Meta kujton Nelson Mandelën me mesazhe të koduara: Ne kemi pasur 'Mandelat' tanë! Liria e demokracia s'janë dhuratë, duhen mbrojtur

Në Ditën Ndërkombëtare të Nelson Mandelës, Presidenti Ilir Meta ka kujtuar me nderim jetën dhe luftën që ai bëri për liri dhe mbrojtje të të drejtave të njeriut. Meta shkruan se Shqipëria gjithashtu ka pasur "Mandelat " e veta gjatë kohës së komunizmit për të na treguar se pluralizmi, liria e demokracia duhen mbrojtur, pasi nuk vijnë si dhuratë dhe nuk qëndrojnë si të tilla. Kjo mund të shihet dhe si një mesazh i koduar i Metës, i cili duke folur "në emër të popullit" ka kërkuar shpesh mbrojtjen e demokracisë e Kushtetutës pasi vendi drejtohet nga një parlament monist.

"Sot, në Ditën Ndërkombëtare të Nelson Mandelës, kujtojmë me nderim jetën dhe veprën e luftëtarit të lirisë, i cili frymëzoi mbarë botën me angazhimin, përkushtimin dhe këmbënguljen e Tij për paqen, pajtimin dhe mbrojtjen e të drejtave themelore të njeriut. “T’u mohosh njerëzve të drejtat e tyre njerëzore do të thotë që të sfidosh vetë thelbin e të qënit njeri.", – ky ka qenë mësimi i Nelson Mandelës për të gjithë ne. Në Shqipëri ne kemi pasur ‘Mandelat’ tanë, të cilët për dekada me radhë gjatë regjimit komunist, janë përndjekur mizorisht e pa mëshirë dhe janë privuar nga liria për shkak të ideve dhe besimeve të tyre. Por ata mbijetuan për të na treguar dhe lënë amanet se liria, demokracia dhe pluralizmi nuk janë dhënë njëherë e përgjithmonë, as vijnë si dhuratë dhe as qëndrojnë si të tilla. Ato duhen ruajtur, mbrojtur dhe zhvilluar sipas standardeve më të avancuara që meriton kombi shqiptar, që aq shumë ka vuajtur nga mungesa e tyre", shkruan Meta.

Nelson Mandela ishte president i Afrikës Jugore dhe luftëtar i lirisë, i cili luftonte kundër shtypjes racore që u bëhej njerëzve me ngjyrë duke u bërë simboli i rezistencës së tyre në gjithë botën.

TAG:
• Ilir Meta
• nelson mandela
• DEMOKRACIA