Lufta në Rripin e Gazës, Shqipëria krah Izraelit! Rama: Hamasi xhelati i popullit të vet! Duam lidhje të forta me shtetin hebre! Zgjidhja me dy shtete sjell paqen afatgjatë

Tirane- Shqipëria është krah Izraelit në këtë luftë të nisur pas sulmit masiv të Hamasit më 7 tetor 2023 duke vrarë rreth 1.200 persona, kryesisht civilë në Izraelin jugor, por dhe dhimbjen e vuajtjen e pamasë që lufta në Gaza po iu shkakton shumë palestinezëve të pafajshëm.

"Shteti hebre ...lufton jo vetëm për të drejtën e tij të vetëmbrohet nga një formë e re e mbrapshtë nazizmi., por edhe për botën ku jetojmë që të mos u besojë përgjigjeve të lehta përballë një kërcënimi ekzistencial të hapësirës së lirë dhe demokratike që kemi ndërtuar të gjithë së bashku, pas makthit të Luftës së Dytë Botërore.Në këtë luftë të përbashkët kundër terrorizmit, kundër antisemitizmit, radikalizmit dhe të gjithë të këqijave të botës ku jetojmë, Shqipëria qëndron e vendosur krah gjithë atyre që nuk janë gati të harrojnë mësimet e rënda të historisë dhe as të jetojnë nga e para një të kaluar që i ka kushtuar dhimbjet më të tmerrshme njerëzimit' tha kryeministri Edi Rama.

Gjatë vizitës së tij në Shtetet e Bashkuara të Amerikës, Kryeministri Edi Rama, mori pjesë në eventin e organizuar nga organizatat hebreje të titulluar  “Bridging Nations: A Tribute to Prime Minister Edi Rama at the UN General Assembly”  për kontributin dhe vlerësimin e Shqipërisë dhënë për strehimin dhe mbrotjen e Hebrenjve. 

Gjatë fjalës së tij Rama krahasoi Hamasin me xhelatin e përditshëm të popullit të vet

“Terroristët kanë monumentet e tyre. 11 shtatori, 7 tetori, por nuk duhet të kenë kurrë fitore kundër njerëzimit tonë të përbashkët.  Po, mund të gjenden plot arsye për të kritikuar Izraelin në luftën e tij në Gaza, por asnjë nga ata që përkrahin lirinë e demokracinë nuk duhet të harrojë se Hamasi përfaqëson një prej shëmbëlltyrave më të këqija antidemokratike të kësaj bote. Pra, ajo që u duhet thënë shumë prej atyre që e quajnë Gazën burg në ajër të pastër është se gardiani i të burgosurve brenda atij burgu është Hamasi, jo Izraeli.

Nëse Hamasi do të ishte një forcë e zgjedhur e cila, në vend të kërkonte shkatërrimin e Izraelit me mbështetjen e Iranit, do të kërkonte lirinë dhe prosperitetin e popullit të tij përmes rendit demokratik, do të isha i pari që do të thoja se Izraeli është gabim dhe duhet të ndalet e të trajtohet si agresor kundër një fqinji që kërkon paqe. Por edhe pse vuaj si çdo qenie tjetër njerëzore dëshmitare e asaj çfarë po ndodh në Gaza,  e kam të pamundur t’i jap edhe fijen e mundësisë për t’i besuar Hamasit, që është xhelati i përditshëm i popullit të vet qysh prej shumë viteve në pushtet, në luftën kundër të cilit, sinqerisht, nuk gjej asgjë fisnike më shumë sesa gjej në luftën e ISIS-it apo të nazizmit kundër njerëzimit" u shpreh Rama.

Shqipëria është pro armëpushimit të menjëhershëm me kusht lirimin e të gjitha pengjeve izraelite si dhe përkrah zgjidhjen me dy shtete si e vetmja rrugë përpara drejt një paqeje afatgjatë, por pa Hamasin dhe të ketë një përfaqësim të besueshëm politik të mbështetur nga të gjitha vendet arabe për palën palestineze. 

“Për fat të keq, asnjë nuk ka shpikur ende një metodë mposhtjeje të dhunës për vetëmbrojtje pa forcë dhe, sërish, ne, sigurisht, jemi mjaft të vetëdijshëm se ajo çfarë po ndodh në territoret ku jetojnë populli i Izraelit dhe populli i Palestinës është diçka që duhet të marrë fund sa më shpejt të jetë e mundur.

Shqipëria ka votuar më shumë se njëherë në Kombet e Bashkuara pro armëpushimit të menjëhershëm, por, ndërkohë, nuk kemi dyshuar kurrë që një armëpushim i cili nuk përfshin lirimin e të gjitha pengjeve nuk është veçse inkurajim për Hamasin. Po kështu, ne kemi përkrahur prej një kohe të gjatë dhe përkrahim vendosmërisht zgjidhjen me dy shtete si e vetmja rrugë përpara drejt një paqeje afatgjatë, por, për ne, kjo do të thotë që Hamasi duhet të dalë jashtë loje dhe të ketë një përfaqësim të besueshëm politik të mbështetur nga të gjitha vendet arabe për palën palestineze"

Zgjidhja me dy shtete që do të sillte një shtet të pavarur palestinez, të krijuar përkrah shtetit ekzistues të Izraelit  është qëndrim zyrtar edhe i Kombeve të Bashkuara. 

Më tej në fjalimin e tij të gjatë Rama ishte i qartë kur theksoi se Shqipëria kërkon të forcojë lidhjet me Izraelin

Ne duam lidhje më të forta me Izraelin" theksoi Rama. 

Marrëdhënie të cilat u forcuan dhe me vizitën e presidentit izraelit javën e kaluar në Tiranë. Zoti Isaac Herzog është presidenti i parë izraelit në histori që vizitoi Shqipërinë. Gjatë qëndrimit në Shqipëri vec presidentit Bajram Begaj dhe kryeministrit Rama, Herzog vendosi një kurorë në Memorialin e Holokaustit në Tiranë si dhe pati një takim bashkë me drejtuesit fetarë.

Rama tregoi dhe historinë e studiuesit hebre

"Më treguan një histori të shkruar të një studiuesi të ri hebre, i quajtur Theo Canter, i cili kish vizituar së fundmi Muzeun e Solomonit në qytetin e lashtë të Beratit, trashëgimi e mbrojtur nga UNESCO. Dhe la një shënim. “Këtu, isha ai hebreu greko-polak që mbante në kokë një kippah, në një kishë të vjetër shekullore bizantine, në vendin më mysliman të Europës, në islamin më laik dhe, ndoshta, në vendin më tolerant në botë. Dhe u ndjeva më i sigurt kur ecja atje, sesa në vendin tim” kujton Rama. 

Shqipëria qe vendi i parë në Europë, që, në vitin 1932, kur antisemitizmi ishte në rritje, njohu me ligj të drejtën e komunitetit hebre për të kremtuar Sabatin.

Kryeministri ndodhet në SHBA në kuadër të Asamblesë së Përgjithshme të OKB-së. Eventi Bridging Nations: A Tribute to Prime Minister Edi Rama at the UN General Assembly”, ishte dedikuar Shqipërisë dhe rolit kryesor të Kryeministrit Edi Rama në promovimin e unitetit midis vendeve të Ballkanit dhe përpjekjet e tij të përkushtuara në mbrojtjen e të drejtave dhe historive të komuniteteve pakicë, përfshirë hebrenjtë. Në këtë ceremoni kryeministri Edi Rama u nderua me çmimin Global për udhëheqje CAM.

Rendit zhvillimet sipas orarit:

Të Fundit Të Parat

SI.E./Shqiptarja.com

TAG:
• Isaac Herzog
• lufta ne rripin e gazes
• edi rama