Meta: Përjashtoj çdo mundësi 
për koalicion me Berishën

BERAT - Nga qyteti i Beratit kryetari i Lëvizjes Socialiste për Integrim përjashton në mënyrë kategoike bashkëpunimin me kryeministrin Berisha pas zgjedhjeve.  

“E dëgjova mbrëme se tha do të bëjmë koalicion me LSI pas 23 qershorit. Unë si djalë i juaj në radhë të parë dua të jap një përgjigje nga Berati se LSI dhe Ilir Meta përjashtojnë cdo mundësi koalicioni me një qeveri dhe Kryeministër që guxoi të vërë dorë mbi KQZ, të një njeriu që pati të gjitha mundësitë të largohet me dinjitet. Ne jemi të përcaktuar në Aleancën për Shqipërinë Europiane, ne jemi ajo forcë që do mbyllë përgjithmonë politikën e përcarjes që instaloi Sali Berisha. U bëj thirrje të gjithë demokratëve në Berat, se ka ardhur koha që gjithë Berati të dënojë një qeevri që harroi zërin e Beratit” tha Meta përpara simpatizantëve të cilët ishin mbledhur sot në mitingun përmbyllës të LSI-së në qytetin e Beratit. 

Meta tha se beratasit do ta largojnë kryeministrin të dielën pasi po të presë premtimin e Berishës për Boshtin e jugut do t’i duhet të presë dhe nja 2 400 vjet të tjera, dhe se ky qytet kërkon zhvillim.

“Berisha do të ikë të dielën si kryeministër njëherë e përgjithmonë sepse po të presë Berati premtimin e Berishës për Boshtin e jugut do t’i duhet të presë dhe nja 2 400 vjet të tjera sepse ai për 8 vjet as rrugën e vjetër Lushnje-Berat nuk e rikonstruktoi. As gropën e rrugës që lidh Lushnjën me Beratin vecse filloi të hedhë asfalt 3 javë më parë këtu në qytetin Beratit. Ne do fitojmë, se Boshti i Jugut duhet bërë tani dhe jo të shtyhet." ​- tha Meta duke premtuar se do të bëjë unazën e Beratit brenda 2 viteve të para
 
LSI premtoi dhe subvencionim për fermerët dhe një plan të vërtetë për ringritjen e industrisë.

 Në miting u theksua se "LSI është forca e integrimit të vendit, se LSi mbështet punësimin dhe mbështetjen për biznesin".

Meta ka theksuar se "edhe 72 orë për të marrë fitoren e merituar që do bëjnë Beratin të ecë më shpejt dhe gjithë Shqipërinë pa u ndalur. Berati meriton një të ardhme më të mirë dhe e meriton sot. Berati kërkon punë dhe plani ynë për punësimin do ta vërë Beratin dhe gjithë Shqipërinë në punë".

(mag/sg/shqiptarja.com)

TAG:
• kqz