LSI me misionin e KiE: Incidentet
dhe KQZ-ja, çështje të pazgjidhura

TIRANË - Përfaqësues të LSI-së janë takuar sot misionin parazgjedhor të Asamblesë Parlamentare të Këshillit të Evropës. Nënkryetari i LSI-së, Ylli Manjani vuri në dukje se siuata deri më sot ka qënë larg tensioneve kjo edhe falë kërkesave më civile të qytetarëve, të cilët ndjehen të lodhur nga politika konfliktuale. Manjani nënvizoi se çështja e KQZ mbetet ende e pazgjidhur dhe se qeveria nuk ka treguar vullnet të mjaftueshëm për të gjetur një zgjidhje dhe nuk ka bërë asgjë për të rikthyer besueshmërinë në këtë institucion të rëndësishëm zgjedhor.

Sekretari Ndërkombëtar i LSI-së, Ralf Gjoni ritheksoi shqetësimet e fundit të shprehura nga LSI këto ditë në lidhje me incidentet e fundit në qarkun e Kukësit dhe lidhur me presionet e vazhdueshme që ushtrohen nga forcat policore ndaj kandidatëve të LSI në këtë qark. Në këtë kuadër, zyrtarët e Asamblesë Parlamentare të Këshillit të Evropës u informuan edhe mbi mungesën e reagimit dhe qëndrimit nga ana e Ministrit të Brendshëm Flamur Noka për këtë çështje shqetësuese, pavarësisht thirrjes publike të Lëvizjes Socialiste për Integrim.

Manjani, Gjoni dhe Lazimi diskutuan me përfaqësuesit e misionit Parazgjedhor të KiE edhe mbi ecurinë e organizimit të zgjedhjeve, duke evidentuar nevojshmërinë e rritjes së garancive për transparencën e plotë të procesit.
 
Redaksia online
(ar.sh/shqiptarja.com)

TAG:
• kqz