Analiza e fortë e FAZ: Loja e Vuçiç njësoj si e Millosheviçit, nxit dhunën në Kosovë e pretendon të jetë i paditur përpara BE-së

Gazeta prestigjioze gjermane, “Frankfurter Allgemeine Sonntagszeitung” ka shpërfaqur lojërat e Serbisë ndër vite, duke i ndërlidhur me rastin e fundit të Banjskës ku një grup i armatosur e uniformuar serbësh vranë policin e Kosovës, Afrim Bunjaku.

Duke nisur me ato që i ka quajtur lojëra cinike, gazetari Michael Martensi ka shkruar fillimisht për nisjen e luftërave në Jugosllavi. Ka thënë se në kohën e Jugosllavisë, në kohën kur nisën vrasjet në Kroaci e Bosnje nga trupat e financuara dhe të dërguara nga Beogradi, presidenti i asaj kohe, Sllobodan Millosheviç, pretendonte se s’kishte të bënte asgjë me to. Millosheviçi i përshkruante luftërat si “konflikte mes serbëve lokalë të Kroacisë e Bosnjes me Qeveritë në Zagreb e Sarajevë”.

“Ishte rrenë ashiqare”, ka shkruar FAZ-i.

LEXO EDHE:
Vëllai i Liridona Ademajt: Fëmijët panë se si babai shtrëngoi për krahu nënën e tyre që të kryhej më lehtë vrasja

Shkrimi vazhdon duke thënë se edhe presidenti aktual rus, Vladimir Putin, me sukses ia kopjoi metodën Millosheviçit për ta aneksuar Krimenë më 2014. Trupat ruse u dërguan pa emblema në uniforma. “Zyrtarisht, Kremlini thoshte se s’ka të bëjë asgjë me këta trupa, e sot kur kjo rrenë e vjetër më s’është e nevojshme, Moska mburret se si ushtarët e saj të vegjël pushtuan Krimenë. Rrenat e djeshme janë bërë akte heroike sot”, ka shtuar FAZ-i.

“Diçka e ngjashme po ndodh edhe në Ballkan ndër vite. Përderisa ende nuk është krejtësisht e qartë nëse gjakderdhja e fundit ishte provokim nga Beogradi që u doli nga kontrolli dhe se cili ishte qëllimi i aksionit, një gjë është e sigurt: Qytetarët e zakonshëm në veri të Kosovës nuk posedojnë vetura të blinduara a granata dore. Grupi i armatosur që vrau policin dhe më pas u strehua në Manastir, është pjesë e strategjisë së pajisur dhe mbështetur nga Beogradi”, shkruhet më tej në artikull.

Martens ka thënë se përderisa presidenti i Serbisë, Aleksandar Vuçiç, shprehet se nuk di asgjë për të, “duhet të jesh shumë naiv t’i besosh”.

“Sepse edhe nëse ai mund të mos ketë informata për aksionin specifik, strategjia e armatimit të paramilitarëve është e tij. Ai e mban mend këtë nga të ’90-at. Vuçiçi ka përdorur metodën e mësuesve të tij, Millosheviçit dhe Putinit: Dhuna promovohet sistematikisht, por u jepet nënkontraktorëve. Në të njëjtën kohë, në skenën evropiane vepron si i shqetësuar dhe pretendon se është i gatshëm të përfshihet në biseda e negociata”, ka shkruar Martensi për Vuçiçin.

Sipas FAZ-it, “gatishmëria” e Vuçiçit është vetëm “perde tymi”. Ai ka thënë se krejt është strategji e presidentit të Serbisë që të humbë kohë, ndërsa qëllimi është të kontrollojë territor si dhe të mbahet shpresa se Trumpi do të kthehet në SHBA.

“Në prapavijë, politikanët perëndimorë që i besuan rrenave të Millosheviçit para 30 vjetësh, duken qesharakë, më së paku. Politikanët që sot besojnë ose pretendojnë të besojnë se Vuçiçi është njeri që i besohet fjala, mund të gjykohen njëjtë pas dhjetë vjetësh. A duan të jenë pjesë e historisë si tjetër gjeneratë budallenjsh naivë perëndimorë, të mashtruar nga një president tejet inteligjent serb që luan lojën shumë më shpejt dhe më mirë se ata? Beogradi po luan lojë cinike në Kosovë. Është koha të shpërfaqet kjo lojë. Jo vetëm në retrospektivë, kur bëhet vonë, siç ishte rasti i Millosheviçit dhe Putinit, por tash. Deformimi i fakteve është loja e Vuçiçit. Askush nuk e detyron BE-në apo Berlinin të luajnë së bashku”, ka shtuar FAZ-i.

Siç ka shkruar ndaras në Twitter Martensi, tash janë dy ide që mund të funksionojnë. E para për hetim ndërkombëtar mbi Serbinë dhe që të ngrihen negociatat për anëtarësimin e Serbisë në BE.

Përpos kësaj, sipas tij, dialogu është proces i vdekur dhe se ndërmjetësit e dijnë.

Shkrimi i plotë

Loja serbe

Beogradi nxit dhunën në Kosovë dhe pretendon të jetë i paditur përpara BE-së. Në realitet, bëhet fjalë për kontrollin e territorit.

Nga Michael Martens

Kur Jugosllavia u shpërbë tridhjetë vjet më parë, Serbia luajti një lojë cinike: ndërsa trupat e financuara dhe të dërguara në betejë nga Beogradi plaçkitën, vranë dhe pushtuan në Kroaci dhe më vonë në Bosnje, Presidenti serb Slobodan Millosheviç u paraqit si një engjëll i pafajësisë. Ai pohoi se vendi i tij nuk kishte asnjë lidhje me të, se bëhej fjalë për një konflikt ndërmjet serbëve vendas dhe shteteve fqinje. Ishte një gënjeshtër e hapur, e megjithatë vështirë se dikush në Perëndim foli kundër saj. Njerëzit preferuan ta shihnin Millosheviçin si partner negociator. Putini kopjoi me sukses sistemin e Millosheviçit në Krime në vitin 2014: "Burrat e tij të vegjël me të gjelbër" ishin forca speciale të ushtrisë ruse pa emblema kombëtare në uniformat e tyre. Zyrtarisht, Kremlini pretendoi se nuk dinte asgjë për të. Sot, kur gënjeshtra nuk është më e nevojshme, Moska mburret me operacionin special për pushtimin e Krimesë. Gënjeshtra e djeshme është bërë akti heroik i sotëm.

Diçka e ngjashme po ndodh aktualisht në Ballkan. Veriu i Kosovës me popullsi serbe kontrollohet kryesisht nga Serbia. Pothuajse të gjitha punët varen drejtpërdrejt ose tërthorazi nga Beogradi. Asgjë e rëndësishme nuk ndodh në veri pa dijeninë e qeverisë serbe. Një javë më parë, një grup prej 30 luftëtarësh u shfaqën papritur në veri. Të pajisur mirë, me armë zjarri, granata dore, mjete të blinduara dhe pajisje komunikimi, të kamufluara e me kapuç. Skuadra bllokoi një rrugë, i zuri pritë një njësie të policisë së Kosovës, qëlloi një oficer policie dhe më pas u fsheh në një manastir ortodoks, duke shkaktuar pakënaqësi të kishës serbe. Së paku tre u vranë në një përleshje të mëvonshme me policinë e Kosovës.

Nuk është plotësisht e qartë nëse luftimet ishin një provokim i Beogradit që doli jashtë kontrollit dhe çfarë synohej prej tyre. Një gjë është e sigurt: grupi i luftëtarëve të lirë mund të ishte pajisur dhe mbështetur vetëm nga Beogradi. Qytetarët e thjeshtë nuk kanë automjete të blinduara dhe granata dore, as në zonat e egra të veriut të Kosovës. Nëse presidenti i fuqishëm i Serbisë, Aleksandër Vuçiç tani pohon se nuk dinte asgjë për do të duhet të jesh shumë naiv për ta besuar atë. Vuçiç po përdor metodën e zotërisë së tij Millosheviçit, ministër i propagandës së të cilit ishte: dhuna u jepet nënkontraktorëve të ushtrisë së lirë dhe promovohet sistematikisht, ndërsa në skenën evropiane pretendon se je i shqetësuar dhe i gatshëm për të negociuar, gjë që në realitet synimi është vetëm të fitosh kohë. Qëllimi i vërtetë është kontrolli mbi territorin.

Burrat e shtetit që dikur besonin gënjeshtrat e Millosheviçit duken sot qesharakë, në rastin më të mirë në retrospektivë sot. Ata që sot janë në krye dhe ende besojnë, ose pretendojnë se besojnë, se Vuçiçi është një njeri, fjalës së të cilit mund t’i besohet, duhet të mendojnë se si do të jetë ai qëndrim pas 10 vjetësh. Vuçiç po ndjek një strategji cinike në Kosovë. Është koha për ta quajtur atë me emrin e saj. Jo në retrospektivë, si me Millosheviçin dhe Putinin, por tani. Që Vuçiç po shtrembëron faktet është loja e tij. Askush nuk po e detyron BE-në apo Berlinin të luajnë së bashku.

Shkrimi origjinal:  Serbische Spiele

G.MO/S.G/Shqiptarja.com

TAG:
• serbi
• vritet polici ne kosove
• kosove
• Afrim Bunjaku