Konventa Ndërkombëtare e Turizmit, Rama: Gjysma e parave të fushatës së PS për 14 majin shkojnë për mbjellje fidanësh! Komisioneri: Tërhiqni turistë duke ulur nivelin e karbonit

Kryeministri Edi Rama ka treguar sërish historinë e një zyrtari të lartë të BE që kërkoi makinë të blinduar për të ardhur në Tiranë. Në Konventën Ndërkombëtare të Turizmit që u mbajt në Tiranë, Rama tha se e kishte refuzuar që t’i jepte makinë të blinduar e njerëz të armatosur se nuk ndihej i sigurt më Shqipëri.

Rama tregon se të nesërmen i erdhi në zyrë dhe i kërkoi falje për Shqipërinë që e kishte paragjykuar.

“Disa kohë më parë, një person i rëndësishëm nga BE, nga një vend i pasur e i mirëinformuar zbriti në Tiranë. Unë isha në makinë dhe marr një mesazh nga drejtuesi i sallës së pritjes për VIP-at në aeroportin e Tiranës dhe më shkruan: “Të lutem merr në telefon, është urgjente’’. Mendova, ishte ndonjë bombë a ndonjë zjarr se pse duhet të më fliste mua? s’kishte ndodhur kurrë.

Marr në telefon dhe më thotë: “Zoti kryeministër, me vjen keq t’ju shqetësoj, por kalova të gjithë zinxhirët e hierarkisë, askush nuk mundi të ma zgjidhë problemin dhe më duhet udhëzim”.

“Cili është problemi”, - i them. Më thotë: “Kemi një person të rëndësishëm që nuk do të hyjë në Tiranë”. E pyes, “Çfarë do të thotë nuk do të hyjë në Tiranë? A ka ardhur në Tiranë”? “Po, po, ka ardhur në Tiranë, ka ardhur me një delegacion me dhjetëra njerëz, por nuk do të hyjë në Tiranë. Çfarë duhet të bëj”? “Pse”, - i them.

“Sepse nuk ndihet i sigurt dhe kërkon automjete të blinduara dhe roja të armatosura me pushkë”. Pyeta cili ishte statusi i këtij personi të rëndësishëm dhe normalisht ishte pjesë e asaj lige që duhej shoqëruar nga Garda jonë kombëtare. I thashë, “Garda jonë kombëtare do të jetë aty”. “Po, po, janë këtu”, me thotë, - “po nuk i merr seriozisht ato pistoleta që kanë, kërkon pushkë”.

I thashë, - “Mirë, i thoni zotërisë që nuk ofrojmë një shërbim të tillë kaq special kështu që mund të kthehet”. E thashë me një shqipe më të ngjyruar dhe e fika telefonin.  Pas 45 minutash më shkruan që kanë hyrë në Tiranë.

Të nesërmen në mëngjes ky zotëri vjen në zyrën time. Nuk e di nëse ai e dinte, që unë e dija tashmë ç’kishte ndodhur, por erdhi dhe gjëja e parë që më thotë ishte: “Zoti Kryeministër ju detyrohem një ndjesë”. I them, “për çfarë”?

Më thotë, “dëgjoni, kam udhëtuar në shumë vende. Jam një qytetar i botës. Kurrë, asnjëherë nuk jam gjendur në një hendek kaq të madh midis asaj që mendoja se ishte Shqipëria dhe midis asaj që shoh që Shqipëria është”. I thashë, - “Dëgjo, mos u shqetëso. U ndodh të gjithë atyre që vijnë në Shqipëri”.

Tha, “jo, jo”, dhe meqë ra fjala, nuk dua t’ju jap shumë informacion, është një socialist mysliman. E më thotë, “Meqë ra fjala, po ecja në qendër të Tiranës mbrëmë. Është kaq mbresëlënëse, është kaq europiane, është kaq mesdhetare. Ndihesh si në Itali dhe nuk pashë asnjë grua të mbuluar. A mund ta imagjinoni” - më tha mua.

I them, “po, sepse nuk ka gra të mbuluara në Shqipëri. Ka disa vajza me shall dhe natyrisht ne i shohim me shumë respekt, por nuk ka gra të mbuluara”.

“Dhe sot në mëngjes përpara se të vija tek ju”- më thotë, “shkova në Ministrinë e Brendshme dhe njerëzit flisnin anglisht. A e imagjinon dot”?

I thashë, “dëgjo, a e lëmë këtu? Do të ishte mirë që ta mbanit këtë eufori dhe entuziazëm për Shqipërinë kur të ktheheni në vendin tuaj dhe t’u thoni njerëzve tuaj atje, që Shqipëria është krejt ndryshe nga ajo çfarë mendoje”. “Sigurisht do ta bëj, do ta bëj. Do të vij me bashkëshorten, me miqtë e mi. Sigurisht”.

Dhe meqë ra fjala ai është vërtet shumë i ashpër me emigracionin. Dhe kur u kthye nuk tha absolutisht asgjë nga këto. Nuk ishte keq, por nuk ishte aspak entuziast për Shqipërinë. Thjesht informoi qytetarët e tij se na kishte thënë që duhet ta luftonim më fort krimin dhe emigracionin e paligjshë”, tha Rama.

 

Kryeministri Edi Rama ka bërë me dije se gjysma e parave të fushatës së zgjedhjeve të 14 majit do të shkojë për mbjellje të fidanëve në mënyrë që ulet niveli i karbonit.

“Jemi para zgjedhjeve dhe do të marrim vendim se duke qenë se gjysma e fushatës sonë përkon me periudhën e fundit të mbjelljeve të gjitha takimet tona e mitingjet tona do jenë vetëm për mbjellje dhe paratë e fushatave do të shkojnë për mbjellje. Mendoj që kjo do të jetë fushatë me 0 karbon për gjysmën e saj. 

Me këtë lajm që duke qenë se fushata nis me 14 prill dhe mbaron me 14 maj por duke qenë se deri në fund të prillit është koha e fundit për të mbjellë fidanë, paratë e fushatës për regjira, podiume, mitingje, mikrofona e ndotje akustike do t’i vëmë në dispozicion të fidanëve. Mbase do ta marrin edhe vendet e Europës këtë model”, tha Rama.

Mesazhi i fundit që pati ishte që të gjithë ata që vijnë një herë në Shqipëri, e kanë dëshirë për ta vizituar sërish.

“Me Shqipërinë ka një gjë që s’duhet ta harroni, është një vend ku s’duhet të shkoni kurrë se mund të vidheni, rrëmbeheni dhe shumë gjëra të tjera mund të ndodhin. Por nëse do të doni të shkoni njëherë, do të doni të ktheheni”, tha Rama.

Kryeministri Rama tha se në vitet ’90 ai ka aplikuar për një vizë britanike, por është refuzuar. Sipas tij për këtë ngjarje, i nxitur nga miku që e  kishte ftuar në Britani, kryeministri ka shkruar një artikull për “The guardian”, ku për herë të parë është njohur  me median e lirë.

“Aplikova për një vizë britanike, m’u refuzoi, miku që më ftoi u zemërua dhe më tha pse nuk shkruan një artikull në The Guardian, unë e shkrova për këtë përvojë, atë kohë Britania ishte në BE dhe e dërgoj, u ktheva shomë vonë në shtëpi dhe atëherë nuk kishte celular, kisha një sekretari telefonike dhe një grua më tha që “po ju marrim nga The Guardian dhe duam të flasim me ju”. Së pari titulli dhe së dyti, për dicka brenda lajmit që keni trajtuar. Ajo propozoi një titull që është shumë në rregull dhe kishte dicka shumë për ta ndryshuar në artikull, i thashë pse doni që unë të miratoja këto gjëra, ajo kuptoi që unë isha ai barbari që sapo kisha marrë lirinë dhe më tha kjo është bota demokratike. Disa muaj më pas marrë nga e njëjta gazetë, një artikull të gjatë për Tiranën që duhej botuar “si parajsa e pastrimit të parave”, nuk e di me sa pasaktësi dhe informacion të rremë dhe më kërkuar me mirësjellje nëse kryeministri donte të përfshinte një fjali. Zyra ime u tha jemi gati të flasë se ka shumë pasaktësi dhe dërguam një listë të tërë faktesh, me referenca dhe përgjigja ishte shumë interesante, por do jetë për një kohë tjetër sepse artikulli duhet botuar në orën 12:00 dhe kjo pjesë u botua në gazetë pa asnjë kontroll faktesh dhe pa asnjë të drejtë përgjigje. Duam të mendojmë se civilizimi ynë po evoluon për më mirë”, tha Rama.

Zëvendëspresidenti Ekzekutiv i Komisionit Europian, Frans Timmermans ka dhënë disa sugjerime për Shqipërinë që të tërheqë markë të re turistësh duke e kthyer vendin në më të përgjegjshmin ndaj turizmit.

“Shqipëria në një të ardhme të afër do të bëhet anëtare e BE. Puna ime kryesore është ta vendos Evropën në drejtimin e të bëhet neutral në 2030. Kemi pasur shumë programe. Duhet të punojmë mjaft ngushtë me partnerët në mbarë botën për të arritur sukses. Vendi ku jemi sot ka disa nga plazhet më të mira. Keni mundësi të bëni zgjedhje të reja. Keni disa prej maleve më të bukura që keni parë ndonjëherë.

Shqipëria e ka këtë mundësi dhe inkurajoj autoritetet shqiptare t’i zhvillojnë. Keni shumë për të ofruar. Ndoshta s’do jeni luksoze se ka vende që ndërtojnë industri luksoze, por mund të jeni vendi më i ndërgjegjshëm ndaj turizmit, mund të tërhiqni markë të re turistësh. Kjo është një mundësi për Shqipërinë. Të ulim gjurmën e karbonit. 17% shkaktohet nga udhëtimi. Të punojmë me industrinë ajrore. Duhet të kemi një ide më modulare. Mund të bëjmë diçka me trenat nëse fusim trenat e natës, ndoshta të përdorim biçikletat. Çfarë nuk duhet bërë është të thuash që s’duhet të udhëtoni se ndikon në klimë, por duhet të udhëtoni në mënyrë të ndërgjegjshme.

Ndërgjegjësimi vjen edhe për të tjerët, kjo është dhurata që kemi, jo thjesht të rrimë. Kjo është ajo dhuratë që duhet ta përdorim në mënyrë të mençur. Turizmi është demokratizuar.  Shqipëria mund të na tregojë markat e turizmit dhe Komisioni Europian do të punojë me kënaqësi me ju”, tha Timmermans.

Kryeministri Edi Rama ka mirëpritur pjesëmarrësit nga 38 vende të botës në Konventën e Turizmit përmes një mesazhi ku tregon se Shqipëria nuk është ajo që lexojnë në media duke thënë se ka mbetur në të shkuarën krimi, droga, prostitucioni e mafia.

“Shtëpia e shqiptarit është e Zotit dhe e mikut. Kështu shkruan Kodi i shqiptarëve i pari ligj i shkruar i këtij vendi këtu e më shumë se 5 shekuj më parë dhe për sa kohë zoti na vjen në derë përmes atij që shfaqet në pragun e shtëpisë sonë, ky i fundit është zot shtëpie për aq kohë sa qëndron mes nesh. Miq të ardhur në 38 vende të botës, ndihuni zotër në shtëpinë tonë. Shijoni sat ë mundeni dallimin mes stereotipin e Shqipërisë në mediat tuaja dhe perceptimit të vetë shqisave tuaja për vendin krejt tjetër ku keni ardhur sot. Ky që shikoni është i vërteti ndërsa vendi i krimit, i mafies, krimit, drogës, prostitutave e plehrave, hajdutëve e lypsave është pjesërisht një vend të cilin ne e kemi lënë pas në të shkuarën dhe pjesërisht që e mban gjallë në retorikën e tyre dashakeqe dhe spekulante vendas dhe të huaj me gojën e tyre apo penën e tyre”, tha Rama.

Zurab Polikashvill, Sekretar i Përgjithshëm i Organizatës Botërore të Turizmit tha se bashkëpunimi është një pikë kyçe sa i përket turizmit, e ndërsa theksoi se fokusi do duhet të jenë angazhimi i të rinjve në këtë sektor.

“Një forum investimesh në Tiranë, për të vijuar me këto takime të rëndësishme investimesh, do vijë në kohën e duhur dhe raport i miqësisë sonë dhe partneritetit. Bashkëpunimi është kyc për të zhvilluar turizmin, Shqipëria do të rritet në përmasa dhe ndikim, pa njerëzit e duhur nuk mund të realizojmë planet tona, përparësi është edukimi, roli i të rinjve në turizëm, mbetemi të gatshëm të kontribuojmë për vitin Europian të aftësive, presim të punojmë me ju për turizmin”,  tha Zurab Polikashvill, Sekretar i Përgjithshëm i Organizatës Botërore të Turizmit.