Lezha mban peng rezultatin e
zgjedhjeve. PD:Të hapen kutitë

TIRANE - Përfaqësuesi ligjor i Partisë Demokratike në KQZ, Njazi Kosovrasti kërkoi sot  Komisioni Zgjedhor të marrë një vendim për hapjen e 10 kutive të votimit të ZAZ-së nr. 13, qarku Lezhë, pas konstatimit për ndryshim të shifrave në tabelat e rezultateve për disa subjekte politike. 

Diskutimi i rezultateve të qarkut Lezhë shoqërohet me debate të forta në mbledhjen e sotme të KQZ-së, pas konstatimit se për 10 QV, KZAZ nr. 13 ka dorëzuar fotokopjet e tabelave përfundimtare dhe jo ato origjinale. 

Në këtë situatë KQZ nuk mund të nxjerrë një rezultat përfundimtar për këtë qark, pasi ai nuk mund të dalë nga tabelat e fotokopjuara, informon atsh.
 
Kosovrasti e cilësoi këtë situatë një ngjarje shumë të rëndë dhe një manipulim të shëmtuar dhe përgjegjësit duhet të përgjigjen ligjërisht.

     "Ky manipulim ka ndodhur nga tre personazhe me detyrë në KZAZ-në nr. 13, kryetarja Alketa Hoxha, përfaqësuese e PS-së, që ka qënë dhe dorëzuese e materialit në KQZ, e shoqëruar nga sekretari i komisionit, Aleksandër Gjonmarkaj(PD) dhe nënkryetari Gjovalin Gjeloshi(PD). Këta të tre janë manipulatorë dhe duhet të jenë pjesë e një gjykimi që duhet të vazhdojë me vendimmarrjen e KQZ-së", u shpreh Kosovrasti.

Nga ky manipulim, vijoi ai, favorizohet subjekti PS dhe bashkë me të koalicioni i majtë. Përfaqësuesi i PD-së tha se nga informacioni i mbërritur elektronikisht në KQZ rezulton se shumatorja e votave për koalicionin e majtë në 248 QV të qarkut Lezhë është 38. 270 vota, ndërsa koalicioni i djathtë ka marrë 38.555, ose 285 vota më shumë se i pari.  

Procesi zgjedhor i 23 qershorit ka tri javë që ka përfunduar megjithatë KQZ ende nuk ka mbyllur fazën e parë të procesit të nxjerrjes së rezultatit përfundimtar. 

Deri më tani, Komisioni Qendror i Zgjedhjeve ka shpallur tabelat e rezultateve për 11 qarqe të vendit, ose 11 zona zgjedhore, ndërkohë që Komisioni Qendror i Zgjedhjeve ka si detyrë që brenda 48 orëve të miratojë tabelat e rezultateve për 12 qarqet e vendit.

LSI-ja kërkon rinumërimin e votave për 15 qendrat e votimit të Qarkut të Kukësit të KZAZ numër 9 të rrethit të Tropojës.

Redaksia online
(sg/shqiptarja.com)

TAG:
• kqz