'Libri shoku më i mirë, të tjerët shkojnë dhe vijnë'/ Rama: Brenda 2021 për të gjitha klasat do të jetë falas (VIDEO)

TIRANË-  Kryeministri Edi Rama, së bashku me kryetarin e Bashkisë së Tiranës, Erion Veliaj, ishin sot në shkollën 9-vjeçare “Mihal Grameno” në kryeqytet, ku edhe asistuan një moment të shpërndarjes së teksteve shkollore falas.

Kryeministri tha se brenda 2 vitesh të gjithë nxënësit e shkollave 9-vjeçare do të mund t’i përfitojnë falas tekstet mësimore.

“Këtë vit kemi shtuar klasën e pestë. Vitin tjetër do shtojmë të gjashtën dhe të shtatën, pastaj të tetën dhe të nëntën. Në fund, në sezonin 2021-2022 të gjithë librat nga klasa e parë te e nënta do jenë falas, por duhet t’i mbani mirë, se dëgjoj shumë që ankohen, thonë pse nuk kanë të drejtë t’i grisin, pse nuk kanë të drejtë t’i shkarravisin, pse nuk kanë të drejtë t’i humbin, pse nuk kanë të drejtë të bëjnë çfarë të duan, zyshat mund t’ua thonë, libri është shoku më i mirë. Të gjithë të tjerët shkojnë e vijnë libri mbetet,” u shpreh kryeministri Rama.

Ndërsa kryebashkiaku Veliaj u shpreh se faza e dytë e restaurimit të kësaj shkolle parashikon edhe shtimin e fushave sportive, duke e cilësuar këtë shkollë një ndër 5 më të mirat në kryeqytet.

“Në pamundësi për t’i bërë të dyja, kemi bërë fillimisht shkollën, pastaj faza e dytë do të jenë të gjithë fushat sportive. “Mihal Grameno” neve na rezulton gjithmonë “Top 5”, pra, një nga 5 shkollat më të mira. Mania për t’i çuar të gjithë në ato shkolla që kanë qenë të mira në vitet ’80-të ka filluar të reduktohet,” u shpreh kryebashkiaku Veliaj.

TAG:
• edi rama
• erion veliaj
• mihal grameno