LSI i përgjigjet akuzave të Ballës për blerjen e votës: Hajdutët na flasin për ndershmëri

"Balla do të mbajë përgjegjësi për çdo gjë dhe për çdo lidhje që ai, qeveria e tij dhe Rama ka me krimin dhe drogën"! Është kjo deklarata e ish- deputetes së LSI, Floida Kërpaçi, lidhur me akuzat e Ballës nga parlementi ku e etiketoi LSI, si partinë simbol të shit-blerjes së votës.  

"Z.Balla do të mbajë përgjegjësi për çdo gjë dhe për çdo lidhje që ai, qeveria e tij dhe z.Rama ka me krimin dhe drogën. Dhe për këtë do të jenë të rinjtë e vendit dhe shqiptarët që do ti’a japin ndëshkimin atij dhe kësaj qeverie deri në fund", tha Kërpaçi.

Petrit Vasili, është i pari nga LSI që i është përgjigjur akuzave të Ballës. Vasili theksoi se raportin e DASH dhe të OSBE-ODIHR, PD dhe LSI kanë qenë partitë e vetme që kanë denoncuar këtë fenomen, e ndërsa solli sërish në vëmendje "dosjen 339", sipas së cilit është tregues i qartë se si kjo qeveri ka ardhur në pushtet me vota të blera.

"Para pak minutash me pacipësinë që e karakterizon tashmë Parlamentin e kuislingëve, pikërisht në këtë sallë tashmë e cila vjen erë, pra në Parlamentin e Shqipërisë, guxuan që të diskutojnë për votën. Guxuan që të diskutojnë e të thonë që do të jenë ata që do të zhdukin edhe shitblerjen edhe manipulimin e votës. Guxuan të thonë që janë ata zgjidhja që mund ta bëjë këtë gjë. Sot jam përpara jush për të qartësuar njëherë e përgjithmonë me shqiptarët se çfarë është ky Parlament e për çfarë duhet të përgjigjet. Në radhë të parë ky është një Parlament dhe Rilindja e cila e ka zaptuar atë forcërisht, në kundërshtim me Kushtetutën dhe çdo gjë tjetër, është produkti më i shëmtuar dhe i neveritshëm i shitblerjes së votës në këtë vend. Këtë nuk e thotë thjesht dhe vetëm opozita, këtë e thotë raporti i OSBE/ODIHR, i cili nënvizon qartë se vetëm LSI dhe PD denoncuan qartë shitblerjen e votës nga Partia Socialiste, dhe nuk ka asnjë rresht apo paragraf që të provojë të kundërtën për këtë gjë. Të njëjtën gjë pohon raporti i Departamentit Amerikan të Shtetit, i cili i vë damkën zgjedhjeve si zgjedhje të cilat u karakterizuan nga shitblerja e votës. Dhe duke iu referuar sërish raportit të OSBE/ODIHR kemi pikërisht ata që shitën dhe blenë votën, të cilën përfundimisht e nxjerr sheshit dosja 339", tha Vasili.