Rritja e kërkesës për përfshirjen e më shumë nxënësve dhe shkollave në programin “Pas Shkolle”, si dhe zgjatja e orarit deri në 17:00, ka sjellë hapjen e thirrjes së tretë për angazhimin e trajnerëve për vitin e ardhshëm shkollor.

Ministrja e Arsimit Mirela Kumbaro u ka bërë thirrje të gjithë mësuesve në sistem, atyre në listë pritje, mësuesve në pension dhe artizanëve e profesionistëve të fushave të artit të aplikojnë për të kontribuar në program.

“Është një program për të cilin janë rritur shumë kërkesat. Ne e nisëm me 408 shkolla në të gjithë Shqipërinë, por kemi kërkesa edhe për më shumë shkolla dhe sidomos për të zgjatur orarin e qëndrimit deri në 17.00 që përkon edhe me oraret e mbarimit të punës për prindërit. Që ne ta bëjmë realitet, na duhen më shumë burime njerëzore dhe kjo është arsyeja pse po e hapim për të tretën herë thirrjen për trajnerë, përkundrejt një shpërblimi prej 1000 lekë/ora. Me buxhetin e vitit 2027 kemi siguruar gjithë financimin e nevojshëm, plot 5.5 milionë euro dedikuar programit “Pas Shkolle”, tha ministrja Kumbaro.

Ministrja Kumbaro njoftoi gjithashtu edhe zgjerimin e këtij programi me module dhe klube të reja. Klubi i shkencës dhe ai i gjuhëve të huaja u shtohen  klubeve ekzistuese të programit si “Bëjmë detyrat e shtëpisë”, klubi i teatrit, kërcimit, artit pamor dhe zejeve, prandaj thirrja vlen edhe për mësuesit e lëndëve STEM dhe gjuhëve të huaja.

“Të gjithë fëmijëve të arsimit parauniversitar u japim mundësinë për të ndenjur më gjatë në shkollë, për të bërë detyrat e shtëpisë, por edhe për të bërë aktivitete të tjera, të çlirëta, edukative dhe ju japin mundësinë të krijojnë marrëdhënie me njërit-tjetrin. Është e nevojshme të zgjerojmë programin me module të reja; të shkencës dhe të gjuhëve të huaja do të jenë modulet e reja”, njoftoi ministrja.

Thirrja e shpallur në faqen zyrtare të Agjencisë Kombëtare të Arsimit Parauniversitar do të qëndrojë e hapur dy javë për të gjithë mësuesit dhe trajnuesit që plotësojnë kriteret.