Në vigjilje të Krishtlindjeve besimtarë katolikë u mblodhën në katedralen 'Shën Pali' në Tiranë, për të ndjekur meshën nga Imzot Arjan Dodaj.

"Netët e mbara të historisë së njerëzimit nuk janë një dritë e fortë që imponon vetë, por një dritë e butë që ndriçon rrugën e çdo njeriu. Ajo përshkon shekujt dhe arrin tek ne, këtu, sonte. Ecim me gëzim dhe shpresë përballë çdo zhgënjimi njerëzor, sikurse kemi shtegtuar në këtë vit jubilear të shpresës, sepse për ne ka lindur Shpëtimtari. Jezusi mbetet për ne gjithmonë Zoti ynë, por edhe vëllai ynë. Leximet e kësaj nate, që sapo kemi dëgjuar, na ndihmojnë të kuptojmë se Krishtlindja nuk është thjesht premtimi i një përkujtimi të një ngjarjeje të kaluar. Sot shumë njerëz përjetojnë errësirën, siç dëgjojmë dhe shohim në luftë",- tha Imzot Arjan Dodaj gjatë predikimit.

Për mikrofonin e Report Tv, besimtarët katolitikë uruan përzemërisht:

“Gjithë të mirat e Zotit i shpresojmë.”

“Ishalla merr të keqijat dhe na sjell të mirat.”

“Mbarë e mirë dhe një vit sa më i mbarë për të gjithë.”

 “Shëndet, mbarësi, lumturi.”

“Sa më shumë besim në Krisht dhe në Zot.”

Krishtlindja, festa e lindjes së Jezusit është një nga ngjarjet më të mëdha krishtere që shënon zbritjen e Perëndisë në tokë për të shpëtuar njerëzimin. Besimtarët katolikë me qirinj në duar presin mes lutjesh mbërritjen e mesnatës së 25 dhjetorit, lindjen e birit të Zotit.

Rendit zhvillimet sipas orarit:
Ora 23:34
Mesazhi nga Papa Leo XIV: Jezu Krishti, i cili lindi për ne, na sjell paqen dhe dashurinë e Zotit

1766615832_16c5830c594d3f67c20e70bf41dae667.jpg

Për herë të parë që nga zgjedhja e tij, Papa Leo XIV kremtoi Meshën e Natës së Krishtlindjes, duke sjellë jo vetëm solemnitetin e traditës, por edhe ngrohtësinë e një gjesti të sinqertë njerëzor.

Pak çaste përpara nisjes së liturgjisë brenda Bazilikës së Shën Pjetrit, Ati i Shenjtë doli papritur në Sheshin e Shën Pjetrit, duke sfiduar shiun e rrëmbyeshëm që kishte përfshirë Romën. Mijëra besimtarë, e pritën Papën me emocione dhe duartrokitje të forta.

I prekur nga ky përkushtim, Papa Leo XIV iu drejtua turmës me fjalë mirënjohjeje dhe bekimi:

“Faleminderit që erdhët, edhe në shi. Urimet më të mira për të gjithë. Le ta festojmë Krishtlindjen së bashku. Jezu Krishti, i cili lindi për ne, na sjell paqen dhe dashurinë e Zotit. Zoti ju mbroftë dhe ju bekoftë të gjitha familjet tuaja.”

Pas këtij momenti të ndjerë, Papa u drejtua drejt Bazilikës së Shën Pjetrit, ku u prit nga një atmosferë madhështore dhe thellësisht shpirtërore. Mesha e Natës së Krishtlindjes, e para e tij si Papë, u kremtua në një Bazilikë të mbushur plot besimtarë.

Hyrja e Atit të Shenjtë u shoqërua nga himni tradicional “Noel”, i interpretuar nga Kori i Kapelës Sistine. Në Altarin qendror të Rrëfimit, Papa Leo XIV kremtoi meshën së bashku me rreth 250 klerikë të lartë – kardinalë, peshkopë dhe priftërinj – duke hapur kështu ritet e një prej netëve më të shenjta të kalendarit të krishterë.

K.M/Shqiptarja.com

Ora 23:13
Mijëra besimtarë kremtojnë Krishtlindjet në rrethin e Krujës (VIDEO)

U mbajt në rrethin e Krujës mesha e Krishtlindjes ku në të gjitha kishat e këtij rrethi mijëra besimtarë kremtuan meshën e lindjes së Krishtit.

S.B/Shqiptarja.com

Ora 23:11
Besimtarët e Lushnjës festojnë Krishtlindjet në Kishën e Shën Pjetrit e Palit, Dom Gjoni drejton meshën (VIDEO)

Besimtarët katolikë të qytetit të Lushnjes kanë marrë pjesë në meshën e krishtlindjeve në kishën e shenjtëve Pjetri e Pali.

Ambjenti i jashtëm i kishës, ishte dekoruar me skenën e lindjes së Krishtit në një kasolle barinjsh mes njerëzve e kafshëve.

Meshën e shenjtë të Krishtlindjes e mbajti Dom Gjoni. Mesha tradicjonale për festën e lindjes së Hyjit, nisi me vendosjen e foshnjes në një shportëz nën këmbët e altarit të kishës.

Besimtarët dëgjuan fjalët e Ungjillit dhe u lutën për paqe e begati.

S.B/Shqiptarja.com