Ligji i arsimit të lartë, Mazniku: Kjo
është e para reformë e papolitizuar 

TIRANE- Arbian Mazniku zv/ministri i arsimit ka dalë sot në një deklaratë në të cilën ka sqaruar projektligjin për Arsimin e Lartë i cili ka ngjallur debate mes qeverisë dhe opozitës por edhe të senateve akademike.

Mazniku sqaroi se kjo është reforma e parë 100% e papolitizuar dhe se çdo përpjekje për ta ndryshuar këtë është mjerane. “Kjo është një reformë për studentin dhe për prindërit e tyre. Një reformë që synon t’i japë vlerë mundit, kohës, dhe financave të familjeve dhe taksapaguesve duke siguruar që Institucionet e arsimit të lartë të ofrojnë dije dhe cilësi,”-tha Mazniku.
 
Më herët edhe deputeti I Partisë Demokratike Luçiano Boçi përmes një njoftimi për mediat ka njoftuar se Partia Demokratike mbështet ndryshimet e kërkuara dhe angazhohet me instrumentet e saj ligjorë që kërkesat e stafeve akademike të UT për rishikim të projektligjit, në shërbim të kushtetutshmërisë, autonomisë e konkurrencës së drejtë, të gjejnë shprehjen e tyre konkrete.

Sipas PD shqetësimet dhe konstatimet e stafeve akademike për cënimin e parimeve themelore të Kartës së Bolonjës dhe Deklaratës së të Drejtave të Njeriut, janë të drejta.

Më poshtë deklarata e plotë e zv/ministrit Arbian Mazniku
 
Projektligji për Arsimin e Lartë, që po diskutohet është produkt i një procesi unik gjatë gjithë historisë së arsimit të lartë, ardhur pas një konsultimi të gjatë me të gjithë aktorët dhe grupet e interesit.
 
Draft-ligji është produkt i punës së një komisioni ekspertësh të pavarur, larg interesave politike, gjithëpërfshirës dhe profesional.
 
Ne jemi të ndërgjegjshëm që si çdo reformë reale, që sjell ndryshime rrënjësore, ajo nuk mund të jetë një reformë 100% konsensuale.
 
Ndryshe nga pseudo reformat e të shkuarës, kjo nuk është një reformë e partisë në pushtet për partinë në universitet, nuk është reformë e të zgjedhurve të politikës për të shkëmbyer privilegje me të zgjedhurit e trupës akademike.
 
Kjo është një reformë për studentin dhe për prindërit e tyre. Një reformë që synon t’i japë vlerë mundit, kohës, dhe financave të familjeve dhe taksapaguesve duke siguruar që Institucionet e arsimit të lartë të ofrojnë dije dhe cilësi.
 
Kjo është është padyshim reforma më e papolitizuar në këto 20 vjet, dhe çdo tentativë për ta ndryshuar këtë është mjerane.
 
Drafti sjell ndryshime rrënjësore të hapsirës së arsimit të lartë në vend, duke synuar rritjen e cilësisë dhe krijuar një balancë të re midis zgjerimit të autonomisë, mekanizmave të kontrollit të cilësisë, dhe përmbushjes së përgjegjësi kushtetuese për të drejtën për arsim.
 
Projektligji rrit ndjeshën autonominë universitare në vend, duke deleguar kopetenca nga Ministria drejt vetë institucioneve, vendimarrjet e rëndësishme, mbi kuotat dhe kriteret e pranimit të studenëve, mbi numrin dhe pagat e stafit akademik, mbi tarifat e studimit dhe buxhetet e universiteteve.
 
Ky ligj është i pari kantier i autonomisë reale. Për ne autonomi nuk është vetëm e drejta për zgjedhur trupat akademikë. Autonomia në këtë ligj shtrihet në fushën e financimit, dhe organizimit të brendshëm dhe ajo vjen natyrshëm së bashku me përgjegjshmërinë për transparencë, llogaridhënie ndaj publikut dhe sigurim të standarteve të cilësisë.
 
Autonomia nuk është qëllim në vetvete por një instrument për të siguruar cilësinë, konkurrencën, meritën dhe transparencën.
Autonomia nuk nënkupton heqjen dorë nga transparenca dhe as nga përgjegjësia kushtetuese e Qeverisë për të siguruar qytetarët për arsimin, cilësinë e tij, financimin dhe institucionet ofruese.
 
Ministria e Arsimit falenderon të gjithë Institucionet e Arsimit të Lartë, që kanë përcjell tek ne vërejtjet e tyre për projektligjin. I sigurojmë ata që çdo vërejtje do të shihet me të njëjtin përkushtim dhe seriozitet që kemi dëgjuar çdo vërejtje gjatë gjithë këtij procesi. Madje në këto momente komisioni është mbledhur tashmë dhe po këqyr një nga një të gjitha vëretjet e dërguara dhe po punojmë bashkarisht për detajet e fundit që janë objekt diskutimi, për t’a përmbyllur dhe jetësuar reformën. 
 
Deklarata e kreut të Departamentit të Arsimit, Shkencës dhe Inovacionit në PD, Luçiano Boçi‏

Partia Demokratike përshëndet vendimin e Senatit Akademik të UT, i cili miratoi qëndrimet e strukturave të tij pranë Fakulteteve, për të kundërshtuar Projektligjin për Arsimin e Lartë.Ajo i konsideron dhe i gjen të drejta e reale shqetësimet dhe konstatimet e stafeve akademike të UT për shkeljet kushtetuese të autonomisë financiare, akademike e institucionale, për cenimin e parimeve themelore të Kartës së Bolonjës dhe Deklaratës së të Drejtave të Njeriut, për synimin e hapur të kontrollit të plotë qeveritar ndaj Universiteteve publike nëpërmjet Bordit të Administrimit dhe rrjetit të Agjenciive burokratike, për përjashtimin e studentëve nga procesi i vendimmarrjes. Ajo mbështet ndryshimet e kërkuara dhe angazhohet me instrumentet e saj ligjorë që kërkesat e stafeve akademike të UT, për rishikim të projektligjit, në shërbim të kushtetutshmërisë, autonomisë e konkurrencës së drejtë, të gjejnë shprehjen e tyre konkrete.

Redaksia online
(F.M/Shqiptarja.com)