Në seancën e parë në thëmel për 22 të pandehurit e çështjes penale “ARRSH”, të pandehurit dhe avokatët e tyre përsëritën kërkesat për formën e gjykimit.

Ish-drejtori i ARRSH-së, Evis Berberi, Gentjan Gjyli,  Erald Elezi, Ervis Lami, Brunilda Buli, Genti Raça, Artan Leskoviku, Altin Marko, Orjon Islamaj, Adrian Kroi, Bledar Aliaj, Blerta Musabelli, Kamelia Tafaj, Adela Kica, Denis Xhoxhi, Ajda Strazimiri, Gezim Noni, Shkelqim Lusha, Ela Goxhaj, Jetmira Dervishi, Valbona Pepa kërkuan përmes mbrojtësve të tyre ligjorë gjykim të shkurtuar, të cilën e kanë shprehur më herët në seancën paraprake.

Ndërsa avokati Isufi Shehu që mbron në këtë proces Valter Begajn, kërkoi ndarjen e çështjes për klientin e tij.

Ndaj të gjithë grupit janë ngritur akuzat “Shkelja e barazisë së pjesëmarrësve në tendera apo ankande publike" kryer ne bashkepunim, “Korrupsoni pasiv i personave që ushtrojnë funksione publike”, “Mashtrimi me pasoja të rënda” dhe “Falsifikim i dokumentave", kryer në bashkëpunim. 

Të pandehur nga SPAK janë marrë edhe dy shoqëritë “Net” shpk dhe “Daam” shpk, të cilat po gjykohen më vete me procedurë të zakonshme.

Ky proces penal po gjykohet nga treshja e gjyqtarëve Marinela Osmani kryesuese, me anëtarë Flora Hajredinaj dhe Flojera Davidhi, të cilët caktuan seancën e radhës në datë 12 mars në orën 15:30.

Kjo trupë gjykuese në seancën e radhës do shprehet lidhur me kërkesën e gjithë të pandehurve, teksa u kërkoi avokatëve që klientet e tyre që nuk ishin prezent sot në sallë, të deklaronin edhe njëherë përmes prokurës formën e gjykimit.

Kujtojmë se ish-drejtori i ARRSH-së, Evis Berberi u arrestua më 14 mars 2024, në akuzë për korrupsion dhe pastrim parash. Sipas SPAK, ai rezulton i përfshirë në raste korruptive me 8 tendera, që kapin vlerën e 5 milionë eurove. Berberi ishte pronar fakti i kompanisë “DAAM shpk, së cilës i ka dhënë tendera gjatë kohës që mbante pozicionet e Drejtorit të Përgjithshëm për Eficencën e Energjisë dhe ARRSH-së.

Nga hetimet e SPAK, rezultoi se Berberi, ndonëse e kishte kaluar fiktivivisht pronësinë e shoqërisë  “DAAM” sh.p.k te persona të tjerë, vijonte të ishte pronari de facto i saj, duke e përdorur për të përfituar personalisht nga tenderat publikë.Shoqëria “Net Group” në pronësi të Valter Begajt përdorej për të devijuar para drejt “DAAM”, në letër në pronësi të Begajt, por që sipas hetuesve ishte në zotërim indirekt të Berberit. Ky i fundit vijonte të kontrollonte aktivitetin, vendoste për shpenzimet, punësimet, investimet dhe drejtonte përdorimin e llogarive bankare të kompanisë.  Ai gjithashtu merrte vendimet për pagesa, pagat dhe licencat profesionale për projektim e mbikëqyrje.