POP 5

Lajmet më të lexuara të 5 minutave të fundit

Ekonomi

BSH ul pas 28 muajsh normën bazë të interesit me 0.25%, Sejko: Inflacioni po bie shpejt! Ulja pritet të sjellë rritje të euros e USD

Për herë të parë pas 28 muajsh, Banka e Shqipërisë ka vendosur të ulë normën bazë të interesit me 0.25%. Guvernatorit Gent Sejko shpjegoi se shkak për këtë lehtësim është bërë rënia e inflacionit më shpejt nga sa pritej. Me këtë lëvizje pritet edhe rritja e vlerës së euros e dollarit.

Banka e Shqipërisë ka ulur normën bazë të interesit për herë të parë pas 2 vitesh e gjysmë nga 3.25% që ishte në 3%.

 Shkak për këtë lehtësim, tha guvernatori Gent Sejko është bërë rënia e inflacionit më shpejt sesa pritej.

“Inflacioni i çmimeve të konsumit shënoi një rënie të mëtejshme gjatë muajve prill dhe maj, duke regjistruar një nivel mesatar prej 2.1%. Kjo rënie ishte disi më e shpejtë se pritjet tona. Nga këndvështrimi i shportës, rënia e inflacionit u diktua nga reduktimi i shpejtë i inflacionit të artikujve ushqimorë, ndërkohë që artikujt e tjerë të shportës shfaqën norma relativisht të qëndrueshme inflacioni.”, u shpreh Sejko.

Guvernatori u ndal edhe tek luhatjet e kursit të këmbimit ku theksoi se rënia e valutave po vjen kryesisht prej shtimit të turistëve të huaj. Ndërkohë me këtë ulje të normës bazë të interesit pritet edhe një rritje e pozitave të valutave në treg, për shkak se leku bëhet më i lirë.

Në konferencë për mediat guvernatori tha se ndikim në uljen e inflacionit po jep rënia e çmimeve në tregjet ndërkombëtare, ndërkohë që inflacioni i brendshëm mbetet i qëndrueshëm për shkak të rritjes së pagave.

“Trendi rënës i inflacionit vijon të pasqyrojë në masën më të madhe reduktimin e inflacionit të importuar, në përgjigje si të një ecurie të ngjashme të këtij treguesi në partnerët tanë tregtarë, ashtu edhe të trendit forcues të kursit të këmbimit. Në veçanti, reduktimi i inflacionit të ushqimeve gjatë muajve prill – maj ishte në linjë me rënien e inflacionit të tyre në vendet e rajonit, duke sugjeruar se ky reduktim pasqyron një goditje pozitive oferte”, tha Sejko.

Banka e Shqipërisë shtyu edhe pritshmëritë për vitin 2025 në kthimin e inflacionit në 3%.

“Inflacioni parashikohet të luhatet pranë niveleve aktuale gjatë vitit 2024 dhe të kthehet gradualisht në objektiv gjatë gjysmës së parë të vitit të ardhshëm”, tha Sejko.

Këshilli Mbikëqyrës uli me 0.25% edhe normën e interesit për depozitat dhe kreditë njëditore, të cilat tashmë do të jenë përkatësisht në 2% dhe 4%.

Normat e interesit nisën të rriteshin në shkurtit të vitit 2022, kohë kur nisi kriza e çmimeve, e cila solli inflacion mbi 8%, e ndikuar kryesisht prej çmimeve të energjisë, ushqimit e karburantit.

G.K/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    16 Nëntor, 09:13

    Kush ka pension më të ulët bonus më të madh në fundvit? Si e vlerësoni?

Lajme të tjera



×

Lajmi i fundit

Zyrtari i lartë rus: Vendimi i Biden për Ukrainën mund të çojë në Luftën e Tretë Botërore

Zyrtari i lartë rus: Vendimi i Biden për Ukrainën mund të çojë në Luftën e Tretë Botërore

17 Nëntor, 22:58