Sekretari i Marinës së Shteteve të Bashkuara, John Phelan, është shkarkuar nga detyra pas disa muajsh tensionesh me kreun e Pentagonit, Pete Hegseth. Lajmi është bërë i ditur nga mediat amerikane, të cilat raportojnë se në qendër të përplasjes kanë qenë marrëdhëniet e afërta të Phelan me presidentin Donald Trump.

Sipas raportimeve, Phelan komunikonte shpesh drejtpërdrejt me Trump dhe e takonte atë në rezidencën Mar-a-Lago, duke i propozuar personalisht plane për modernizimin e flotës detare, pa kaluar përmes Pentagonit. Kjo lëvizje ka shkaktuar pakënaqësi tek Hegseth, i cili nuk e ka pritur mirë anashkalimin.

Ndërkohë, Pentagoni konfirmoi largimin e Phelan nga detyra me efekt të menjëhershëm, pa dhënë shpjegime zyrtare për arsyet. Ai konsiderohej zyrtari civil më i lartë në Marinën Amerikane. Përkohësisht, detyrën do ta marrë zëvendësi i tij, Hung Cao.

Nga ana tjetër, Marina e Gardës Revolucionare Iraniane ka njoftuar sekuestrimin e dy anijeve në Ngushtica e Hormuzit, duke i akuzuar për shkelje të rregullave të lundrimit. Sipas autoriteteve iraniane, bëhet fjalë për anijet “Msc Francesca”, e cilësuar si e lidhur me Izraelin, dhe “Epaminodes”, e cila dyshohet se ka tentuar të largohet nga ngushtica pa autorizim dhe ka manipuluar sistemet e navigimit, duke rrezikuar sigurinë detare.

Të dyja anijet janë shoqëruar në ujërat territoriale iraniane, ku do t’i nënshtrohen kontrolleve të ngarkesës dhe dokumentacionit.

Në të njëjtën kohë, zëdhënësja e Shtëpisë së Bardhë, Karoline Leavitt, deklaroi se nuk ka një afat të përcaktuar për një armëpushim dhe se çdo vendim për kohëzgjatjen e tij do të merret nga vetë presidenti Trump. Ajo e cilësoi si të pasaktë hipotezën për një armëpushim të kufizuar në 3 deri në 5 ditë.

lajm në përditësim...

Rendit zhvillimet sipas orarit:
Ora 09:02
Vijojnë përpjekjet diplomatike për negociata me Iranin, ministri i Brendshëm i Pakistanit takohet me ambasadoren e SHBA-së

Ministri i Brendshëm i Pakistanit, Mohsin Naqvi, u takua me ambasadoren e SHBA-së, Natalie Baker, për të diskutuar situatën e fundit rajonale dhe përpjekjet diplomatike për të organizuar një raund të dytë bisedimesh në Islamabad midis Iranit dhe SHBA-së, tha Ministria e Brendshme e Pakistanit në një postim në X.

Sipas ministrisë, Naqvi përgëzoi iniciativën e Presidentit Trump për të zgjatur armëpushimin me Iranin dhe theksoi nevojën për vazhdimësi në kanalet diplomatike për të arritur një zgjidhje të qëndrueshme.

Ministri shprehu gjithashtu shpresë për "përparim pozitiv nga ana e Iranit", duke shtuar se kryeministri i Pakistanit, Shehbaz Sharif, dhe Feldmarshali Asim Munir "po bëjnë përpjekje të gjithanshme në çdo nivel për të zgjidhur çështjen".

K.B/Shqiptarja.com

Ora 08:44
Ministri i Jashtëm iranian: Pasiguria në Gjirin Persik është pasojë e agresionit të SHBA-së dhe Izraelit

Në rrënjë të "pasigurisë në Gjirin Persik dhe Ngushticën e Hormuzit" është "agresioni i Shteteve të Bashkuara dhe Izraelit". Ministri i Jashtëm iranian, Abbas Araghchi, ia përsëriti këtë të Dërguarit Special të Koresë së Jugut, Chang Byung-ha, duke denoncuar "krimet" e kryera kundër Iranit gjatë "Luftës 40-Ditore" dhe duke i kërkuar bashkësisë ndërkombëtare të marrë një qëndrim të qartë dhe të vendosur.

"Irani, si shtet bregdetar, ka marrë masa në përputhje me ligjin ndërkombëtar për të mbrojtur sigurinë dhe interesat e tij; përgjegjësia për pasojat u takon agresorëve", deklaroi Ministri i Jashtëm iranian.

Chang, nga ana e tij, theksoi nevojën për të garantuar lirinë e lundrimit dhe bëri thirrje për bashkëpunim të veçantë nga Irani për të mbrojtur sigurinë e të gjitha anijeve, përfshirë ato që mbajnë flamurin e Koresë së Jugut.

K.B/Shqiptarja.com

Ora 08:41
Irani njofton ekzekutimin e një anëtari të grupit të Muxhahedinëve

1776263899_iran.jpeg

«Sultan-Ali Shirzadi-Fakhr është ekzekutuar këtë mëngjes herët për përkatësi në organizatën terroriste» të Organizatës së Muxhahedinëve të Popullit (MEK) dhe për «bashkëpunim me shërbimet sekrete të regjimit izraelit», raporton faqja e gjyqësorit iranian Mizan.

Burri kishte jetuar për një periudhë në Spanjë, por nuk është e qartë nëse zotëronte një tjetër shtetësi përveç asaj iraniane.

Dje, Donald Trump deklaroi se, falë presioneve të tij, Irani kishte ndalur ekzekutimin e tetë grave të arrestuara për protesta kundër qeverisë. Por gjyqësori iranian e përgënjeshtroi këtë, duke i cilësuar fjalët e Presidentit si «fake neës» dhe duke theksuar se gratë nuk kishin qenë kurrë në rrezik për t’u ekzekutuar.

K.M/Shqiptarja.com