Ligj të ri për ushqimin dhe shërbimin veterinar, ministri Çuçi: Reformim tërësor për AKU-në, garantojmë sigurinë ushqimore

Rritja e sigurisë ushqimore edhe këtë vit do të jetë në fokus të Ministrisë së Bujqësisë dhe konkretisht të Autoritetit Kombëtar të Ushqimit. Për këtë arsye pas ndryshimeve në Kodin Penal në vitin 2019 i cili shtoni masat ndëshkuese ndaj atyre që cenonin sigurinë ushqimore, qeveria ka vendosur të ndryshojë dy projektligje të rëndësishme. Projektligjin për ushqimin dhe projektligjin për Shërbimin Veterinar në Republikën e Shqipërisë, që sipas Ministrit të Bujqësisë Bledi Çuçi janë ndërmarrë për të garantuar sigurinë ushqimore.

Gjatë një vizite në një thertore në Korçë, ministri Çuçi u shpreh se brenda muajit shkurt miratohen ndryshimet në ligjin e ushqimit. Projektligji për ushqimin, ka për objektiv të sigurojë dhe garantojë që çdo hallkë e zinxhirit ushqimor të jetë shumë e fortë për të arritur synimin që shëndeti i konsumatorit të jetë plotësisht i mbrojtur.

 “Brenda muajit shkurt ne do të miratojmë në Parlament ndryshimet përkatëse në ligjin për Ushqimin, të cilat i hapin rrugë një reformimi tërësor të Autoritetit Kombëtar të Ushqimit, për ta kthyer këtë institucion nga një agjenci ku 60% të punës merret me kontrolle rutinë të kioskave, fast food-eve apo restoranteve në një agjenci që të garantojë sigurinë ushqimore në sistem, në mënyrë që të paraprijmë gjithë procesin e përafrimit të standardeve tona me ato evropiane. Synojmë një ridimensionim tërësor të shërbimit veterinar në Shqipëri. Këto janë procese që ne po i ndërmarrim në mënyrë që hap pas hapi të shkojmë drejt standardizimit të sigurisë ushqimore në Shqipëri me atë evropiane”, tha ministri Çuçi.

Me miratimin e ndryshimeve në Ligjin për Ushqimin, ndër të tjera do të kemi një strukturë të re brenda AKU-së që analizon të dhënat e inspektimeve ndër vite, në mënyrë që plani i monitorimit kombëtar të jetë i bazuar në analizë dhe statistika disa vjeçare.

TAG:
• aku
• Bledi Cuci
• AZHBR