Kroacia kthen mbrapsht 3 ngarkesa me mandarina, me nivele të larta pesticidesh! Ministria e Bujqësisë: U Nisën nga Berati e Fieri, gjobit grumbulluesin

Tirane- Tre ngarkesa me mandarina me origjinë nga Shqipëria janë kthyer mbrapsh nga Kroacia, që në kufi, brenda 12 ditëve  për shkak se nga analizat kanë rezultuar  se ata përmbanin mbetje të pesticideve.

Ngarkesat janë kthyer mbrapsht gjatë periudhës 29 nëntor - 11 dhjetor 2024 pasi nga analizat ka rezultuar të jenë me pesticide.

Denoncimi fillimisht u bë nga Presidenti i Urdhrit veterinar Ervin Resuli  i cili tha se mandarinat shqiptare kishin rezultuar me pesticidin Chlorpyrifos dhe Phosmet, që shkaktojnë dëme që nga sistemi nervor e deri në kancer. 

Më pas në një reagim në orët e vona të mbrëmjes së sotme, Ministria e Bujqësisë sqaroi se bëhet fjalë për tre ngarkesa me mandarina clementine, nga fshati Gorican i Dimalit, Berat dhe fshati Mursi i Konispolit të cilat janë mbledhur nga subjektet grumbulluese ushqimore me vendndodhje në Berat dhe Fier dhe janë eksportuar.

Dy prej ngarkesave kanë mbërritur në vendin e origjinës, njëra prej tyre është asgjësuar nga fermerët, tjetra është bllokuar ndërsa ngarkesa e tretë nuk ka mbërritur. 

Në reagimin e saj ministria e Bujqësisë informon se subjektet nuk kanë detyrim ligjor të kenë fletë analizë. Në rastin e ngarkesës së parë e cila është asgjësuar subjekti eksportues kishte bërë vetë analizat në Itali e kanë rezultuar pa pesticide.

Ngarkesa tjetër gjendet aktualisht e bllokuar në subjektin grumbullues të ndodhur në Qarkun e Fierit dhe do të asgjësohet. 

Ndërsa  ngarkesa e tretë e njoftuar me mbetje mbi normë të Produkteve të Mbrojtjes së Bimëve, ende nuk ka mbërritur në Republikën e Shqipërisë.

“As kjo ngarkesë nuk ka qenë e shoqëruar me një fletë analize’ thuhet në njoftimin e ministrisë.

Lidhur me ngarkesën e pare AKU ka marrë menjëherë masa për kundravajtjet administrative të subjektit përkatës që ndodhet në Berat duke gjobitur dhe bllokuar aktivitetin e subjektit për moszbatim të legjislacionit në fuqi.

Po kështu në bashkëpunim me Autoritetin Kombëtar të Veterinarisë dhe Mbrojtjes së Bimëve po mbikqyren dhe merren masa për fermerët, të cilët kanë përdorur produkte për Mbrojtjen e Bimëve të ndaluara në Republikën e Shqipërisë.

Ministria e Bujqësisë ka njoftuar për hetimin e zinxhirit, për të identifikuar zinxhirin si është lejuar përdorimi i këtyre pesticideve.

Njoftimi i ministrise se Bujqesise

Në kuadër të transparencës për publikun Ministria e Bujqësisë dhe Zhvillimit Rural njofton konsumatorin vendas se Autoriteti Kombëtar i Ushqimit menjëherë pas marrjes së njoftimit nga Sistemi i Njoftimit të Shpejtë për Ushqim dhe për Ushqim për Kafshë – RASFF ka nisur verifikimet dhe gjurmimin nëpërmjet Drejtorive Rajonale për evidentimin dhe marrjen e masave lidhur me ngarkesat e eksportit të produktit mandarinë të kthyera mbrapsht.

Konkretisht, bëhet fjalë për tre ngarkesa me Mandarina clementine, të eksportuara nga subjektet grumbulluese ushqimore me vendndodhje në Berat dhe Fier. Dy prej ngarkesave kanë mbërritur në vendin e origjinës.

Njëra prej këtyre ngarkesave është dërguar nga AKU – Pika e Inspektimit Kufitar, në subjektin eksportues dhe ngarkesa është asgjësuar nga fermerët me adresë Fshati Gorican, Bashkia Dimal, Qarku Berat dhe Fshati Mursi, Bashkia Konispol, Qarku Vlorë. Pas gjurmimit dhe marrjes së informacionit shoqërues, sqarojmë se analizimi laboratorik me Nr. 24112916.001, në datën 14.11.2024 me qëllim autokontrollin nga ana e subjektit eksportues është kryer në një laborator në Bari të Italisë. Sipas raport provës produkti ka rezultuar konform në lidhje me nivelin e mbetjes së pesticideve.

Ngarkesa tjetër gjendet aktualisht e bllokuar në subjektin grumbullues të ndodhur në Qarkun e Fierit dhe procedura e asgjësimit të produkteve do të kryhet nga ky Operator i Biznesit Ushqimor në bashkëpunim me Drejtoritë Rajonale të Tatimeve, Autoritetit Kombëtar të Ushqimit dhe Autoritetin Kombëtar të Mjedisit. Kjo ngarkesë nuk është shoqëruar me një raport laboratorik, pasi nuk është detyrim ligjor për subjektet eksportuese, të cilat e kryejnë këtë proces ne kuadër të vetë kontrollit.

Ngarkesa e tretë e njoftuar me mbetje mbi normë të Produkteve të Mbrojtjes së Bimëve, ende nuk ka mbërritur në Republikën e Shqipërisë. As kjo ngarkesë nuk ka qenë e shoqëruar me një fletë analize.

Lidhur me ngarkesën e parë të përmëndur më sipër, bëjmë me dije se Autoriteti Kombëtar i Ushqimit ka marrë menjëherë masa për kundravajtjet administrative në subjektin përkatës që ndodhet në Berat duke gjobitur dhe bllokuar aktivitetin e subjektit për moszbatim të legjislacionit në fuqi. Në bashkëpunim me Autoritetin Kombëtar të Veterinarisë dhe Mbrojtjes së Bimëve po mbikqyren dhe merren masa për fermerët, të cilët kanë përdorur produkte për Mbrojtjen e Bimëve të ndaluara në Republikën e Shqipërisë.

Në zbatim të Vendimit të Këshillit të Ministrave 335, datë 6.6.2018 “Për miratimin e rregullave për regjistrimin, të procedurës dhe kritereve të vlerësimit të produkteve për mbrojtjen e bimëve” Ministria e Bujqësisë dhe Zhvillimit Rural përditëson listat e produkteve të lejuara sipas rekomandimeve të Rregulloreve të Bashkimit Europian. Ky rast, i cili është në kundërshtim me përcaktimet ligjore në fuqi, do të referohet pranë Institucioneve Ligjzbatuese.

Drejtoria e Përgjithshme e Autoritetit Kombëtar të Ushqimit ka marrë masa të menjëhershme duke ngritur grupe pune për analizimin, vlerësimin e situatës mbi koordinimin për ndjekjen e veprimeve proceduriale në secilën hallkë të zbatimit të kontrollit zyrtar të rastit.

Siguria ushqimore është një sfidë e përbashkët, gjejmë rastin të tërheqim vëmendjen e cdo fermri dhe prodhuesi shqiptar të përmbushin detyrimet ligjore, si dhe të respektojnë praktikat e mira të punës në gjithë zinxhirin e prodhimit në fermë duke përdorur vetëm produkte të lejuara, nën mbikqyrjen e profesionistëve dhe respektimin e kohës së karencës, për të garantuar prodhim vendas të sigurt për konsumatorin shqiptar dhe tregjet ndërkombëtare

S.G/Shqiptarja.com

TAG:
• fshati mursi
• fshati gorican
• dimal
• pesticide
• Kroaci
• aku
• Fier
• Berat
• mandarina
• konispol
• Vlore