfinancues të tij janë BERZH, me një kredi prej 35 milionë eurosh, BEI me një kredi prej 35 milionë eurosh, Komuniteti Evropian, me një grant prej 2.7 milionë eurosh dhe qeveria shqiptare, që do të përballonte shpenzimet për shpronësimet dhe TVSH-në.

SFIDA
Qeveria Berisha kishte ndërmarrë një sfidë të vërtetë ndaj ndërkombëtarëve, me deklaratat e bëra pasi erdhi në pushtet, lidhur me ndryshimin e gjurmës së rrugës. Në një seancë të posaçme interpelance në Kuvend, në vitin 2006, Berisha tha se kabineti i tij qeveritar do të rishikonte, ashtu si shumë projekte të tjera, dhe atë të kësaj rruge. Skema që paraqiti ai ishte Memaliaj-Berat-Cërrik-Papër e më pas Tiranë.
Kreu i grupit parlamentar socialist Gramoz Ruçi deklaronte me atë rast se "është për të ardhur keq që një kryeministër si ty, duke abuzuar me pushtetin, do që të përmbysë çdo gjë. Ju na e latë tokën e djegur në '97, inati hakmarrës po të verbon e arrin të sulmosh edhe institucioneve ndërkombëtare", - thoshte Ruçi duke kujtuar se rishikimi i projektit do të ndikojë në marrëdhëniet me ndërkombëtarët që mund edhe të mos financojnë më projektin. "Mirë në '97 akuzove SHBA dhe BE, po tani pse kundërshton veprat e tyre? Meqë Jugu ka votuar kundër teje, ti tani do të sabotosh korridorin Veri-Jug si ndëshkim" - akuzoi Ruçi.
Ideja e Berishës për të braktisur gjurmën e rrugës Levan-Tepelenë, në favor të një "boshti të qendrës", që do të kalonte nga Memaliaj në Kuçovë e Elbasan, u kundërshtua nga ndërkombëtarët dhe pas dy vjetësh nga bllokimi i tij, Këshilli i Ministrave u detyrua të jepte dritën jeshile për fillimin e punimeve. Fitues i njerit prej dy loteve ishte firma "Alpine", që mori edhe tenderin e Vlorës dhe të mbikalimit të Kamzës, në sajë të pranisë së njerëzve të botuesit Fahri Balliu në drejtimin e degës së saj në Shqipëri.

ZVARRITJA
Rruga duhej të kishte përfunduar që në vitin 2008, por, jo vetëm për arsye të bllokimit fillestar, ajo u zvarrit në mënyrë të pajustifikueshme, ndërkohë që u la pas dore edhe aksi i vjetër i Jugut. Janë dashur shtatë vjet për të përfunduar gjysmën e veprës, çka ka shkaktuar akuza nga opozita lidhur me sabotimin e qëllimshëm për zonat e Jugut nga Berisha, kur financimet i kishte gati që më parë.


Shkrimi u botua sot ne gazeten Shqiptarja.com
(sg/shqiptarja.com)

TAG:
• gramoz ruçi