Mine Hasani nuk është më mësuese në shkollën 9-vjeçare “100-vjetori i Pavarësisë”. Vendimi për pezullimin e saj erdhi  menjëherë pas publikimit të pamjeve në emisionin “Stop” në Televizionin Klan, ku ajo shfaqej duke ushtruar dhunë fizike dhe verbale ndaj nxënësve të ciklit fillor. Pamjet shokuese të transmetuara në media tregojnë se si mësuesja godet fizikisht fëmijët 9-vjeçarë dhe përdor një fjalor me terma degradues dhe kërcënues. Shprehjet që ajo  përdor rregullisht ndaj nxënësve variojnë nga “idiotë”, “kafshë”, te “zhulsa” e “kokë palarë”.

Pas pamjeve, Drejtoria Rajonale e Arsimit Parauniversitar Tiranë njoftoi ngritjen e një grupi pune për të ndjekur situatën dhe për të takuar drejtuesit e shkollës, psikologët dhe prindërit e fëmijëve të përfshirë. Me vendim të datës 25 shkurt 2026, marrëdhëniet e punës me mësuesen  u ndërprenë menjëherë

Për rastin reagoi edhe ministrja e Arsimit dhe Sportit, Mirela Kumbaro, me një mesazh publik.

“Një mesazh për të gjithë prindërit dhe mësuesit, mbi rastin flagrant të dhunës së ushtruar nga një person që mbante xhaketën e mësuesit, si një sjellje e papranueshme dhe në kundërshtim të plotë me vlerat e arsimit. Nga sot, personi nuk është më pjesë e trupës së mësuesve, ndërsa grupi i punës i ngritur për këtë çështje po vijon dokumentimin e plotë të përgjegjësive. Asnjë ngjarje e tillë nuk mund dhe nuk duhet të cenojë punën me përkushtim, me profesionalizëm dhe me pasion të mijëra mësuesve në të gjithë Shqipërinë, të cilët çdo ditë janë modeli më i mirë për fëmijët tanë. Respekt dhe mbështetje për ta”, shkroi ajo në Facebook.

Ky skandal ka ngritur pikëpyetje të mëdha mbi sigurinë e fëmijëve në mjediset shkollore dhe integritetin e figurës së mësuesit. Ndërkohë Policia e ka shpallur në kërkim mësuesen 58-vjeçare.

Rendit zhvillimet sipas orarit:
Ora 19:41
Shpallet në kërkim mësuesja 58-vjeçare që dhunonte nxënësit në Kamëz

1772052835_aa.JPG

Mësuesja Mine Hasani nga Kamza që u filmua duke goditur dhe fyer nxënësit në shkollë

Mësuesja 58-vjeçare që u pa në video duke goditur dhe fyer nxënës në një shkollë 9-vjeçare në Kamëz është shpallur në kërkim nga policia.

Specialistët për Hetimin e Krimeve në Komisariatin Nr. 5 nisën procedurat pas pamjeve të transmetuara në një emision investigativ, ku ajo shfaqej gjatë orës së mësimit duke ushtruar dhunë fizike dhe psikologjike ndaj fëmijëve.

Sipas policisë, ndaj saj rëndojnë dyshime për dhunë gjatë procesit mësimor, ndërsa hetimet janë mbështetur si në pamjet filmike, ashtu edhe në veprime të tjera hetimore.

"Specialistët për Hetimin e Krimeve të Komisariatit të Policisë Nr. 5 shpallën në kërkim shtetasen M. H., 58 vjeçe, pasi, bazuar në pamjet filmike të transmetuara në emisionin investigativ “STOP”, si dhe me veprimet e tjera hetimore të kryera, dyshohet se gjatë zhvillimit të procesit mësimor në një shkollë 9-vjeçare, ka ushtruar dhunë fizike dhe psikologjike ndaj nxënësve. Po punohet për kapjen e 58-vjeçares dhe për dokumentimin e plotë ligjor të rastit.  Materialet procedurale iu referuan Prokurorisë, për veprime të mëtejshme" thuhet në njoftimin e policisë.

U.D/Shqiptarja.com