E bllokuar prej 11 ditësh pas rrëshqitjes masive të tokës, ka nisur qarkullimi i të gjitha mjeteve në aksin kombëtar Librazhd-Prrenjas. Sikurse shihet në pamje është një segment provizor, prej 200-300 metrash i paasfaltuar në vendin e quajtur Arrat e Rrugës, i cili do t’i japë frymëmarrje juglindjes së vendit dhe banorëve të zonës.

Segmenti provizor, kalon përmes rrugës së vjetër të shembur dhe trasesë ku po punohej për Korridorin 8 dhe do të funksionojë me sinjalistikë kantieri.

“Në kushtet optimale për aq sa mund të lejonin rrethanat. Është bërë testimi me mjete laboratorike dhe mjetet të rënda, nuk ka asnjë lloj shfaqje që ne të na shqetësojë. U bëj thirrje drejtuesve të mjeteve të tonazhit të rëndë, të respektojnë peshën e tyre në aks, që është pesha limit 8.2 tonë. Mund të krijojnë probleme, gropa. Jemi në kushte kantieri”, tha Kozeli.

Të çliruar nga mundimi i rrugëve alternative të gjata dhe të amortizuar, drejtuesit e mjeteve nuk ndalen gjatë tek siguria që ofron ky segment. Nuk mungojnë as ironitë e tyre.

“Bravo u qoftë, kantier më të madh s’kishim parë, vepër madhështore. Hallall i kanë të gjitha ato që kanë marrë dhe inshalla marrin edhe ca të tjera. Sot do ishte mirë të kishim kulaç të kishim daulle, si ajo e Qafë Plloçës që më parë u ça rruga sesa daullja. Këto 11 ditë kanë qenë bukuri fare, kemi bërë një shëtitje andej nga Spathari, nëpër ato gropat në fushën e romakëve, rruga që kanë bërë romakët ishte më e mirë se kjo që kanë bërë këta këtu”, tha një prej tyre.

“Siguri, s’e di. Për momentin mirë është”, tha një tjetër shofer.

“Kemi shpëtuar. Kemi lëvizur nga rruga e vjetër. Shumë e mundimshme, aq sa mbrëmë e lashë veturën këtu”, u shpreh një drejtues, kurse dikush tjetër tha se “është bërë punë e mirë”.

Sipas ARRSH-së, ky segment provizor do të shtrohet kur të arrihet stabiliteti i shtresave të tokës. Qarkullimi në këtë devijim provizor do të kryhet derisa të ndërtohet rruga alternative 1.3 km.

“Menjëherë do të fillojmë shkresat duke filluar nga dita e sotme. Aksi alternativ mbi lumin Shkumbin në krah të hekurudhës, 1.3 km do të kërkojë minimumi 60 ditë”, u shpreh ai.

Lëvizja, edhe pse e vështirë në këtë segment provizor, ofrohet si zgjidhje edhe për kamionët e transportit ndërkufitar që hyjnë dhe dalin nga dy pikat e kalimit kufitar, të Qafë-Thanës dhe Kapshticës. Pas situatës së krijuar me rrëshqitjet në aksin Librazhd-Prrenjas pritet të rishikohet dhe projekti i Korridorit 8, nëse do të vijojë të ndërtohet në gjurmën ku kishte nisur puna apo do të ndryshojë. 

 

 

Rendit zhvillimet sipas orarit:
Ora 15:10
Aksi provizor Librazhd-Prrenjas, qytetarët thumbojnë: Vepër madhështore, sot duhet të kishim kulaç e daulle! (VIDEO)

 

Pas 11 ditësh, më në fund aksi Librazhd-Prrenjas është zhbllokuar. Sot në orën 12:00, u hap segmenti provizor duke mundësuar kalimin e automjeteve që nuk lëviznin prej ditësh.

Megjithatë, disa drejtues mjetesh nuk e kanë kursyer ironinë.

“Bravo u qoftë, kantier më të madh s’kishim parë, vepër madhështore. Hallall i kanë të gjitha ato që kanë marrë dhe inshalla marrin edhe ca të tjera. Sot do ishte mirë të kishim kulaç, të kishim daulle, si ajo e Qafë Plloçës që më parë u ça rruga sesa daullja. Këto 11 ditë kanë qenë bukuri fare, kemi bërë një shëtitje andej nga Spathari, nëpër ato gropat në fushën e romakëve, rruga që kanë bërë romakët ishte më e mirë se kjo që kanë bërë këta këtu”, tha një prej tyre.

P.J/Shqiptarja.com

Ora 12:46
Fluks kamionësh në doganën e Bllatës, shoferët kërkojnë përshpejtim të procedurave dhe shtim të sporteleve

Në Doganën e Bllatës janë rikthyer sërish radhët e gjata me kamionë, duke krijuar vonesa dhe vështirësi për transportuesit dhe bizneset që operojnë në këtë pikë kufitare.

Sipas drejtuesve të mjeteve të tonazhit të rëndë, pritjet zgjasin me orë të tëra, ndërsa fluksi i lartë i mjeteve dhe procedurat doganore po ndikojnë në ngadalësimin e kalimit.

Situata bëhet më problematike sidomos në fundjavë dhe gjatë periudhave me qarkullim të shtuar mallrash.

Transportuesit kërkojnë përshpejtim të procedurave dhe shtim të sporteleve në mënyrë që të shmangen vonesat që sjellin kosto shtesë për kompanitë dhe ndikojnë në furnizimin e tregut.

Kjo doganë është në kufirin mes Maqedonisë së Veriut dhe Shqipërisë. Radhët e gjata në këtë doganë erdhën që prej devijimit të qarkullimit për shkak të shembjes së rrugës në Librazhd, 11 ditë më parë.

Xh.K/Shqiptarja.com

P.J/I.M/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 28 Shkurt, 17:02

    Si e vlerësoni sulmin e SHBA dhe Izraelit ndaj Iranit?

Lajme të tjera