Lufta/ Zbulohen 200 varre masive në Mariupol! Rusia: 1 viktimë dhe 27 të zhdukur nga fundosja e anijes 'Moskva'! Sekretari i Përgjithshëm i OKB takim me Putin më 26 prill

Në rajonin e Kharkiv, policia ukrainase gjeti trupat e djegur të dy banorëve të Izyumit, një gruaje dhe një burri, të cilët fillimisht u torturuan nga rusët dhe më pas u dogjën të gjallë. Këtë e raporton Ukrainska Pravda, duke cituar zyrën e prokurorit rajonal të Kharkiv.

Për episodin u hap procedimi me nenin për shkeljen e ligjeve të luftës. Hetimi për momentin është kryer nga policia por që më pas do t'i transmetohet shërbimit të sigurisë të Ukrainës, nënvizojnë mediat ukrainase.

Një tjetër varr masiv thuhet se u zbulua në Mariupol, sipas një këshilltari të kryebashkiakut, Petro Andriushchenko.

“Kemi marrë lajmin për një varr masiv të banorëve të Mariupolit, të gërmuar në përpjekje për të fshehur pasojat e krimeve të luftës. Ndodhet në rrethin Livoberezhnyi pranë varrezave të bashkisë Vynohradne. Kjo konfirmon më tej se pushtuesit po kryejnë varrimin dhe djegien masive të banorëve të Mariupolit të vdekur në të gjitha rrethet e qytetit, "tha Andriushchenko në Telegram sipas Ukrinform.

Këshilltari publikoi gjithashtu një imazh satelitor që tregon zonën e varrit masiv.

 "Imazhet satelitore të marra nga Planet më 20 prill tregojnë një varr masiv 45 metra të gjatë dhe 25 metra të gjerë. Të paktën 1000 banorë të Mariupolit të vrarë nga fashistët rusë mund të varrosen.”, tha ai.

Një tjetër imazh satelitor i marrë më parë tregoi zonën e gropave masive në Manush, jashtë Mariupolit, ku mund të varroseshin midis 3,000 dhe 9,000 civilë të vrarë nga trupat ruse. Sipas kryetarit të bashkisë së Mariupolit, Vadym Boychenko, më shumë se 20,000 civilë kanë vdekur në qytet që nga pushtimi, ndërsa rreth 120,000 kanë mbetur, ndërsa përpjekjet për evakuim po vazhdojnë ngadalë.

Kryeministri italian Mario Draghi po shqyrton që të kryejë një vizitë Ukrainë dhe të takohet ballë për ballë me presidentin ukrainas Volosymyyr Zelensky.

Aktualisht Draghi është me i izoluar pasi është i infektuar me COVID. Për momentin nuk ka ende asgjë të planifikuar, por vizita pritet të vendoset sëshpejti, para udhëtimit për në SHBA të planifikuar rreth mesit të majit.

Rusia ka dhënë një numër të ri të viktimave dhe të të zhdukurve në fundosjen e anijes kruyesore të flotës ruse në Detin e Zi 'Moskva'. Sipas Ministrisë së Mbrojtjes në Moskë, një marinar vdiq dhe 27 të tjerë u zhdukën.

Kancelari gjerman Olaf Scholz gjatë një interviste për gazetën gjermane Der Explanel është shprehur se embargoja për gazin rus nuk do i jepte fund luftës së Rusisë në Ukrainë.

"Ka të bëjë me shmangien e një krize dramatike ekonomike dhe humbjen e miliona vendeve të punës dhe fabrikave që nuk do t'i hapnin më kurrë dyert. Nëse Putini do të ishte i hapur për të folur për çështje ekonomike, ai kurrë nuk do ta kishte nisur këtë luftë të çmendur”, tha Scholz.

BE po përgatitet të zbatojë paketën e gjashtë të sanksioneve kundër Moskës javën e ardhshme. Masat e reja mund të përmbajnë ndalimin e importit të naftës, edhe nëse po punohet për modalitetet. Gjithashtu është planifikuar zgjerimi i listës së bankave ruse të përjashtuara nga sistemi Swift.

Një kukull e mbushur me eksploziv, një tullumbace me një vrimë në të për të vendosur fitilin e dinamitit... Së bashku me tmerret e varrezave masive dhe torturave, ushtarët rusë që largohen nga qytetet në Ukrainën perëndimore dhe veriore lejnë gjithashtu mjete të reja vdekjeje, të kamufluara për të synuar më të pambrojturit: fëmijët. Kjo është denoncuar nga Anton Gerashchenko, këshilltar i Ministrisë së Brendshme të Kievit.

"Okupatorët tani po veprojnë sipas një parimi të ngjashëm me atë të aplikuar tashmë në të kaluarën, duke lënë pas 'surpriza vdekjeprurëse' në shtëpitë e civilëve. Cinizmi i racistëve është befasues: ata fshehin mina dhe objekte shpërthyese në lodrat e fëmijëve, librat dhe sendet shtëpiake. Banorët e dinë mirë se fëmija, kur kthehet në shtëpi , do të mbledhë në radhë të parë lodrën e tij”, shkruan ai.

Sekretari i Përgjithshëm i Kombeve të Bashkuara do të takohet me presidentin rus Vladimir Putin të martën në Moskë. Lajmi është bërë me dije nga Kremlini.

António Guterres do të ketë edhe një takim pune dhe drekë me ministrin e Jashtëm Sergei Lavrov.

Bombardimet ruse në Ukrainë vijojnë, ndërsa Shtete e Bashkuara kanë thirrur në një takim sërish aleatët. Takimi do të mbahet të martën më 26 prill në bazën ajrore amerikane Ramstein në Gjermani. Data e takimit u njoftua nga sekretari amerikan i mbrojtjes Lloyd J. Austin, i cili ftoi kolegët e tij dhe udhëheqësit ushtarakë të vendeve aleate në mbarë botën për të diskutuar mbi zhvillimet e krizës në Ukrainë dhe çështjet e sigurisë që lidhen me të.

Kryeministri i PD, Boris Johnson ka deklaruar sot se lufta në Ukrainë mund të zgjasë deri në fund të vitit të ardhshëm.

"Putini ka një ushtri të madhe. Ai ka një pozicion shumë të vështirë politik, sepse ka bërë një gabim katastrofik. E vetmja mundësi që ai tani ka, me të vërtetë, është të vazhdojë të përpiqet të përdorë qasjen e tij të tmerrshme, të ashpër të drejtuar nga artileria, duke u përpjekur të shkatërrojë ukrainasit", u shpreh ai.

Kryeministri i Mbretërisë së Bashkuar shton se "pa marrë parasysh" epërsinë ushtarake që Vladimir Putin mund të jetë në gjendje të sjellë gjatë muajve të ardhshëm "ai nuk do të jetë në gjendje të pushtojë frymën e popullit ukrainas".

Lufta në Ukrainë do të ketë pasoja të rënda ekonomike për Evropën, pasi erdhi në një moment kur ende nuk ishim rimëkëmbur nga pandemia.  Kështu deklaroi Fondi Monetar Ndërkombëtar, duke nënvizuar se me luftën janë shfaqur rreziqe të reja.

“Më shqetësuesja është ndalimi i papritur i rrjedhës së energjisë nga Rusia, që do të shkaktonte humbje të konsiderueshme për shumë ekonomi", tha FMN.

"Bisedimet ruso-ukrainase kanë ngecur," tha ministri i jashtëm rus Serghei Lavrov, cituar nga Tass.

Ai sqaroi se arsyeja e ngecjes së negociatave erdhi si pasojë e mospërgjigjes nga Kievi lidhur me propozimet ruse. Sipas tij Kievi po jep përshtypjen sikur nuk ka nevojë për të negociuar me Rusinë dhe se ka “pranuar fatin e tij”.

Lavrov theksoi gjithashtu se shqetësimi i Perëndimit është i dukshëm.

Një autobusë plot me civilë është qëlluar nga rusët, teksa po evakuoheshin nga Popasna, një qytet i vendosur në rajonin e Luganskut.

Lajmin e ka bërë me dije nga Ukrinform.

Presidenti i Këshillit të BE-së, Charles Michel ka zhvilluar një bisedë telefonike me presidentin rus Vladimir Putin duke i kërkuar që të hapen korridoret humanitare nga Mariupoli me rastin e Pashkëve Ortodokse.

Me anë të një postimi në Twitter, Michel shkruan:

“Kam kërkuar hapjen e menjëhershme të korridoreve humanitare nga Mariupoli dhe qytetet e rrethuara, veçanërisht me rastin e Pashkëve Ortodokse”.

Mediat e huaja raportojnë se gjatë bisedës, Michel i ka kërkuar Putinit që të flasë drejtpërdrejtë me presidentin ukrainas Volodymyr Zelensky për luftën në Ukrainë.

BE dhe SHBA "vazhdojnë t'i kujtojnë Kinës nevojën për të mos anashkaluar dhe dobësuar sanksionet kundër Rusisë dhe për të mos ofruar asnjë mbështetje për agresionin rus kundër Ukrainës. Ata përsërisin se çdo mbështetje nga Kina mund të ketë pasoja në marrëdhëniet me BE-në, respektivisht dhe SHBA-së”, është theksuar në deklaratën e përbashkët të BE-së dhe SHBA-së pas takimit të Sekretarit të Përgjithshëm të Shërbimit Evropian të Veprimit të Jashtëm Stefano Sannino dhe Zëvendës Sekretarit të Shtetit të SHBA-së, Wendy Sherman. “Partneriteti mes BE-së dhe SHBA-së ka një forcë unike strategjike”, nënvizoi Sannino në një konferencë për shtyp.

Trupat ruse, ‘që nga fillimi i fazës së dytë’ të pushtimit të Ukrainës ‘i cili filloi dy ditë më parë’, synojnë ‘të marrin kontrollin e plotë të Donbasit dhe Ukrainës jugore’. Kjo për të siguruar "hapjen e një korridori tokësor drejt Krimesë", gadishulli në Detin e Zi që Moska në të vërtetë aneksoi në 2014 pas një pushtimi të ushtrisë ruse, duke shkelur të drejtën ndërkombëtare! Këtë e deklaroi komandanti i përkohshëm i Qarkut Qendror Ushtarak Rus, Rustam Minnekayev, raporton Interfax.

Ukrainasit po vazhdojnë të rezistojnë në qytetin e rrethuar të Mariupolit. Kështu ka deklaruar sot presidenti i Ukrainës, Volodymyr Zelensky. Ai hodhi poshtë pretendimet e Rusisë se kanë “çliruar” këtë qytet-port në Detin e Zi, pas pothuajse dy muajsh të bombardimeve intensive që kanë shkaktuar mijëra vdekje dhe shkatërrim të madh.

Dje presidenti rus, Vladimir Putin, pretendoi se forcat ruse kanë “çliruar” Mariupolin dhe urdhëroi që të ndërpritej plani për sulmimin e fabrikës së hekurit dhe çelikut Azovstal, ku mijëra ushtarë ukrainas, së bashku me qindra civilë, janë të vendosur. Në vend të sulmit, Putin urdhëroi forcat ruse që ta rrethonin Azovstalin aq shumë “sa as mizat të mos mund të fluturojnë jashtë tij”, duke argumentuar se “nuk ka nevojë” që të rrezikohet jeta e ushtarëve rusë.

Por, Zelensky tha se luftimet po vazhdojnë.

“Në jug dhe lindje të vendit tonë, pushtuesit po vazhdojnë gjithçka për të pasur arsye që të flasin për të paktën disa fitore. Ata vetëm mund ta vonojnë të pashmangshme – kohën kur pushtuesit duhet të largohen nga territori ynë, në veçanti në Mariupol, një qytet që vazhdon t’i rezistojë Rusisë, pavarësisht gjithçkaje që thonë pushtuesit”, tha ai.

Një aeroplan ukrainas është rrëzuar gjatë një “fluturimi teknik” në jug të Ukrainës dhe ka viktima, thanë autoritetet lokale.

Avioni AN-26, një avion transporti ushtarak i drejtuar nga forcat e armatosura ukrainase, u rrëzua të premten në mëngjes në rrethin Vilnia në rajonin e Zaporizhzhia.

Informacionet i ka dhënë administrata ushtarake rajonale e Zaporizhzhia. Rrethanat e rrëzimit janë duke u verifikuar dhe do të ketë më shumë informacion më vonë.

Marrëdhëniet me Patriarkun e Moskës janë "shumë të mira", por "më vjen keq që Vatikanit i është dashur të pezullojë një takim të dytë me Patriarkun Kirill, të cilin e kishim planifikuar për në qershor në Jerusalem".

Kështu Papa Françesku në një intervistë për gazetën argjentinase La Nacion.

“Por diplomacia jonë e ka kuptuar se një takim mes neve në këtë moment mund të krijojë shumë konfuzion”, tha ai.

‘Për shkak të rrezikut në rrugë, sot në Ukrainë nuk do të ketë korridore humanitare’. Këtë e bëri të ditur zëvendëskryeministrja ukrainase Iryna Vereshchuk në Telegram, e cila gjithashtu bëri një apel për "të gjithë ata që presin evakuimin: jini të durueshëm, ju lutemi prisni!".

Faqja e lajmeve pro-Kremlinit Readovka postoi njoftimin, të bërë nga Ministria e Mbrojtjes së Moskës, se 13,414 ushtarë rusë u vranë dhe 7,000 të tjerë u zhdukën në Ukrainë: informacion që pas një kohe të shkurtër u fshi dhe u hoq nga interneti. Kështu shkruan faqja opozitare bjelloruse Nexta.tv. Nexta publikon një pamje të postimit (të supozuar) të Readovka-s me një foto të zëdhënësit të mbrojtjes ruse Igor Koneshenkov.

‘Në një konferencë të mbyllur, Ministria ruse e Mbrojtjes njoftoi të dhëna për humbjet gjatë një operacioni special në territorin e Ukrainës. Humbjet e pakthyeshme nga pala ruse arrijnë në 13.414 ushtarë. Rreth 7000 persona të tjerë konsiderohen të zhdukur. Po ashtu u njoftuan edhe shifrat për humbjet në kryqëzorin Moskva, ku është konfirmuar se kanë vdekur 116 persona, ndërsa më shumë se 100 të tjerë konsiderohen të zhdukur.  Zëvendësministri i Mbrojtjes vuri në dukje se për momentin llogaritja e numrit të të vdekurve është e vështirë për shkak të intensitetit të armiqësive dhe paarritshmërisë për trupat në fushën e betejës.- thuhet në njoftimin që u fshi nga media pro Kremlinit.

‘Beteja e Kievit ishte një fitore historike për ukrainasit. Ishte një fitore për lirinë e arritur nga populli ukrainas me ndihmë nga Shtetet e Bashkuara dhe aleatët tanë." Presidenti amerikan, Joe Biden shkroi në Twitter, duke theksuar se "përpjekja e vazhdueshme dhe e koordinuar e komunitetit ndërkombëtar, e udhëhequr dhe e ndihmuar nga Shtetet e Bashkuara, është një arsye e rëndësishme pse Ukraina ishte në gjendje të pengonte Rusinë të pushtonte vendin".

Presidenti ukrainas Volodymyr Zelensky ka akuzuar Rusinë se po të përpiqet të mbajë një referendum të rremë për të shpallur pavarësinë në rajonet Kherson dhe Zaporizhia.

Në një video mesazh, Zelensky u kërkoi banorëve të zonave të pushtuara nga forcat ruse që të mos japin asnjë të dhënë personale.

"Nuk ka të bëjë vetëm me regjistrimin, por nuk duhet t'i jepni asnjë lloj ndihme. Në të vërtetë ka të bëjë me falsifikimin e një të ashtuquajturi referendum për tokën tuaj, ndërsa urdhri për organizimin e kësaj 'komedie' vjen nga Moska", tha Zelensky.

Shtetet e Bashkuara janë në kontakt me Prokuroren e Përgjithshme të Ukrainës, Irina Venediktova dhe po bashkëpunojnë në hetimin e krimeve të luftës të kryera nga Rusia në Ukrainë. Kështu deklaroi ministri amerikan i Drejtësisë, Merrick Garland.