Litzman:Të gatshëm për dërgimin e
mjekëve të kualifikuar izraelitë në Shqipëri

Me ftesë të Ministrit të Shëndetësisë së Izraelit, Yakov Litzman, zhvilloi një vizitë zyrtare në Izrael një delegacion i Ministrisë së Shëndetësisë, i kryesuar nga Ministri Ilir Beqaj.

Në bisedimet ndërmjet dy ministrave u diskutua rreth intensifikimit të marrëdhënieve dypalëshe mes dy ministrive të shëndetësisë, në kuadër të marrëveshjes ndërshtetërore që u nënshkrua në muajin dhjetor në Jeruzalem, nga Kryeministri Edi Rama dhe homologu i tij izraelit Benjamin Netanyahu.

 Bisedimet u fokusuan në shqyrtimin e mundësive për shkëmbimin e përvojës së Izraelit në organizimin e kujdesit shëndetësor me fokus të veçantë në parandalimin dhe kujdesin shëndetësor parësor, në ngritjen e kapaciteteve të personelit mjekësor dhe vlerësimit të aftësive të personelit shëndetësor, në eksperiencën izraelite në përdorimin dhe shfrytëzimin e informacionit individual shëndetësor.

Ministri Litzman shprehu gatishmërinë për dërgimin e mjekëve dhe specialistëve të kualifikuar izraelitë për të dhënë ndihmesën e tyre pranë sistemit shëndetësor të Shqipërisë, dhe mirëpriti ftesën e Ministrit Beqaj për një vizitë zyrtare në Shqipëri. Në takim, ministri Beqaj shoqërohej edhe nga ambasadori i Shqipërisë në Izrael, Bardhyl Canaj.

 Në vizitën e tij, kreu i shëndetësisë shqiptare vizitoi “Wolfson Medical Center” ku u njoh nga afër me arritjet dhe përvojën e shërbimit publik spitalor izraelit. Gjithashtu, ai u njoh me programin “Save a Child’s Heart” të këtij insitucioni dhe diskutoi me drejtuesit e tij për përfshirjen e Shqipërisë në këtë nismë, propozim i cili gjeti mirëkuptim të plotë.

 Në përfundim të vizitës, Ministri Beqaj zhvilloi një takim pune me Ambasadorin Gil Haskel, Drejtor i Përgjithshëm i agjencisë për bashkëpunimin dhe zhvillim ndërkombëtar me seli në Ministrinë e Jashtme të Izraelit, MASHAV, ku u diskutua dhe e ra dakort për miratimin e një memorandumi bashkëpunimi tre-vjeçar midis Ministrisë së Shëndetësisë shqiptare dhe MASHAV-it në çështje me interes për sistemin shëndetësor shqiptar.

Redaksia Online
(M.Ç/shhqiptarja.com)