Liga e Kombeve në prag, përcaktohen 6 stadiumet e ndeshjeve ku do luajë kombëtarja shqiptare

Janë përcaktuar stadiumet e ndeshjeve të Ligës së Kombeve ku Shqipëria bën pjesën në grupin B1 të Ligës B bashkë me Ukrainën, Gjeorgjinë dhe Çekinë. Për shkak të luftës në Ukrainë, ku nuk lejohen ndeshjet ndërkombëtare, sfida Ukrainë-Shqipëri më 7 shtator do zhvillohet në Çeki në stadiumin “Epet Arena”.

Tre ditë më pas, më 10 shtator, kuqezinjtë do të presin Gjeorgjinë në folenë kuqezi, në stadiumin“Air Albania”. Kjo sfidë është planifikuar të luhet në ora 20:45.

Në muajin tetor, Kombëtarja shqiptare do të zhvillojë dy ndeshjet e radhës në UEFA Nations League, ndaj Çekisë dhe Gjeorgjisë në transfertë. UEFA ka përcaktuar edhe stadiumet se ku do të luhen këto dy takime.

Ndeshja Çeki – Shqipëri do të zhvillohet në stadiumin “Epet Arena”, më datë 11 tetor, në ora 20:45. Ndërsa sfida Gjeorgji – Shqipëri e programuar për t’u luajtur më 14 tetor do të zhvillohet në stadiumin “Mikheil Meskhi I Stadium” në Tbilisi të Gjeorgjisë. Ndeshja do të startojë në ora 18:00.

Dy ndeshjet e fundit të UEFA Nations League në grupin B1 kuqezinjtë do t’i luajnë në shtëpi në stadiumin “Air Albania”. Sfida Shqipëri – Çeki do të luhet më 16 nëntor, në ora 20:45, ndërsa takimi Shqipëri – Ukrainë do të zhvillohet më 19 nëntor, në ora 20:45.

Ne.k./Shqiptarja.com

TAG:
• Liga e Kombeve
• kombetarja shqiptare