Media/ Intervista tendencioze në
TV Klan me Ina Ramën në 2012

TIRANE- Në Janar të vitit 2012, një vit pas vrasjeve të 21 Janarit, ish kryeprokurorja Ina Rama ka dhënë një intervistë për “Opinion” të gazetarit Blendi Fevziu, ku çmonton të gjithë alibitë e ish kryeministrit Sali Berisha për vrasjet e 21 Janarit dhe hedh dritë mbi atë që ndodhi. Në intervistë vihet re dhe intervista tendencioze e TV Klan me Prokurores Ina Rama në mbrojtje të Berishës. Fevziu e pyet Kryeprokuroren, kur në pushtet ishte Berisha: Pse nuk e keni thirrur në prokurori Edi Ramën? Pse deri sot akoma nuk keni hetuar asnjë përfaqësues të opozitës? Dhe për organizatorët e protestës çfarë hetimesh keni?
 
Intervista e plotë
Zonja Rama, si ka mundësi që ekspertiza e FBI-së për ngjarjet e 21-janarit, doli më parë në shtyp se sa shkoi në gjykatë?
Në lidhje me ekspertizën e FBI-së, kanë dalë të dhëna që në një farë mënyre imagjinoheshin. Sepse është proces i gjatë.
 
Por ka pasur citime në shtyp, jo hamendësime….
Ky është një shqetësim, jo më i madhi që kemi, por është një shqetësim. Për një hetim ngrihen grupe hetimore, oficerë, ekspertë dhe gazetarët janë në kërkim të informacionit. Është shqetësim dhe institucioni më i dëmtuar në këtë rast është Prokuroria e Përgjithshme, pasi rrezikohet se mund të digjen shumë hapa. Është e vështirë të identifikosh atë që e nxjerr informacionin dhe mund të them se ky është problem edhe në Shtetet e Bashkuara të Amerikës.

Pse u vonua kaq shumë hetimi për ngjarjet e 21 janarit?
Unë nuk mund të them se është vonuar shumë. Koha që ka marrë është e nevojshme për këtë hetim. Që në ditën që ndodhi ngjarja, Prokuroria e Tiranës, e gjitha, ka qenë në detyrë, për shkak të natyrës së dëmeve dhe pasojave. U ngritën disa grupe pune, për sektorë të ndryshëm. Një grup në terren, një për ekspertizë, një tjetër shoqëroi demonstruesit e dhunshëm, një tjetër për t’u marrë me anën dokumentare, etj. U pyetën shumë persona, u shqyrtuan pamjet filmike nga TV, etj. Pra, është punë voluminoze.
 
Nuk i kryenit dot vetë hetimet pa ndihmën e FBI-së?
Për vrasjet dhe serverin e Kryeministrisë, u kërkua ndihmë. Disa prej këtyre ekspertizave që na nevojiteshin, ishin të pamundura të realizoheshin në Shqipëri. Për të pastruar, për shembull, pamjet filmike është e pamundur të realizohej këtu. Ne nuk i benim dot vetë të gjitha, një pjesë po mund të realizohej, por jo e gjitha. Pati dy arsye kërkesa për ekspertizë: për besueshmëri për situatën, që u krijua në atë kohë dhe se nuk i bënim dot të gjitha.
 
Por, në fakt, ju kërkuat ndihmën e SHBA-ve për kredibilitet për Trebicken, për Gërdecin, për 21 janarin. Ku qëndron kredibiliteti i Prokurorisë së Përgjithshme, kur thërrasim gjithnjë një të tretë? 
Ne kërkojmë të rrisim kredibilitetin e hetimit. Kërkuam ndihmë për ekspertizë balistike. Për Gërdecin, kërkuam ekspertë të zjarrit. Nuk i ka prokuroria jonë ekspertë të tillë. I disponon policia shkencore. Kërkuam ekspertë për Trebickën, jo sepse laboratori jonë nuk ka mundësi, por edhe për një arsye tjetër thelbesore, sepse në të tre rastet, ishin të përfshirë njerëz që lidhen me pushtetin dhe laboratori është në varësi të Ministrisë së Brendshme.
 
Ka ardhur për 21 janarin një prokuror amerikan?
Po, ka ardhur, ka asistuar procesin.
 
Po për organizatorët, keni thirrur ekspertë të veçantë? 
Po hetohen edhe organizatorët. Por edhe për këtë pjesë, për organizatorët, i kemi kërkuar laboratorit të FBI-së ndihmë, kërkuam ekspertizë amerikane. Por nuk mund t’i kërkonim oficerit amerikan, që të pyeste protestuesit në Laç, Shkodër, etj. Hetimi po vazhdon. Kemi dyshime që kanë qenë të organizuara.
 
Hetimi i organizatorëve, nuk kishte ekspertizë, përse?  Ju kërkuat heqje imuniteti për 3 deputetë të PS-së tani, përse nuk e bëtë para një viti, kur ndërkombëtarët, Kantrimen, Ashton, cituan që në fillim: hetim gjithëpërfshirës… Përse nuk filluat hetim për 3 deputetët e PS-së apo organizatorë të tjerë? As nuk u thirrën organizatorët… 
 
Përpara se të përgjigjem, të shpjegohem si bëhet hetimi në Shqipëri. Hetimi drejtohet nga prokurorët dhe policia gjyqësore bën veprimtarinë hetimore. Me Policinë e Shtetit, ne kemi raport më të veçantë, pra nëse çështja referohet nga Policia e Shtetit, ajo ka të drejtë të bëjë veprimet që çmon të arsyeshme dhe të japë mendimin që ka. Për natyrën e çështjes në 21 janar, kemi referime nga Policia e Shtetit, i gjithë hetimi ju ngarkua Policisë së Shtetit.

Ju ngarkua me urdhra formale dhe verbale. Policia e pati gjithë kohën dhe atributet të bënte çdo veprim dhe të propozonte çdo lloj mase, ndaj kujtdo që ajo e çmonte, deputetë, etj. Sepse është proces hetimor e bazohet në fakte ndaj hetimit. Policia e Shtetit sugjeroi pezullim të hetimeve, pasi analizoi gjithçka që ka bërë. Tha se “nuk arrij dot të identifikoj organizatorët”. Ne për të garantuar hetim gjithëpërfshirës, i thamë policisë jo. Bëni hetime të tjera. Kemi bërë çdo të hënë, takim në orën 10, deri në dhjetor dhe nuk patëm konkluzion nga policia më. Edhe sot, nuk kemi as këto tre deputetë.
 
Atëherë pse kërkoni heqjen e imunitetit për tre deputetët? 
Sepse ne çmuam, se nga çfarë kemi deri më sot, kërkohen hetime të tjera dhe duhet hequr imuniteti.
 
I keni marrë parasysh deklaratat që Edi Rama, Spartak Ngjela bënë para protestave, për të vdekur…. 
Prokurorët që i trajtuan këto deklarata, nuk panë elementë të veprave penale. Për Ngjelën, është bërë një deklaratë për nxitje dhune. Por ajo, që të cilësohet e tillë, kërkon thirrje reale për individë konkretë.

Urdhri i parë, i menjëhershëm, ishte për ndalimin e gjashtë efektivëve të Gardës së Republikës. Përse u kërkua i gjithë ndalimi i zinxhirit të gardës, në të njëjtën ditë që opozita kishte paralajmëruar protesta të tjera, kishte sërish rrezik?
Të sqaroj këtë termin e zinxhirit të gardës. Këta 6 emra, nuk janë zinxhiri komandues i gardës. Sepse Garda e Republikës ka komandantë, drejtues, etj. Pra i kishte të gjithë të tjerët në funksion. Jemi në 21 janar dhe konstatuam ngjarje që kanë veprimtari kriminale. E para dhe më e rënda janë vrasjet, 3 viktima dhe një i plagosur rëndë, që vdiq më vonë. U fol për gjashtë të plagosur me armë, ndoshta dhe me shumë, gurë, mjete…
 
Që ju i quajtët ngjarje në bulevard… 
Sepse ai është vendi i ngjarjes. Ajo është rruga, elementi që identifikon vendin e ngjarjes. Është term ligjor. Pra, kishim viktima, pamë pamjet filmike, nuk ishin përdorur armë nga demonstruesit, sepse nuk kishte armë para Kryeministrisë. Prokurorët konstatuan ushtarë të gardës duke mbledhur gëzhoja. Këto të çonin se garda kishte tendencë për ta manipuluar hetimin. Nga këqyrja e vendit të ngjarjes, ne nuk gjetëm asnjë gëzhojë. Arsyetimi që bëmë ishte i tillë, kush ka qenë nga Garda e Republikës. Pamë që këta individë që nxorëm urdhër-ndalimi, ishin në krye të njësisë, nuk e dinim se kush ishin vendosur në mënyrë të posaçme. Por ata kishin marrë përsipër të kontrollonin situatën atë ditë. Duke pasur dyshime se plumbat kishin ardhur nga garda. Sepse procesi po tentohej të manipulohej, ne e pamë të arsyeshme, të pyesnim të 6 komandantët e gardës, pa u dhënë mundësi të krijonin variante të tyret, por të merrnim një rrëfim origjinal.
 
Pse nuk e çuat urdhrin në gjykatë, si bëtë me arrestimet tani? 
Urdhrat e ndalimit janë në kushte emergjence. Prokuroria e Përgjithshme përdor shpesh urdhër-ndalimi në kushte emergjence.
 
A kishte të drejtë kjo mazhorancë, që të ishte skeptike me ju, që një bisedë mes jush dhe Burgajt u konspirua nga Edi Rama, në një konferencë për shtyp? 
Në deklaratë, Edi Rama nuk i referohet bisedës time me Burgajn. Urdhrat e ndalimit u dorëzuan në Drejtorinë e Policisë, në orën 6:00 të mëngjesit atë ditë. Në orën 7:00, drejtori i kabinetit të Burgajt, telefonoi një nga zëvendësprokurorët e Tiranës dhe tha se urdhrat nuk ekzekutohen, pasi ka lapsus. Ai lapsus lidhej me faktin se brenda përmendej i njëjti emër, kur ato ishin për individë të ndryshëm. Pas kësaj, u bë diskutimi midis Prokurorisë të Tiranës dhe personelit të policisë, që nuk ekzekutonte urdhrat. Fakti që u diskutua kaq gjatë, pra në polici dhe prokurori…. Pasi nuk ekziston rast tjetër që urdhrat nuk ekzekutohen
 
A është përgjegjësia juaj nxjerrja e informacionit midis prokurorisë dhe policisë?
 Po, pse të mos jetë e policisë?
 
A keni folur me Edi Ramën atë ditë?
Nuk kam folur as atë ditë dhe asnjëherë në jetën time me Edi Ramën.
Asnjëherë?
Kurrë. Nuk kam asnjëherë bisedë telefonike.
 
Po me zotin Bamir Topi dhe a ka ndikuar ai në këtë hetim? 
Kam komunikuar ditën që ndodhi ngjarja dhe në vazhdim. Ka qenë bisedë informuese, për gjërat thelbësore. Siç kam komunikuar edhe me Ministrin e Brendshëm dhe Drejtorin e Policisë.
 
Mendoni se një grup i këtyre protestuesve ishte me axhendë politike? 
Ky është një opinion për një tryezë politike. Mua nuk më takon të mendoj, por të dyshoj dhe hetoj. Ne kemi një çështje që po hetojmë.
 
A jeni i sigurt që grupi hetimor, nuk ka qenë i motivuar politikisht për 21 janarin? 
Nuk kam asnjë të dhënë se ka qenë i motivuar politikisht.
 
Thatë se në 21 janar, u krijua përshtypje se po bëhej manipulim i ngjarjes. Dy ditë më parë, një ish-deputet i PD-së, ndërtonte një skemë tjetër, se çështja e Gërdecit shkoi në gjykatë 2 ditë para protestës, Ilir Metës ju komunikua akuza dy ditë para zgjedhjeve dhe për 21 janarin, dosja në 19 janar, dy ditë para protestës. A ka të drejtë mazhoranca t’i shohë me dyshim këto ngjarje? 

Të gjitha këto raste, Gërdeci, Meta, etj., lidhen me mbylljen e afatit të hetimeve.
 Jemi në të njëjtin argument. Për shembull, emri i Metës, u regjistrua si çështje në 9 shkurt. Afati i hetimit ishte 3-mujor. Në 9 maj, përfundonte afati. Pra, nëse në në këtë datë nuk çonim hetimin, atëherë çështja do të mbyllej. Meta u njoftua në 19 prill, erdhi përgjigjja e ekspertit britanik. E thirrën zotin Meta në datë 2 maj, që të vinte për t’ia komunikuar. Ai nuk mundi të vijë dhe më pas, u shty për në datën pesë. Ka shkresë se ai tha se kishte fushatë dhe e kishte fizikisht të pamundur. Pra, janë çështje…. Keni në dorë ekspertizën e FBI-së për 21 janarin.
 
Për serverin, u konstatua nga FBI-ja që ishte riformatuar apo nga prokurorët shqiptarë? 
Fillimisht, u konstatua në laboratorin shkencor. Shpresuam se mund të rikuperohej dhe e çuam atje me këtë shpresë, pasi ishte mundësia e vetme për të parë pamjet nga ana brenda Kryeministrisë. Kishim pamje vetëm nga jashtë. Nuk u rikuperuan dot, por u konfirmua për atë që kishte bërë laboratori, se ishte riformatuar serveri. Në 4 mars, ne u informuam për një riformatim që ju bë kamerave. Në të thuhet, se sistemi i kamerave ka qenë në punë në 21 janar, kur Kryeministria na tha se nuk ka qenë. Edhe në shkresën e kompanisë që bëri auditimin, flitet për formatim. Janë bërë 2 formatime në 21 janar, të konfirmuara. Shkresa e kompanisë konfirmoi për formatimin e orës 12 në datën 21 janar. Këtë formatim e konstaton kompania dhe nuk konstaton atë të orës 00:52, të datës 22 janar, që fshihen pamjet në server. Ne themi se është bërë për të penguar të vërtetën.
 
Ky person i akuzuar, siç thonë të dhënat, nuk merret me kamerat? 
Merret me serverin dhe është i vetmi që mund të hyjë aty. Ai pranon vetë që ka bërë formatimin e orës 12:00 të datës 21 janar, pasi duhet të ishte bosh memoria e serverit. Por nuk pranon se ka bërë formatimin e darkës. Garda përgjigjet për kamerat, por jo serverin dhe i vetmi që ka akces është ai.
 
Ju keni kërkuar akuzë vrasje me dashje në materialin në gjykatë. Jeni e bindur që është vrasje me dashje, apo tejkalim detyre? 
Kemi bindjen që është kjo vepër, derisa e kemi bërë kështu.
 
Përse është vrasje me dashje? 
Kemi konsultuar ligjin për gardën, për armët, etj., që rregullon edhe detyrat që kanë ata që ruajnë institucionet. Në to thuhet se në rast se tubimet e ligjshme kthehen në të kundërligjshme, duhet të përdoret minimumi i forcës. Nëse tentohet të hyhet në institucione, personi paralajmërohet më parë, më pas, goditet në ajër dhe në fund fare, goditet ai, nëse ka rrezik. Ne pamë nga pamjet filmike, se këta individë, pra viktimat, nuk kanë qenë në këto rrethana. Nëse do të ishin në tentativë për të hyrë apo të ishin futur në institucion, do të ishte diskutim tjetër. Ne po diskutojmë, që individët janë jashtë dhe po qëllohen. Plumbin rikoshet.
 
E keni ngritur si hipotezë, e keni marrë parasysh në rastin e viktimave? 
Në dijeninë time, është hedhur si hipotezë vetëm për viktimën e parë, Ziver Veizin. Ai që u vra te dera e Kryeministrisë. Për të u ngrit ky version, se mund të ishte rikoshet plumbi. Për të tjerë nuk kam dëgjuar.
 
Por për predhën në trupin e tij, pyetëm FBI-në dhe ata thanë se plumbi nuk ka shenja të tilla, që është rikoshet. Kur do të paraqitet akuza e plotë në gjykatë? 
Ne po punojmë që ta realizojmë atë sa më shpejt. Nuk e them dot sot, sepse ndoshta për shkak të pyetjeve të personave që po pyeten aktualisht, kërkohen veprime të tjera. Mendojmë ta mbarojmë sa më shpejt.
 
 A ndjeheni e paragjykuar nga mazhoranca në këtë hetim?
 Mazhoranca është shprehur për mosbesim.
 
Kryeministri tha se ju vetë jeni për t’u hetuar? 
E kam dëgjuar. Unë e shoh si një presion për hetimin. E vetmja frikë që ndjej si njeri dhe si Prokurore e Përgjithshme, është nga ligji. Unë i bëj gjithnjë llogaritë me ligjin, kur bëj diçka dhe them se përderisa nuk e kam shkelur atë…
 
Pse nuk e thërrisni zotin Edi Rama për këtë çështje? 
Nëse do të thirret, do të thirret jo se e kërkoj unë, por nëse e kërkon nevoja. Nëse ai ofrohet për ta dhënë dëshminë e tij, le ta japë. Mund të shkojë në prokurori dhe të deklarojë ato që di.
 
Si do procedohet me çështjen e z. Prifti? 
Nuk ka ende një veprim për mbyllje të çështjes. Por sot edhe Prifti, edhe z. Beqiri, janë marrë të dy të pandehur për çështje të korrupsionit pasiv. Ish-ministri Dritan Prifti u ka dërguar letër.
 
 Cila ka qenë brendia e saj?
 Më ka dërguar një letër, e cila është protokolluar zyrtarisht dhe është duke u trajtuar zyrtarisht. Ai aty përcjell një problematikë të karakterit penal, siç përcjell dhe një element që lidhet me sigurinë private. Unë, për këtë arsye, nuk mund ta bëj publike. Është një letër që po kalon të gjitha hallkat e prokurorisë, që duhet ta kalojnë atë.
 
Bëhet fjalë për një raport në parim apo mes jush dhe z. Prifti? 
Bëhet fjalë për një raport në parim, unë me z. Prifti nuk kam asnjë lloj çështjeje.
 
Z. Spartak Braho thotë se ka 187 orë përgjime. Çfarë do të bëjë prokuroria? 
Kjo është deklaratë e dhënë në shtyp. Ne do e konsiderojmë seriozisht dhe do thërrasim z.Braho, të na i verë në dispozicion. Nëse ai ka dijeni se në ato regjistrime ka të dhëna penale, ai ka detyrimin t’i sjellë në prokurori. Sot, unë nuk di për çfarë flitet. Nëse ka elementë penalë është detyrim i prokurorisë që të hetojë.
 
Kryeparlamentarja Topalli ka deklaruar në këtë studio se mandati juaj nuk do të përsëritet. E dini këtë gjë?
 E kam dëgjuar, por unë as nuk e aspiroj një gjë të tillë. Jam indiferente ndaj kësaj çështjeje.
 
Ka një koment që mund të jepni dorëheqjen, duke i dhënë mundësi z. Topi që të zgjedhë një kryeprokuror tjetër? 
Nuk ka ekzistuar asnjë herë kjo gjë dhe unë nuk bëj pakte të kësaj natyre. Do qëndroj deri në ditën e fundit.
 
A keni pasur presion politik? 
Nuk them që s’ka pasur presion politik. Por nëse do e vlerësonit, është i gjithë ai që është parë në media. Nuk kam pasur presione të drejtpërdrejta nga askush.
 
Si janë raportet tuaja me kryeministrin Sali Berisha?
Korrekte.
 
Paraardhësi juaj z. Sollaku, më së fundi, është aktivizuar në politikë. A e shihni veten dhe ju në politikë?
 Mua më pëlqen profesioni im. Kam investuar shumë dhe them se është gjëja që e dua më shumë. Unë preferoj të qëndroj në profesionin tim. Nuk di çfarë do të ndodhë pas 10 vjetësh.
 
Keni një plan për ditën që s’do të jeni prokurore? 
Nuk bëj dot plane.
 
Në shkurt 2011, është nisur një kallëzim penal për kryengritje nga policia dhe ende s’ka përgjigje? 
Policia e Tiranës ka bërë një referim të veprës penale, që është akti zyrtar ku ndodh një ngjarje, që njofton prokurorinë. Referimi është i pasqyruar në këtë akt. Është kjo çështje dhe është ky referimi që po hetohet. Ne kemi regjistruar një çështje penale dhe policia ka sjellë referimin. Për këtë referim është kërkuar nga policia të bëjë hetime. U kemi thënë: “merrni dhe hetoheni”.
 
Hetimi i policisë mund të fillonte nga tabulatet dhe ato nuk mund t’i merrte policia? 
Policia s’e ka thënë këtë gjë, kurrë në rrugë zyrtare. Policia nuk përcakton radhën e hetimeve, atë e përcakton prokurori. Nuk mund të nisësh nga tabulatet, kur duhet të shohësh të dhënat e prekshme. Çështjen e tabulateve nuk e ka kërkuar kurrë zyrtarisht. Edhe sot nuk thotë që i kërkon tabulatet.
 
Më informojnë se serveri nuk administrohet nga Këshilli i Ministrave?
Serveri administrohet nga Kryeministria, përndryshe pse kthen përgjigje Kryeministria kur ne e pyesim? Pse nuk thotë që kjo nuk është në administrim tonë? Ne na ka rezultuar se drejtohet nga IT-ja e Kryeministrisë. Ne s’kemi pse administrojmë çështje, atje ku nuk janë. Të na kishin sjellë një shkresë ku të na thoshin që s’varet nga ne, po nga Garda apo dikush tjetër.
 
Një deputet më shkruan në mesazh se fjala “oborr” nuk përdoret për rastet e institucioneve të veçanta? 
Mund të jetë ashtu. Nuk më duket korrekte që të merremi me definicione.
 
Ka pasur disa persona që kanë hyrë në oborr? 
I jemi referuar bulevardit, sepse ai është vendi ku janë zhvilluar ngjarjet. Nëse shkatërrohet godina, ka shkatërrim prone.
 
Po thoni që kur sulmohet një institucion shtetëror, akuza është shkatërrim prone? 
Ne kemi thënë që ka pasur tubim të paligjshëm dhe po hetojmë për këtë. Unë nuk mund të bëj akuza pa prova. Nëse duhet të bëj hetime, duhet të them se sulmi kishte këtë qëllim. Kallëzimi nuk është provë.
 
 Dyshimi juaj është për ngjarje në bulevard, nuk ka sulm ndaj institucionet?
 Ne po hetojmë për disa pista.
 
Si shpjegohet që gjatë mandatit tuaj nuk ka asnjë hetim për përfaqësues të opozitës?  Ju solla dy shembuj: raportin e z. Xhaferraj dhe denoncimin e deputetes Albana Vokshi? 

Dua të them një shpjegim të përgjithshëm. Prokuroria nuk është institucion që shkon dhe gërmon për aktivitet kriminal. Ka institucione të tjera që e informojnë. Ajo mund të marrë dijeni edhe vetë, kryesisht. Nuk ka, në kohën që unë kam qenë Prokurore e Përgjithshme, nga institucione të tjera që merren me referime ose parandalimin e krimit, ndaj opozitës. Nuk më rezulton as të jenë pushuar, në kohën time, çështje që janë referuar dhe më parë. Une nuk mund të marr përgjegjësinë për kohën që unë nuk e kam pasur këtë detyrë. Të dyja rastet janë hetuar. Ka hetim dhe për rastin e z. Xhaferri. Çështja është pushuar me vendim të Prokurorisë së Tiranës. Është hetuar gjithë raporti që përcolli komisioni parlamentar. Është konstatuar që në thelb ka pasur një konflikt interesi nga dy anëtarë të KKRT-së në procesin e dhënies së lejës. Nuk ka pasur element pasojë, pasi në kohën që është bërë hetimi, Bashkia e Tiranës kishte pezulluar dhënien e lejës së ndërtimit. Është konstatuar se ILKD-ja ka gjobitur të dy këta anëtarë të këshillit, për konflikt interesi.

Në terma ligjore do të thotë se aty nuk ka vepër penale. Sepse ILKD-ja gjobit kur nuk ka vepër penale. Për 20% e famshëm, mund ta quajmë të famshëm, është çështje që është përmendur shumë shpesh. Është regjistruar nga Prokuroria e Tiranës. Morëm spunto nga një deklaratë publike që bëri deputetja Albana Vokshi. Është bërë hetim i plotë, janë pyetur aktorët pjesëmarrës në proces, janë pyetur gjithë aktorët pjesëmarrës në proces. E para: erdhën dhe deklaruan se Dritan Avllaj ishte bërë pjesë e kontratës kundrejt investimit të tij financuar. Vokshi ka deklaruar në prokurori, ndryshe nga sa ka deklaruar në Kuvend: “ishte një perceptim politik”. Ajo ka thënë se kishte dëgjuar se ky shtetas ishte sekser i Ramës, por më pas, ishte vënë në dijeni se ky person ishte pjesë e kontratës, pra ishte aksioner dhe “gjykova që ky është këtu për shkak se është sekser i Edi Ramës”. Të gjithë të tjerët kanë deklaruar të njëjtën. Por thelbësisht, ai është futur aty me investimin e tij. Pra, po këta që kanë shtuar çështjen, e kanë përjashtuar këtë.
 
Ekspertët thonë se videoja Meta-Prifti nuk dëgjohet. Pse kërkuat dënimin e tij? 
Ekspertët e huaj nuk thonë se nuk dëgjohet. Kjo është një çështje, që nuk e kanë thënë. Nuk mund të thonë nëse dëgjojnë një fjalë shqip. Zëri dëgjohet dhe ketë e thonë edhe ekspertët shqiptarë. Nuk përcaktohet nëse dëgjohen apo jo.
 
Ju i kini thënë Parlamentit se video është bërë me orë. Në fakt, eksperti thotë regjistrimi nuk u bë me orë?
Nuk e di nëse e kam thënë këtë gjë në Parlament.
 
Për heqjen e imunitetit i është thënë Kuvendit se është regjistruar me orë? 
Unë e kam këtu kërkesën që i kam dërguar Parlamentit. Në thelb i kam thënë këtë gjë: “Sipas konkluzionit të aktit të ekspertimit, rezulton se video-regjistrimi objekt ekspertimi është i patjetërsuar, personat që jepen në video janë të patjetërsuar dhe shkalla e gabimit është zero”. Dhe ky është citim nga akti i ekspertimit që ka sjellë eksperti.
 
A ishte regjistruar në orë? 
Videoja, sipas ekspertëve, është regjistruar me orën kamera.
 
Në 6 transkripte nga prokuroria nuk përmendet as 7 % as 700-mijëshi?
 Përmendet 7 %, nuk përmendet 700-mijëshi. Ne nuk kemi thënë që zoti Meta më tha 700, sepse e kemi dëgjuar ne, por sepse e ka thënë dëshmitari z. Prifti. Kjo ka qenë baza ku e mbështetëm këtë fakt.


Shkrimi u botua në Shqiptarja.com (print) në 23 janar 2016

Redaksia Online
(d.a/shqiptarja.com)   
 

TAG:
• OSBE