Në Gjykatën e Posaçme Antikorrupsion (GJKKO) është zhvilluar sot seanca e radhës për ish-ministrin e Mbrojtjes Fatmir Mediu, i cili po gjykohet lidhur me masakrën e Gërdecit. Seanca e radhës u caktua më datë 22 janar.

Fatmir Mediu i ka kërkuar gjykatës kryerjen e një akti ekspertizë për ciklimin e shkresës me mbishkrimin “Për Shkëlzenin”. Bëhet fjalë për një provë të paraqitur nga SPAK, një faks i nisur në atë kohë nga ish-ministrit të Drejtësisë Aldo Bumçi në drejtim të ministrisë së Mbrojtjes, për hapjen e fabrikës së demontimit të armëve në Gërdec, shkresë e cila ka shënim emrin e Shkëlzen Berishës ‘Për Shkëlzenin', djali i kryeministrit të kohës, Sali Berisha.

Mediu dhe Bumçi pretendojnë se ajo shkresë është një mashtrim.

“Nga këqyrja me sy të lirë e përmbajtjes së dokumentit fax të sekuestruar në Ministrinë e Mbrojtjes që është në formatin A4, konstatohet se në cepin e matjë dhe të sipërm të këtij dokumenti, është vendosur shënimi “Për z. Shkëlzën Berisha”. Ky shkrim nuk është i vendosur me bojë të njomë, por nga këqyrja me sy të lirë duket se ka qenë pjesë e përmbajtjes se dokumentit që është dërguar me fax nga Ministria e Drejtësisë. Gjithashtu nga këqyrja me sy të lirë, vihet re se poshtë shënimit të mësipërm, është shkruar me stirolaps shënimi “Selimi”, thotë SPAK.

Mediu akuzohet për shpërdorim detyre, pasi, sipas SPAK, janë shkelur procedurat e ngritjes së fabrikës së demontimit në Gërdec, pranë një zone të banuar si dhe ato të municioneve. Vetë Mediu i ka kundërshtuar akuzat e ngritura dhe gjetjet e ekspertëve. Gjyqi për Mediun vijon që prej prillit 2023.

Rihapja e çështjes ndaj Mediut u vu në lëvizje pas 12 vitesh me iniciativën e familjes Durda, e një prej viktimave të shpërthimit në 15 mars 2008, në ambientet e ish “Brigadës së Tankeve”, ku humbën jetën 26 persona dhe qindra të tjerë u plagosën.

Lajmi në përditësim...