‘Luftoi si luan, por s'ia doli’, humb jetën 16-vjeçari shqiptar në Itali pas një aksidenti! La në mes ëndrrën për futbollin

ITALI- Një 16-vjeçar shqiptar ka ndërruar jetë në Itali, pasi luftoi në spital me plagët që kishte marrë pas një aksidenti rrugor. Gabriel Alibeaj kishte dalë me shokët mbrëmjen e së martës (6 shtator), por gjithçka u kthye në një tragjedi.

Ai kishte qenë bashkë me dy shokë në Villafranca di Verona, duke qeshur e duke bërë shaka, sigurisht që duhet të kenë folur për fillimin e afërt të shkollës. Për pak ditë do të fillonte vitin e tretë të gjimnazit. Ajo që duhet të ishte një mbrëmje me miq si çdo tjetër, fatkeqësisht u shndërrua në tragjedi, pikërisht në momentin e kthimit për në shtëpi.

Teksa po ktheheshin me një triçikël, Gabrieli dhe shoku i tij Xhibrili ranë në tokë. Ata u dërguan menjëherë në spital me helikopter ku u shtruan në gjendje të rëndë.

Dje kishte shpresa të forta se do të zgjohej. Ishte babai që përmes faqes së tij në Facebook u kërkoi miqve dhe të njohurve një lutje që djali i tij të zgjohej.

“Ju falënderoj të gjithëve për lutjet tuaja, tani lutemi për shpirtin e tij”, shkroi babi.

 Gabriel nuk ia doli. Luftoi si luan, i mbështetur nga familja dhe lutjet e miqve, por nuk u zgjua. Në dhimbjen më të thellë la të atin, Altinin, nënën Imeldën dhe motrën e vogël Chiara, të cilat e donin shumë.

Familjarëve u mbërritën shumë mesazhe ngushëllimi. Ata kanë jetuar në Villafranca prej shumë vitesh. Gabrieli, në veçanti, ishte një futbollist i ri premtues, ai e donte këtë sport dhe e praktikonte që në fëmijëri. Pasdite e ndante kohën mes stërvitjeve dhe ndeshjeve me miqtë.

Pak më shumë se një muaj më parë klubi Lunigiana Pontremolese 1919 kishte shkruar Fjalë entuziaste për të ardhmen e sportistit, ndër protagonistët absolutë të sezonit që sapo ka përfunduar.

”Ai do të jetë një nga yjet referencë të klubit dhe të skuadrës së zotit Giorgio Chelotti. Hajde Gabri, ne jemi krenarë dhe krenarë për ty". Kështu shkruanin në korrik. Megjithatë dje fjalët ishin shumë të ndryshme, plot dhimbje.

"Në këtë moment nuk ka fjalë për të shprehur dhimbjen që ndjejmë. Pusho në paqe Gabriel, engjëlli i vogël, biond i madh. E gjithë shoqëria, i gjithë komuniteti ynë mblidhet rreth familjes, Altinit, Imeldës. dhe Chiara e vogël. Ne nuk do t'ju harrojmë kurrë."

Edhe administrata komunale e Villafranche u trondit nga ajo që ndodhi.

“Jemi plot dhimbje dhe pa fjalë, tha i tronditur kryebashkiaku Filippo Bellesi. Familja është pjesë aktive e komunitetit tonë, shumë e njohur dhe e vlerësuar. Jemi të pikëlluar nga ajo që i ndodhi të riut Gabriel".

Kanë mbërritur dhjetëra e dhjetëra mesazhe, nga miq, sportistë të tjerë, ekipe futbolli apo njohës të thjeshtë.

"Ngushëllime, ishte një djalë i artë", ka shkruar babai i një djali tjetër

“Unë jam pranë jush me gjithë zemër, përshëndetje Gabriel i ëmbël". "Zoti të jep forcë - ka shkruar një mik i familjes.

SI.E./Shqiptarja.com

TAG:
• itali
• Gabriel Alibeaj