Lirohet para kohe serbi famëkeq që vrau 14 shqiptarë

Një tjetër anëtar i një grupi paraushtarak famëkeq serb është liruar më herët nga burgu nga një gjykatë në Beograd pasi kishte kryer 12 vjet nga dënimi i tij me 15 vjet burg për krime lufte.

Miodrag Solaja luftoi me një njësi të njohur si Akrepat gjatë luftës së viteve 1998-1999 në provincën e atëhershme jugore të Serbisë, Kosovë.

Në vitin 2008, ai u dënua për pjesëmarrje në vrasjen e 14 civilëve në qytetin e Podujevës më 28 mars 1999, katër ditë pas fillimit të një lufte 11-javore ajrore të NATO-s që dëboi përfundimisht forcat serbe nën drejtimin e Sllobodan Millosheviçit.

Pasi qëndroi në paraburgim për një vit, Solaja u dënua me 14 vjet burg, që u rrumbullakos me 15 vjet për dënimin e tij në një çështje tjetër, por Gjykata e Lartë e Beogradit urdhëroi lirimin e tij të parakohshëm më 23 korrik në një vendim të konfirmuar nga Gjykata e Apelit më 31 korrik.

Vendimi citoi një raport nga burgu i Sremska Mitrovicës, ku Solaja vuante dënimin e tij, duke thënë se ai kishte bërë “përparimin maksimal në trajtim”, se “risocializimi” i tij ishte i plotë dhe se ai kishte përmbushur qëllimet e përcaktuara në programin e trajtimit.

Akrepat ishin një nga një sërë njësish paraushtarake të rekrutuara për të luftuar së bashku me forcat e rregullta në luftën e Kosovës, në të cilën u vranë mijëra civilë shqiptarë të Kosovës dhe u dëbuan rreth 800,000 të tjerë ndërsa Millosheviçi përpiqej të shtypnte një kryengritje guerile.

Disa nga anëtarët e saj kishin përvojë luftarake në luftërat në Kroaci dhe Bosnje. Solaja, megjithatë, ishte vetëm 20 vjeç dhe nuk e kishte përfunduar shërbimin e tij ushtarak.

Ai tha se dëshironte të “ndihmonte në luftë, me shokët”, si dhe të merrte “çekun”.

Akrepat mbërritën në Podujevë më 28 mars 1999 për t’u bashkuar me Njësinë Speciale Serbe të Anti-Terrorizmit, SAJ.

Paraushtarakët duhej të vendoseshin në shtëpi të braktisura, por gjetën tre familje shqiptare në njërën prej shtëpive.

Qytetarët u rreshtuan pas në muri dhe u qëlluan për vdekje. Katërmbëdhjetë vdiqën, përfshirë shtatë të mitur. Më i riu ishte dy vjeç. Pesë fëmijë mbijetuan, përfshirë Saranda Bogujevcin, e cila u godit nga 16 plumba.

Katër vjet më vonë, Bogujevci, në atë kohë 18 vjeçe, dhe tre kushërinjtë e saj u bënë viktimat e para etnike shqiptare që dëshmuan para një gjykate serbe në një çështje krimesh lufte.

Gjykatat serbe kanë dënuar një total prej pesë ish-anëtarësh të Akrepave për masakrën e Podujevës, shkruan Balkaninsight. Sasa Cvjetan, kundër të cilit dëshmoi Bogojevci në vitin 2003, u la i lirë në mars të vitit të kaluar, pasi kishte kryer dy të tretat e një dënimi me 20 vjet burg. Bogujevci, tani deputete e Kosovës, e dënoi lirimin e parakohshëm të Cvjetanit si “të papranueshëm”.

TAG:
• kosove
• Lufte
• miodrag soloja