Për tre netë me radhë, 10-12 qershor, Tropoja u shndërrua në kryeqytet të kulturës kombëtare shqiptare.
Merrnin pjesë duke nderuar me pjesëmarrjen deputete të parlamentit shqiptar,kryesuar nga Mimoza Hajdarmataj,deputete e Teropojës, e cila mes të tjerash,në fjalën e saj theksoi : “Sot në qytetin e Bajram Currit, për të 14-tin vit me radhë, u zhvillua " Sofra Dardane". Dy faktorë kyç kanë bashkuar kombin këto kohë, biri ynë Sali Berisha me rrugën e kombit dhe ky festival i vlerave dhe traditës më të mirë artistike i organizuar nga Unioni Artistik i Kombit Shqiptar po prap nga një bir Tropoje, Azgan Haklaj.”
Në aktivitetin që u mbajt në stadiumin e lojrave me dorë ne qytetin e Bajram Currit,në natën finale, morën pjesë këngëtarë dhe valltarë nga të gjitha trevat shqipëfolëse.
Kryetari i bashkisë së Tropojës, Besnik Dushaj,e vlerësoi aktivitetin jo vetëm për vlerat artistike dhe rigjallëimin e jetës së komunitetit atje, por edhe në funksion të turizmit.Ai tha se para kësaj pamje të hijshme e madhështore, që do ta kishte zili çdo qytet i Shqipërisë dhe Europës, para këtyre artistëve dhe këtij arti të madh e të pavdekshëm, para këtyre kostumeve, që shkëlqejnë si lëndinat me lule të bjeshkëve tona, te gjithë ndihemi të nderuar.
Një kompozitor i madh e quan muzikën si gjuhë të Perëndisë, pra me këtë gjuhë ju te nderuar artistë po komunikoni me ne, në keto tre dite, duke sjellë magjinë e çdo treve të kombit.
Me paraqitjen tuaj të mrekullueshme, me veshjet karakteristike, me artin tuaj të madh e të pavdekshëm, ju mbeteni padyshim zëdhënësit e kulturës dhe historisë së kombit.
Ndërkohë ju, si 14 vite me radhë edhe sot, si çdo fillim vere, jeni oguri i bardhë për ne. Duke qenë edhe ndër turistët e parë të këtij sezoni, ju rigjallëruat vendet tona të bukura, të krijuara nga Zoti dhe të transformuar kaq madhërishëm nga mendja dhe dora e tropojanëve, punëtorë dhe mikpritës.
Malësia e Gjakovës, ky tempull i lirisë kombëtare, ka kontribute të mëdha në të gjitha kohërat. Ky popull i Zotit, qëndroi, luftoi, sakrifikoi, dhe dha mijëra martirë, por ndërkohë
këndoi dhe vallëzoi si rrallë kush tjetër, duke mbajtur të ndezur frymën e lirisë dhe entuziazmin ndër breza.
Unë jam krenar, kur u them miqve të mi se është pikërisht Malësia e Gjakovës, djepi ku u mblodhën të gjitha perlat e Eposit të Kreshnikëve.
Por ndërkohë janë këngët e kushtrimit, që shoqëruan luftëtarët e Malësisë së Gjakovës në betejat legjendare të Plavës e Gucisë, të Shtimljes e Slivovës, të Qafës së Morinës e Kodrave të Palçit.
Apo vallet tona, si vallëzimet e ujëvarave, si lodrimet e luleve dhe të çetinave: Vallet e Valbonës, të vjeljes së gështenjave, vallja e sokolit, e vajzave të Bytyçit, të cilat pasuruan gjithë skenat e Shqipërisë, dhe para shumë vitesh këto motive përbënin thuajse gjithë programin e valleve më të bukura të Ansamblit të Këngëve e Valleve.
Të gjithë e kujtojmë me krenari se si në festivalin e Dizhonit në Francë, ky Ansambël fitoi gjerdanin e Artë me vallen e motiveve tona “Festë të madhe ka sot Shqipëria”.
Natyrisht që dua t’u përcjell edhe një dëshirë të bashkëqytetarëve të mi: kur të shkoni në krahinat e qytetet tuaja të frymëzoni dhe të nisni për në Tropojë, Valbonë, Curraj Epër, Lumi Gashit e kudo në këtë parajsë tokësore shumë vizitorë, t'u tregoni per Malësinë e Gjakovës, për këtë perlë të natyrës dhe djep të historisë shqiptare.
Duke qenë sot para jush, dhe natyrisht në respekt edhe të historisë nuk mund ta lë pa u bërë një homazh të madh dhe nderim, brezave tanë të shkrimtarëve dhe artistëve, këngëtarëve dhe valltarëve, kompozitorëve të shquar dhe orkestrantëve tropojanë.
Sot do të përmend dy, legjendën e valles tropojane, Xhevahire Gashin dhe këngëtaren e pavdekshme Fatime Sokoli, që me zërin e saj magjik pushtoi për shumë vjet majëmalet.
Uroj t’i keni shijuar sa më mirë këto ditë në Sofrën Dardane, në këtë tempull të mikpritjes e bujarisë, të këngës e gëzimit,përfundoi fjalën e tij përshëndetëse kryetari I bashkisë,Besnik Dushaj.
Në fund juria profesionale,e përbërë nga Minella Kureta,’Mjeshtër I Madh”,Ali Mula “Mjeshtër i Madh”,Deli Metaliaj,koreograf,Skënder Doshlani,kompozitor,bëri vlerësimin e interpretuesve më të mirë.
Redaksia Online
(xh.k/shqiptarja.com)