Lufta/ Bastisje në kampin e refugjatëve në Rafah, 13 viktima! Ndaloni negociatat, familjet e pengjeve kundër Netanyahut! Vdes ushtari i 116-të izraelit

Zëdhënësi i ministrisë së Shëndetësisë në Gaza, Ashraf al-Qudra

Ministria e Shëndetësisë në Gaza, nën kontrollin e Hamasit, ka deklaruar se numri i palestinezëve të vrarë në Gaza, për shkak të sulmeve izraelite, që nga fillimi i luftës më 7 tetor, ka shkuar në 18,787.

Ndër të tjera, autoritetet palestineze bëjnë me dije se 50,897 palestinezë janë plagosur në Gaza që nga fillimi i luftës.

Zëdhënësi i ministrisë së Shëndetësisë në Gaza, Ashraf al-Qudra, ka sqaruar se vetëm në 24 orët e fundit janë vrarë 179 palestinezë dhe se ka ende shumë viktima nën rrënoja.

Leo Varadkar

Kryeministri i Irlandës, Leo Varadkar, deklaroi së fundmi se BE-ja po humbet besueshmërinë lidhur me mesazhet e saj për luftën Izrael-Hamas, ndërsa ai u bëri thirrje anëtarëve të bëjnë thirrje për një armëpushim humanitar.

Duke folur në fillim të samitittë BE-së në Bruksel, Varadkar tha se BE duhet të bëjë thirrje për drejtësi për palestinezët duke dënuar gjithashtu terrorizmin e kryer nga Hamasi, raporton Sky News.

Qëndrimi i BE-së është se Izraeli ka të drejtë të mbrohet në përputhje me të drejtën ndërkombëtare humanitare. Gjithashtu ka shprehur shqetësimin për përkeqësimin e kushteve në Gaza.

Blloku 27-vendesh ka pak ndikim mbi Izraelin, por është partneri më i madh tregtar i vendit.

Fletëpalosjet e shpërndara nga ushtria izraelite

Ushtria izraelite po shpërndan fletëpalosje në Gaza duke ofruar shpërblime në para për ata që ofrojnë informacione të dobishme për kapjen e udhëheqësve të Hamasit.

Rishi Sunak

Kryeministri britanik, Rishi Sunak, ka ripohuar mbështetjen për zgjidhjen me dy shtete pasi Tzipi Hotovely, ambasadorja izraelite në Mbretërinë e Bashkuar kundërshtoi një plan të tillë.

Sunak tha se ende beson në zgjidhjen me dy shtete për Izraelin dhe Palestinën.

“Qëndrimi ynë prej kohësh nuk ka ndryshuar, ne besojmë se zgjidhja me dy shtete është rezultati i duhur. Ajo që po ndodh është tepër shqetësuese. Unë kam thënë vazhdimisht se shumë njerëz të pafajshëm kanë humbur jetën. Askush nuk dëshiron që ky konflikt të zgjasë”, tha Sunak.

Ai mbështeti të drejtën e Izraelit për t’u mbrojtur dhe shtoi se i kishte thënë kryeministrit izraelit Benjamin Netanyahu javën e kaluar se Izraeli duhet të mbrojë civilët.

Kjo pason intervistën e Hotovely me Mark Austin të mërkurën kur u pyet për zgjidhjen me dy shtete.

“Absolutisht jo. Izraeli e di sot, dhe bota duhet ta dijë tani se palestinezët kurrë nuk kanë dashur të kenë një shtet pranë Izraelit", tha Hotovely.

E moshuara palestineze duke u lutur pas bombardimezve izraelite në Gaza

Gjysma e popullsisë së Rripit të Gazës është zhvendosur në jug, në Rafah. Kjo është bërë e ditur nga UNRWA, agjencia e Kombeve të Bashkuara që merret me refugjatët palestinezë, duke shpjeguar se një milion njerëz janë shpërngulur në provincën Rafah. 16 mijë njerëz për metër katror tani jetojnë këtu, raporton agjencia e OKB-së.

85% e popullsisë së Rripit të Gazës, afërsisht 1.9 milionë njerëz, janë të zhvendosur brenda vendit për shkak të luftës së vazhdueshme që nga 7 tetori. Shumë prej tyre janë zhvendosur shumë herë, thotë OCHA, zyra e Kombeve të Bashkuara që koordinon çështjet humanitare.

Ushtarët e Hamasit

Sipas disa mediave, duke përfshirë faqen pan-arabe Al-Araby Al-Jadeed dhe gazetën izraelite Haaretz, Katari dhe Egjipti po punojnë për të ndërmjetësuar një marrëveshje të re midis Izraelit dhe Hamasit. 

Al-Araby Al-Jadeed citon burime egjiptiane që thonë se Izraeli i ka kërkuar Kajros të ndërmjetësojë një marrëveshje, ndërsa Haaretz citon burime palestineze të thonë se Katari dhe Egjipti po mbajnë bisedime jozyrtare për të formuluar një plan për një marrëveshje të re. 

Besohet se në zemër të një pakti të ri është lirimi i 135 pengjeve ende në Rripin e Gazës, nga të cilët të paktën 20 besohet se kanë vdekur.

Foto nga autostrada në Los Anxhelos

Dhjetëra protestues bllokuan një autostradë në Los Anxhelos gjatë orës së pikut duke bërë thirrje për armëpushim midis Izraelit dhe Hamasit. Ata u ulën në rrugë, duke shkaktuar bllokime të trafikut.

Anëtarët e IfNotNow, një organizatë që thotë se u themelua nga “hebrenjtë amerikanë për t’i dhënë fund mbështetjes së SHBA për sistemin e aparteidit izraelit”, mbanin pankarta gjigante  dhe brohoritën thirrje për “fundin e menjëhershëm të luftës”.

“Si hebrenj, ne nuk mund të qëndrojmë duarkryq pasi popullsia në Gaza është e uritur dhe e masakruar në emrin tonë. Ne nuk mund të lejojmë që jeta të vazhdojë si zakonisht ndërsa palestinezët vriten”, tha organizata.

Pamjet nga demonstrata tregojnë debate dhe përleshje, me sa duket mes protestuesve dhe shoferëve.

Ndërsa mbështetja ndërkombëtare për luftën e Izraelit kundër Hamasit po zvogëlohet, Asambleja e Përgjithshme e OKB-së këtë javë miratoi me shumicë dërrmuese një rezolutë që bën thirrje për një armëpushim të menjëhershëm, ndërsa presidenti i SHBA Joe Biden paralajmëroi kundër bombardimeve “pa dallim”, që kanë shkaktuar mijëra viktima civile.

Ismail Haniyeh

Shefi i Byrosë Politike të Hamasit, Ismail Haniyeh, deklaron se çdo plan për Gazën e pasluftës që nuk përfshin grupin e tij është vetëm një “iluzion”.

“Çdo marrëveshje në Gaza ose për çështjen palestineze pa përfshirjen e Hamasit ose fraksioneve të rezistencës është vetëm një mashtrim”, tha ai.

Zyrtari palestinez thotë se është i hapur për bisedimet që do t’i japin fund luftës dhe për “rregullimin e ‘shtëpisë’ palestineze si në Bregun Perëndimor ashtu edhe në Rripin e Gazës”, raporton thetimesofisrael.

Ai tha se Hamasi është gati për bisedime që mund të dërgojnë në një “rrugë politike që siguron të drejtën e popullit palestinez për shtetin e tyre të pavarur me Jerusalemin si kryeqytet”.

Haniyeh nuk tregon nëse duhet të ekzistojë ndonjë shtet izraelit përkrah atij palestinez. Izraeli ka nisur ofensivën ndaj militantëve të Hamasit, pasi këta të fundit kryen një sulm terrorist në territoret izraelite.

Jake Sullivan

Këshilltari i Sigurisë Kombëtare i Shtëpisë së Bardhë, Jake Sullivan do të vizitojë Izraelin ku do të zhvillojë bisedime me kryeministrin Benjamin Netanyahu dhe anëtarët e kabinetit të luftës izraelite.

Bisedimet pasojnë paralajmërimet nga aleati më i ngushtë i Izraelit, SHBA, për mënyrën se si po zhvillon luftën me Hamasin. Presidenti i SHBA-së Joe Biden tha se për shkak të bombardimeve pa dallim ndaj Gazës, Izraeli ka humbur mbështetjen globale.

Të mërkurën, Sullivan zhvilloi bisedime me princin saudit të kurorës Mohammed bin Salman.

Negociatat e SHBA-së që synonin normalizimin e marrëdhënieve midis Izraelit dhe Arabisë Saudite u ndërprenë nga sulmet e 7 tetorit, por raportohet se të gjitha palët duan të ringjallin marrëveshjen në të ardhmen.

Shtëpia e Bardhë, SHBA

Shtëpia e Bardhë po bllokon një dërgesë me më shumë se 27 mijë pushkë të prodhimit amerikan, të destinuara për policinë izraelite për shkak të frikës se ato mund të transferohen te kolonët ekstremistë në Bregun Perëndimor. 

Këtë e shkruan Wall Street Journal, duke cituar zyrtarë të administratës që mbetën anonimë

Foto nga pika kufitare Rafah

Të paktën 27 persona u vranë në bastisjet e nisura mbrëmë nga Izraeli kundër dy ndërtesave në Rafah. 

Lajmi është bërë i ditur nga agjencia palestineze Wafa. 

Shumica e viktimave i përkisnin dy familjeve, sipas raportimeve të mediave palestineze, të cilat flasin për gra dhe fëmijë mes të vdekurve.

Benjamin Netanyahu

Kryeministri i Izraelit, Benjamin Netanyahu, ka thënë të mërkurën (13 Dhjetor) se ushtria izraelite do të vazhdojë të luftojë në Rripin e Gazës, megjithëse po përballet me trysni ndërkombëtare për armëpushim.

“Ne do të vazhdojmë deri në fund, deri të fitojmë, derisa ta zhdukim Hamasin. E them këtë përballë presionit ndërkombëtar dhe dhimbjes së madhe. Asgjë nuk do të na ndalë”, iu drejtua Netanyahu ushtarëve izraelitë në Gazë përmes radios.

Izraeli njoftoi se të mërkurën i pësoi humbjet më të mëdha në betejë prej e nisi pushtimin e Gazës para një muaji, pasi 10 ushtarë iu vranë në një pritë në Gazë. Në mesin e të vdekurve ishin edhe koloneli Itzhak Ben Basat, 44 vjeç, i cili është oficeri më i lartë që vritet në pushtimin tokësor – dhe koloneli Tomer Grinberg, komandant batalioni.

Shumica e tyre u vranë në rrethinën Shiaja në veri të Qytetit të Gazës, pasi trupat e saj ranë në pritë duke tentuar ta shpëtonin një grup ushtarësh që ishin sulmuar brenda një ndërtese nga luftëtarët e Hamasit – grupit radikal palestinez të shpallur organizatë terroriste nga SHBA dhe BE.

Ushtria izraelite i vazhdoi luftimet e ashpra në veri dhe jug të Gazës, një ditë pasi Kombet e Bashkuara kërkuan armëpushim të menjëhershëm humanitar.

Të martën, presidenti i Shteteve të Bashkuara të Amerikës, Joe Biden, tha se Izraeli është duke e humbur mbështetjen globale për shkak të bombardimit të pakujdesshëm të Rripit të Gazës dhe i bëri thirrje Netanyahut ta ndryshojë Qeverinë e tij.

Izraeli kishte mbështetje globale kur e nisi fushatën për ta shkatërruar Hamasin, i cili e kontrollon Gazës, pasi luftëtarët e tij u futën furishëm në jug të Izraelit më 7 tetor dhe i vranë 1.200 njerëz, kryesisht civilë, dhe i rrëmbyen 240 të tjerë.

Prej atëherë, Izraeli e ka rrethuar enklavën palestineze dhe e ka rrënuar shumicën e saj. Ministria palestineze e Shëndetësisë tha të mërkurën se mbi 18.600 palestinezë janë vrarë dhe rreth 50.000 të tjerë janë plagosur si pasojë e luftës izraelite në Gazë prej 7 tetorit.

Avionët luftarakë e bombarduan edhe të mërkurën Gazën dhe zyrtarët e organizatave humanitare thanë se shiu dimëror i ka përkeqësuar kushtet për qindra mijëra njerëz që detyrohen të flenë në tenda të improvizuara. Shumica dërrmuese e popullsisë prej 2.3 milionë në Gazë ka mbetur pastrehë.

Forcat izraelite

Ushtria izraelite do të përdorë një "larmi mënyrash krijuese" për të shkatërruar tunelet e Hamasit, tha zëdhënësi i Forcave të Mbrojtjes të Izraelit (IDF) Daniel Hagari kur u pyet mbrëmë (13 Dhjetor) nëse IDF po përmbyste kalimet nëntokësore të militantëve palestinezë. 

"Disa nga këto mënyra konsistojnë në aktivitete taktike, duke përdorur një lloj mjetesh për të nxjerrë terroristët nga tunelet dhe me njëfarë shkatërrimi të përhershëm në mënyrë që 'pasazhe të tilla' të mos funksionojnë më. Sa më shumë mënyra, aq më mirë: është e gabuar t'i japësh armikut informacion se kur dhe ku", tha Hagari. 

Foto nga Gaza pas shirave të dendur

Shirat e dendur dhe erërat e ftohta në Gaza gjatë natës kanë përkeqësuar gjendjen edhe ashtu të rëndë që po përballen familjet e zhvendosura palestineze të detyruara të largohen nga shtëpitë e tyre dhe tani të grumbulluara në tenda të dobëta dhe të përmbytura.

Al Jazeera raporton se në një kamp tendash në Rafah, i vendosur në terrenin me rërë të mbushur me mbeturina, njerëzit u panë duke mbajtur kova me rërë për të mbuluar pellgjet brenda ose rreth tendave të tyre.

Dhe Aziza al-Shabrawi u përpoq më kot të nxirrte ujin e shiut nga çadra e familjes së saj, duke treguar dy fëmijët e saj që jetonin në kushte të tilla të pasigurta.

“Djali im është i sëmurë për shkak të të ftohtit të ashpër dhe vajza ime është zbathur. Është sikur të jemi lypës. Askush nuk kujdeset dhe askush nuk ndihmon”, tha 38-vjeçarja. 

Ndërsa Yasmin Mhani tha se u zgjua natën për të gjetur fëmijën e saj shtatë muajsh të lagur. Familja e saj prej pesë anëtarësh po ndajnë një batanije të vetme pasi shtëpia e tyre u shkatërrua nga një sulm ajror izraelit dhe ata humbën një nga fëmijët, si dhe të gjitha pasuritë e tyre.

Ndërkohë pamjet e shpërndara në mediat sociale treguan njerëz që ecnin nëpër rrugët e përmbytura.

Madje, shirat e dendur dhe erërat e forta e kanë bërë më të vështirë varrimin e të vdekurve.

Palestinezët në Gaza janë larguar nga jugu me dhjetëra mijëra me çdo mjet të nevojshëm – makinë, kamion, karrocë me kuaj ose në këmbë – duke e kthyer Rafahun në një “oazë” çadrash dhe strehimoresh të improvizuara prej druri dhe mbulesa plastike.

Kombet e Bashkuara thonë se njerëzit u larguan nga jugu për t’u përballur me “rrethanat katastrofike” me turma që prisnin me orë të tëra rreth qendrave të shpërndarjes për furnizime të pakta me ujë, ushqim dhe ndihmë mjekësore, ndërsa të sëmurët janë shtuar, si pasojë i shiut dhe përmbytjeve.

Ndryshe, Rafah, pranë kufirit me Egjiptin, është pjesa më jugore e Rripit të Gazës, ku njerëzit kanë mbërritur në numër në rritje për të kërkuar strehim nga luftimet intensive midis Izraelit dhe Hamasit, që tani janë duke vazhduar si në veri ashtu edhe në jug.