Ministrat e BE-së miratojnë liberalizimin e vizave për Kosovën! Rama: BE më në fund po e heq nga vetja njollën e turpit, Prishtina trajtohej si vend jashtë Evrope

Ministrja e Jashtme Olta Xhaçka ka përshëndetur miratimin e liberalizimit të vizave për Kosovën nga Këshilli i BE.

“Mirëpresim vendimin e Këshillit të Drejtësisë dhe Punëve të Brendshme të BE që i hap rrugë liberalizimit të vizave për Kosovën. Le të shpresojmë që pas një vonese kaq të gjatë dhe të pajustifikuar procesi të përmbyllet sa më shpejt dhe qytetarët e Kosovës të mund të lëvizin lirshëm në zonën Shengen”, shkruan Xhaçka.

Presidenti Begaj ka reaguar pas vendimit të marrë nga Këshilli i Ministrave për miratimin e liberalizimit të vizave për Kosovën.

“Përshëndes hapin e rëndësishëm të ndërmarrë nga Këshilli i Bashkimit Evropian lidhur me lëvizjen e lirë, pa viza te qytetarëve të Kosovës ne hapësirën Shengen!

Uroj që ky proces të përmbyllet sa më shpejt dhe qytetarët e Kosovës të ndjehen njësoj si qytetarët e tjerë të Ballkanit Perëndimor!

Një vendim shumë i merituar!”- shkroi Begaj.

Kryeministri Rama ka reaguar pas miratimit të Këshillit të BE për liberalizimin e vizave për Kosovën.

“Një hap i vonuar padrejtësisht me vite u hodh sot nga BE-ja, e cila më në fund po e heq nga vetja njollën e turpit të trajtimit të Kosovës si të ishte një vend jashtë Europës!

Urime jo vetëm Kosovës, po edhe Bashkimit Europian”- thotë Rama.

Ministrat e Brendshëm të 27 vendeve të Bashkimit Evropian miratuan sot vendimin për liberalizimin e vizave për Kosovën në takimin e Këshillit të Punëve të Brendshme në Bruksel.