Manchester United ka fituar tri pikë shumë të rëndësishme në luftën për një vend në Champions League, duke mposhtur rivalin direkt të Chelsea, me rezultatin 2-1. Ishte një ndeshje spektakolare në “Old Trafford”, me të dyja skuadrat që kanë zhvilluar një ndeshje të madhe, por në fund triumfues ishin “Djajtë”.

Ishte Willian ai që zhbllokoi rezultatin për miqtë pas një aksioni personal i ndihmuar nga vizioni magjik i Eden Hazard. United reagon menjëherë dhe luan me agresivitet më të madh në sulm. Si pasojë, Romelu Lukaku, më në fund, ka shënuar golin e parë ndaj një skuadre të “Top 8” këtë sezon .

Jesse Lingard, i futur në pjesën e dytë, ka treguar klasin e tij pas krosit të Lukaku-t, duke dërguar topin në rrjetë me një goditje me kokë. Chelsea mundohet të reagojë në minutat e mbetura, por United me menaxhoi mirë ndeshjen. Një ndeshje e bukur, dhe në fund, të dy trajnerët i kanë dhënë dorën njëri-tjetrit.

Në kampionatin italian, Lazio vijon me ecurinë e saj pozitive. Në javën e 26-të të Serie A, bardhekaltrit kanë shënuar 3 gola për tri pikë në transfertë ndaj Sassuolo-s, duke fituar me rezultatin e pastër 0-3. Me këtë sukses, Lazio rimerr vendin e tretë provizorisht, duke lënë poshtë Inter dhe Roma, me këtë të fundit që ndeshet në 20:45 ndaj Milan.

Milinkoviç-Saviç ka shënuar dy gola për Lazion, të parin dhe të tretin, ndërsa të dytin e shënoi me penallti Ciro Immobile, që ngjitet në kuotën e 23 golave në Serie A, më shumë se çdokush tjetër, i ndjekur nga Icardi me 18. Ndeshjet e tjera dhanë këto rezultate: Fiorentina-Chievo 1-0, Crotone-SPAL 2-3, Sampdoria-Udinese 2-1 dhe Verona-Torino 2-1. Në 18:00, luhet Juventus-Atalanta.

d.b/shqiptarja.com