Maturanti shqiptar triumfon me provimet, shpallet i pari në Greqi

GREQI- Rahman Lumi është maturanti shqiptar i cili ka triumfuar me provimet panhelenike në Greqi. Ai banon në Nea Mudania, Chalkidiki të Greqisë dhe kaloi i pari me 18. 640 pikë në Politeknikumin e Universitetit Aristotelio të Selanikut, në Fakultetin Inxhinieri Ndërtimi. Suksesi i jashtëzakonshëm i të riut shqiptar ka bërë bujë në median greke, pasi ka arritur thuajse të paarritshmen në sistemin grek arsimor, e veçanërisht në provimet panhelenike, të detyrueshme për të siguruar një vend në auditoret e larta shtetërore, që është shumë i komplikuar, pasi  në dy nga 5 provimet është vlerësuar me notën maksimale e tepër të rrallë 20, ndërsa në të tjerat mbi 18.5.

Rahman është shprehur me modesti në median greke se mezi pret të jetojë ëndrrën e çdo nxënësi, që nuk është tjetër veçse “jeta studentore”. Gjithashtu, ka deklaruar se ishte një vit i vështirë, me shumë sakrifica, por ja vlente mundimi. "Ishte një vit i vështirë për të fituar një garë, por në fund ishte shpërblyese, psikologjia është 70% e suksesit", thotë i riu shqiptar.

Ai ka theksuar se ndoshta do të largohet nga Greqia për një master, por ndryshe nga të rinjtë vendas që braktisën atdheun gjatë krizës, do të donte të jetonte e punonte në Greqi, vendin ku emigruan prindërit e tij, ku u rrit dhe tashmë ka shansin të realizojë gjithë ëndrrat.

/r.k./Shqiptarja.com

TAG:
• greqi
• provimet e matures
• rahman lumi
• Chalkidiki të Greqisë