Të gjithë bizneset në bregdet që nuk do të respektojnë masat anti-covid, fillimisht do të gjobiten me 700 mijë lekë dhe më pas nëse shkelja përsëritet do të mbyllet biznesi. Kjo ka qenë thirrja që ministrja e Shëndetësisë, Manastirliu ka bërë, gjatë inspektimit të Task-Forcës anti-COVID në vijën bregdetare të Vlorës.

"Nuk ka tolerancë për askënd që shkel ligjin. Kemi miratuar përsëri disa shtesa dhe ndryshime në aktin normativ, ku kemi vendosur masa administrative të shtuara për të gjitha ato subjekte, të cilët administrojnë stacione të plazhit apo subjekte akomoduese, masën me gjobë 700 mijë lekë dhe është vendosur masa e pezullimit në rast të përsëritjes së shkeljeve”, tha Ministrja e Shëndetësisë.

Inspektorati Shtetëror Shëndetësor, në bashkëpunim me grupet e tjera të Task- Forcës kanë realizuar në total 106.117 kontrolle dhe monitorimet në terren gjatë kësaj periudhe dhe janë vendosur mbi 390 masa administrative. Duket se këto ende nuk po bindin qytetarët dhe sidomos të rinjtë ku vijojnë të argëtohen në grumbuj të pa shqetësuar dhe pa asnjë lloj mase mbrojtëse ndaj virusit, ndërsa lokalet e natës vijojnë aktivitetin e tyre dhe pse është e ndaluar.