Negociatorët amerikanë dhe iranianë në Nju Jork po shqyrtojnë një rrugëdaljeje nga lufta që do të përfshinte rihapjen e Ngushticës së Hormuzit nga Teherani dhe heqjen e bllokadës ekonomike ndaj Iranit nga Uashingtoni.

Ngushtica është bërë pika qendrore e negociatave në përpjekjet për t'i dhënë fund konfliktit gati shtatëmujor - me Iranin që kërkon lehtësim nga bllokada amerikane dhe Uashingtonin që kërkon kalim të lirë për anijet në rrugën globale të furnizimit me naftë, e cila tani është bllokuar nga Teherani.

Bisedimet përballen me një pengesë të madhe, pasi asnjëra palë nuk dëshiron të jetë e para që heq dorë nga ndikimi i saj, sipas dy burime iraniane, citon Reuters.

Një zyrtar i lartë iranian tha se mënyra më e besueshme për t'i dhënë fund ngërçit do të ishte një marrëveshje me faza, ku Irani do të lejonte lundrimin nëpër Hormuz në këmbim të heqjes së bllokadës ekonomike nga SHBA-të dhe Teheranit potencialisht do t'i jepte akses në asetet e ngrira.

"Një rrugë përpara do të ishte zgjidhja e krizës në faza. E para do të ishte dhënia fund e bllokadës dhe rihapja e Hormuzit", tha ai në margjinat e Asamblesë së Përgjithshme të OKB-së .

Kjo do të përfshinte pranimin e një zgjidhjeje tjetër të përkohshme nga Presidenti i SHBA-së, Donald Trump , pasi një marrëveshje e mëparshme dështoi në korrik. Pra, një sfidë qendrore me të cilën përballen negociatorët nuk është vetëm të skicojnë një marrëveshje, por edhe të sigurohen që çdo lëshim të jetë mjaftueshëm i qëndrueshëm që të dyja palët t’i besojnë, thanë burimet.

Trump ka deklaruar se SHBA-të dhe Irani mund të arrijnë një marrëveshje pas zgjedhjeve të mesit të mandatit për Kongresin më 3 nëntor. Një zyrtar i lartë evropian tha se iranianët "kanë një listë shumë të gjatë kërkesash".

Një zyrtar i Shtëpisë së Bardhë tha se ndërsa “Irani është i dëshpëruar për një marrëveshje, Presidenti Trump i ka të gjitha kartat në dorë dhe do të marrë çfarëdo vendimi që është më i miri për Shtetet e Bashkuara”.

Trump, tha ai, mbeti "i hapur për të folur me Iranin në rrethanat e duhura", por nuk kishte nevojë të negocionte, dhe SHBA-ja ishte në një "pozicion shumë të fortë" me kontrollin e Ngushticës së Hormuzit dhe një ekonomi iraniane që po "fundosej".

Zyrtari tha se "sanksionet shkatërruese" dhe "një nga bllokadat më të suksesshme në histori" e kanë paralizuar ekonominë e Iranit dhe e kanë lënë Iranin plotësisht të falimentuar.

Trump ishte i kënaqur të linte "kolapsin e pashmangshëm iranian" të zhvillohej në vend që të "luhej" nga Teherani, tha zyrtari.

Ish-negociatori amerikan Dennis Ross tha se ai shihte vetëm 30% shanse që të arrihej një marrëveshje para votimit, por se të dyja palët mund të kenë arsye më të forta për të arritur një marrëveshje para sesa pas zgjedhjeve të mesmandatit.

"Bllokada është ajo që po i shtrëngon vërtet iranianët. Po i mbyt ata", tha Ross.

Një marrëveshje para zgjedhjeve të mesmandatit mund t’i sjellë dobi Trumpit, pasi rihapja e Hormuzit mund të lehtësojë tensionet në Gjirin Persik, të përmbajë çmimet e naftës dhe të ndihmojë në uljen e çmimeve të benzinës në SHBA, të cilat janë politikisht të ndjeshme.