Meta mbyll konsultimet me partitë për datën e zgjedhjeve! Rama: Dakord për çdo datë, përveç 2 majit! Basha: Shqiptarët duan zgjedhje sot! Hajdari: Propozova ditën e Pashkëve

Rudina Hajdari pas takimit me presidentin Ilir Meta, i ka propozuar këtij të fundit datën 2 maj, pikërisht atë datë që Rama dhe opozita kanë mohuar të zhvillojnë zgjedhjet, pasi është festa e Pashkëve.

Hajdari tha për mediat se dita e festës nuk është pengesë për të mbajtur zgjedhjet dhe kjo ka ndodhur dhe herë të tjera në të kaluarën.  Për të kjo datë do të ishte historike, pasi vinte pas 1 Majit, ditës së punëtorëve.

"Unë propozova 2 majin si datë të zgjedhje pasi vjen menjëherë pas 1 Majit, ditës së punëtorëve. 2 maji do të jetë një datë historik për shqiptarët e ndershëm dhen punëtore.  Padyshim që vendimmarrja është e Presidentin, 2 maji është festë por ka ndodhur dhe here të tjera që janë mbajtur në ditë festë dhe kjo nuk na ka ndalur të votojmë dhe festojmë", tha Hajdari.

Deputetja e opozitës së re, Rudina Hajdari ka mbërritur në presidentë ku do të takohet me presidentin Ilir Meta për të dhënë propozimin e saj për datën e zgjedhjeve.

Kryetarja e LSI-së, Monika Kryemadhi ka komentuar edhe letrën që ambasadorja e SHBA-së, Yuri Kim u ka dërguar partive politike që të tregojnë kujdes për përzgjedhjen e kandidateve të tyre, të cilët të mos kenë të shkuar kriminale. Kryemadhi tha se LSI nuk e ka këtë problem dhe se ka pasur kurrë pasi ajo është parti e rinisë dhe se këtë letër duhet ta lexojë PS-ja.

"Letra e ambasadores Yuri Kim është shumë e domosdoshme jo vetëm ne por sidomos edhe PS. Edhe në sondazhet, LSI është partia e të rinjve dhe të reja dhe nuk ka pasur ndonjëherë ndonjë kandidat problematik, por nëse do të shkojmë drejt listave të hapura, do ta përcaktojnë qytetarët kandidatët", tha Kryemadhi pas takimit me presidentin Meta që zhvilloi në lidhje me konsultat për datën e zgjedhjeve.

Më herët Kim u ka kërkuar liderëve politik politike të mbajnë përgjegjësi për kandidatët për deputetë, që të mos preken nga ligji i dekriminalizimit. Ambasadorja e SHBA iu sugjeron liderëve vetting të kandidatëve dhe të kualifikohen vetëm ata që respektojnë votuesit shqiptarë.

"Mbani përgjegjësi për kandidatët. Kandidatët për deputetë të kenë integritet moral, të mos jenë subjekt për ligjin e dekriminalizimit. Kryetarët rol kryesor në mbajtje jashtë listave të njerëzve të korruptuar. SHBA është e përkushtuar në luftën kundër korrupsionit", shkruhet mes të tjerave në letër.

Monika Kryemadhi ka zhvilluar vizitën e parë si kryetare e LSI në Presidencë dhe për këtë ajo tha se e ka detyruar kryesia e partisë si takim i rëndësishëm që ishte për përcaktimin e një date të zgjedhjeve.

"Sot është një nga vizitat e mia të rralla në Presidencë, pasi kryesia vendoi se duhet të vija unë si një ditë e rëndësishme që është", tha Kryemadhi.

Pas përfundimit të takimit me kreun e shtetit Ilir Meta, kryetarja e LSI-së, Monika Kryemadhi tha se për partinë e saj zgjedhjet duhet të ishin mbajtur që para dy vitesh. Kryemadhi theksoi se nuk është çështje datësh, por krijimi i mundësisë së zgjedhjeve për qytetarët sa më shpjet të jetë e mundur.

"Dua të theksoj se për LSI zgjedhjet duhet të ishin bërë që para dy vitesh. Nuk mendoj se është çështje date, por është çështje e dhënies së drejtës të qytetarëve të zgjedhin të lirë e të kenë zgjedhje të lira dhe të bëhen sa më shpejt pjesë e BE. LSI do të zbatojë çdo vendim dhe dekret të Presidentit dhe do të marrë pjesë në çdo proces zgjedhor që do i garantoj shqiptarëve atë qeveri që kanë aspiruar prej shumë kohës.  Sot takimi ishte vetëm për datën e zgjedhje, një datë e zgjedhjeve do të krijonte mundësinë e  lëvizjes së gjërave. Sa më shpejt zgjedhjet aq më mirë për qytetarët dhe për këdo", tha Kryemadhi

Kryetarja e LSI-së ka mbërritur në Presidencë, ku do të takohet me Presidentin Ilir Meta.

Ajo ka qenë e shoqëruar me ish deputetin e LSI-së, Endrit Brahimllarin.

Ditën e sotme presidenti Meta është takuar me krerët e partive politike dhe sëfundmi ka ardhur edhe Monika Kryemadhi.

Kreu i Partisë Demokratike, Lulzim Basha ka folur për mediat pas përfundimit të takimit me kreun e shtetit Ilir Meta. Basha theksoi se shqiptarët kanë nevojë për zgjedhjet sot dhe jo nesër, ndërsa për PD është e rëndësishme që ato të jenë të ndershme dhe të lira.

"Shumica e shqiptarëve kërkojnë zgjedhje sot dhe jo nesër, ata duan zgjidhje se janë të lodhur nga propaganda dhe mashtrimet, qytetarët kanë nevojë urgjente për punën dhe biznesi ka nevojë për mbështetje urgjente. Për ne e rëndësishme është që procesi të jetë i lirë dhe i ndershëm. E djeshmja ka shkuar, e nesërmja nuk ka ardhur akoma, të fillojmë të punojmë menjëherë për të sotmen", tha Basha.

Ashtu si takimi me kryeministrin Rama, edhe takimi me kreun e PD-së, Lulzim Basha është dhënë live nga Presidenca. Presidenti Meta u shpreh se takimi është bërë në kuadër të konsultimeve për një datë të mundshëm të mbajtjes së zgjedhjeve, ndërsa tha se më herët u konsultua edhe me maxhorancën.

"Si përfaqësues të PD dhe opozitës në tërësi ju ftova për të diskutuar për caktimin e një date për mbajtjen e zgjedhjeve. Më herët fola me dhe përfaqësues të maxhorancës", tha Meta

Presidenti Ilir Meta zhvilloi sot takime me krerët e partive politike, për t'u konsultuar për datën e zgjedhjeve të ardhshme.

Pothuajse të gjithë përfaqësuesit e partive politike kanë qëndruar pa maskë në takimin me Metën, ndërkohë që përjashtim ka bërë vetëm Rama.

Kryeministri Rama është shfaqur me maskë në Presidencë, ndërsa nuk ka pranuar që të konsumojë kafe ose çaj gjatë takimit.  Krerët e partive as nuk kanë shtrënguar duart me njëri tjetrin, por vetëm janë përshëndetur nga larg.

Burime për Report Tv konfirmojnë se kryeministri Rama ka qenë dakord për çdo datë brenda periudhës 15 prill-15 maj për mbajtjen e zgjedhjeve, përveç 2 majit pasi është edhe festa e Pashkëve.

Mazhoranca është e gatshme për çdo datë për zhvillimin e zgjedhjeve parlamentare të vitit 2021, përveç 2 majit, kur janë Pashkët Ortodokse dhe Katolike, pasi këtë vit ata bien në të njëjtën datë.

Takimi i kryeministrit Rama, i shoqëruar dhe nga kreu i Grupit Parlamentar të PS, Taulant Balla, me Kreun e Shtetit zgjati vetëm 15 minuta.

Në takim me Presidentin ishte edhe Nard Ndoka i PDK dhe Dashamir Shehi i LZHK-së, por që asnjëri nuk prononcua për mediat. Ashtu si opozita mendohet se edhe ata mund të kenë kërkuar datën e parë që lejon kushtetuta për mbajtjen e zgjedhjeve.

Ka zgjatur vetëm pak minuta takimi i kryeministrit Edi Rama me Presidentin Meta lidhur me konsultat për datën e zgjedhjeve të ardhshme.

Pritja e kryeministrit Rama në takim nga Presidenti Ilir Meta është transmetuar live nga Presidenca. Meta ka shpjeguar se e ka ftuar për të diskutuar për përcaktimin e datës së zgjedhjeve dhe konsultimin në një proces sa më gjithëpërfshirës. Ndërkohë që në fund e ka ftuar nëse dëshironte të pinte kafe apo çaj.

"Ju thërrita për të zhvilluar konsultimet për datën e zgjedhjeve brenda afatit që krijon kushtetuta me qëllim që të kemi një proces sa më gjithëpërfshirës dhe për të respektuar çdo ndjeshmëri. Në këtë drejtim do të isha i interesuar të dëgjoja dhe opinion tuaj si përfaqësues të PS dhe mazhorancës", tha Meta.

Në fund kreu i shtetin fton kryeministrin për të pirë kafe apo çaj.

Kryeministri Edi Rama ka mbërritur në Presidencë për t'u takuar më Ilir Metën për të diskutuar për datën e mundshme të mbajtjes së zgjedhjeve parlamentare. Ai është i shoqëruar nga kreu i grupit parlamentar socialist Taulant Balla.

Pas takimit në selinë presidenciale me Presidentin Meta për caktimin e datës së zgjedhjeve, ish-deputeti Arjan Madhi deklaroi për mediat se ka propozuar datën 18 prill.

Kreu i Partisë Republikane beson tek reforma zgjedhore dhe ndryshimet kushtetuese që sipas tij do të garantojnë një proces të pastër në zgjedhjet e 2021.

Gjithashtu ai ka shprehur gatishmërinë për t'iu bashkuar çfarëdolloj tryeze politike për diskutimet lidhur me reformën elektorale.

Madhi: Shkëmbyem pikëpamjet tona me Presidentin. Nga ana e Partisë Republkane i ofrova propozimin e partisë për zgjedhjet më datë 18 prill si datën më të afërt. Duke vlerësuar mungesën e gjatë të legjitimitetit të parlamentit  në Shqipëri. Presidentit i shpreh vlerësimet dhe bindjen tonë që reforma zgjedhore e cila u bazua në marrëveshjen e 5 qershorit e miratuar nga ndërkombëtaret për të adresuar çdo çështje të reformës zgjedhore unë besoj që kjo ja arriti qëllimin. Do mund të garantohen të plota zgjedhjet e ndershme. Ne i garantuam që do të jemi në pjesëmarrës në çdo tryezë tjetër politike e cila do të adresojë në aspektin teknik vetëm përshtatjen e kodit zgjedhor me ndryshimet kushtetuese që sollën vetëm një të re. Listat zgjedhore të hapura. Çdo përpjekje që do të fuste një agjendë tjetër për diskutim në Parlamentin shqiptar unë do thoja që do kërkonte dakordësinë politike në bazë të skemës së Këshillit Politik.

Arben Tafaj, i cili përfaqëson Patinë Agrare Ambientaliste ka kërkuar gjithashtu datën 18 prill për mbajtjen e zgjedhjeve të ardhshme parlamentare.

"Sigurisht në gjykimin tonë si PAA duam që 18 prilli të jetë data e zgjedhjeve si datë më e përshtatshme për organizimin e tyre", tha Tafaj

Kreu i PBDNJ, Vangjel Dule pas takimit që ka zhvilluar me presidentin Meta ka kërkuar gjithashtu datën më të shpejtë të mbajtjes së zgjedhjeve që lejon Kushtetuta. Sipas Kushtetutës periudhë e mbajtjes së zgjedhjeve është 15 prill-15 maj dhe në këtë rast data më e shpejtë i bie 18 prilli.

"Për të diskutuar në lidhje për datën e zgjedhjeve me qellim që të nisi sistematikisht përgatitje e zgjedhjeve të ardhshme dhe që vendi ynë të arrijë atë që vendet demokratike e kanë me kohë. në këndvështrimin tim  zgjedhjet duhet të mbahen në  periudhën më të shpejtë dhe në kohën më të shkurtër të mundshme. Jemi në pritje të vendimit të presidentit", tha Dule.

Presidenti Meta ka pritur në takim krerët e partive politike, për të caktuar datën e zgjedhjeve elektorale.

Pas takimit, kreu i PDIU-së, Shpëtim Idrizi në një prononcim për mediat tha se zgjedhjet duhet të mbahen sa më shpejt, pasi vendi është në krizë totale.

Idrizi e ka shfrytëzuar takimin me presidentin Meta se i ka shprehur shqetësimin për çështjen e kufirit në detin Jon me Greqinë. Ai ka deklaruar se deklaratat e ministrave grekë për Shqipërinë janë të papranueshme dhe nëse do të insistojë, do të kërkojmë Çamërinë dhe heqjen e ligjit të luftës

Siç kishte paralajmëruar më herët "Report Tv", opozita e bashkuar ka kërkuar datën 18 prill të vitit 2021 për zgjedhjet e ardhshme.

“I shpreha shqetësimin Presidentit për faktin që duhet të ketë vëmendjen qeveria shqiptare për zonat ekskluzive ekonomike, sepse në këtë marrëveshje dy ishujt kanë marrë të drejtë të zgjerohen me 12 milje, që cenon në mënyrë të drejtpërdrejtë zonën ekonomike që ne duhet të ndajmë me Greqinë dhe Italinë. Më vjen mirë që ditët e fundit kryeministri ka bërë një tërheqje dhe pasi u kërkoi njerëzve të lexojnë, e ka lexuar edhe vetë pikën 15 të Konventës. Më duhet të theksoj fort dhe të bëj të qartë për publikun se qeveritë shqiptare janë në sindromën e Shën Naumit dhe qeveria shqiptare nuk duhet të diskutojë më për kufijtë detarë e tokësorë me Greqinë.

Shqipëria ka lëshuar gati 30% të territorit të saj, e kam fjalën për Çamërinë. Ne nuk kemi çfarë bisedojmë me Greqinë për ujërat territorial, por vetëm për zonat ekonomike. Nëse Greqia do të hapë çështje të tilla, pa dyshim që ne do të kërkojmë Çamërinë. I bëra të qartë Presidentit që bisedimet mes dy vendeve duhet të fillojnë nga heqja e ligjit të luftës, të vazhdojnë me zgjidhjen e çështjes çame. PDIU i shprehu shqetësimet Presidentit që qeveria ka fshehur agjendën shqiptare në diskutimet mes Shqipërisë dhe Greqisë dhe ka avancuar me agjendën greke”, tha Idrizi.