Lufta në Ukrainë/ A mund të presim që të fillojnë bisedimet e paqes?

Çfarë do të thotë kur Presidenti i SHBA Joe Biden shprehet se është i gatshëm të ulet me Vladimir Putinin "për të parë se çfarë ka në mendje”,  apo kur kancelari gjerman Olaf Scholz kryen një telefonatë një orëshe me liderin rus, e para e tij që nga shtatori?

Sigurisht që nuk do të thotë se bisedimet e paqes të nivelit të lartë do të fillojnë. Siç tha vetë presidenti amerikan, bisedimet për paqe mund të nisin vetëm kur lideri rus të tregojë se është i gatshëm t'i japë fund luftës në Ukrainë. Kjo është diçka që nuk ka ndodhur ende.

Por, ndërsa lufta zvarritet në muajin e saj të nëntë dhe fillon dimri i hidhur i Ukrainës, duke rritur perspektivën për më shumë vdekje, shkatërrim dhe mjerim, vazhdon të ngrihet pyetja se kur duhet të fillojnë bisedimet e paqes. Vërejtjet e fundit nga Gjenerali Mark Milley, kryetar i Shefave të Shtabit të Përbashkët të SHBA, duke sugjeruar se duhet kapur një mundësi për të negociuar shkaktuan një stuhi spekulimesh mbi ndarjet e mundshme brenda administratës së SHBA.

Që atëherë, zyrtarët dhe udhëheqësit perëndimorë në përgjithësi kanë këmbëngulur se i takon Ukrainës të përcaktojë se kur dhe si të negociojë.

“Ne duhet të respektojmë ukrainasit për të vendosur momentin dhe kushtet në të cilat ata do të negociojnë për territorin e tyre”, tha presidenti francez Emmanuel Macron teksa qëndronte pranë zotit Biden në Shtëpinë e Bardhë.

Privatisht, zyrtarët perëndimorë këmbëngulin se koha për të biseduar nuk ka ardhur ende. Ata nuk shohin asnjë tregues nga Moska për një dëshirë serioze për të zhvilluar negociata kuptimplota. Rusia po përballet me sfida të shumta sa i takon kapaciteteve ushtarake dhe Perëndimi beson se Rusia do të jetë në një pozitë më të dobët në muajt e ardhshëm sesa tani.

"Do të ketë një moment, por tani nuk është koha e duhur", ishte mënyra sesi një diplomat i lartë perëndimor e tha së fundmi.

Tani për tani, tha ai, puna e Perëndimit është të vazhdojë të mbështesë Ukrainën ushtarakisht "për ta vendosur atë në pozitën më të mirë, kurdoherë që të jetë kjo". Zyrtarët ngurrojnë shumë për t'u tërhequr se kur do të vijë momenti i negociatave për paqen. Por, nëse Ukraina vazhdon të rifitojë territorin në muajt e ardhshëm, debati do të bëhet më i mprehtë: sa larg janë aleatët perëndimorë të Ukrainës të përgatitur për të mbështetur qëllimet e luftës së Kievit?

Thënë troç, kthimi në vijën e frontit që ekzistonte më 24 shkurt, kur Rusia nisi pushtimin e saj të plotë, është një gjë. Inkurajimi i Ukrainës për të shkuar përtej tyre, për të rimarrë zonat e pushtuara nga Rusia në 2014 - Krimenë dhe pjesë të mëdha të Donbasit - është një tjetër. Por, pavarësisht nga të gjitha bisedat se kur dhe si duhet të fillojnë bisedimet e paqes, ne ende duket se jemi shumë larg nga një zgjidhje diplomatike e luftës në Ukrainë.

SI.E./Shqiptarja.com

TAG:
• lufta ne ukraine
• Rusi
• ukraine