Në muaj shkurt 2013 METE duke iu pergjigjur akuzave të opozites socialiste për mungese transparence ne blerjen nga Saimir Mane nepermjet kompanja Balfin te aksioneve te Albanin chrome, publikoi në media nje permbledhje te gjithe operacionit:

"Ministria e Ekonomisë, Tregtisë dhe Energjetikës ka nënshkruar me shoqërinë“DARFO” s.p.a. marrëveshjen e koncensionit të formës “ROT” për minierën e kromit Bulqizë, fabrikën e pasurimit Bulqizë, të impiantit të seleksionimit Klos dhe të uzinës së ferrokromit Burrel, e cila është miratuar me ligjin nr.8791, datë 10.5.2001.

“Darfo”s.p.a. ka themeluar “DARFO ALBANIA” sh.p.k. ne 14.04.2000, regjistruar si person juridik me vendimin e Gjykatës së Rrethit Gjyqësor Tiranë nr. 23729, datë 05.05.2000, me nipt K11613001M.

Në korrik 2009 “DARFO” s.p.a. i shet 100 % të kuotave të kapitalit themeltar të shoqërisë konçesionare “DARFO ALBANIA” sh.p.k., shoqërisë “ACR Holding” S.r.l. dhe pas kësaj emri i shoqërisë ndryshohet në “Albanian Chrome” sh.p.k. me të njëjtin NIPT – K11613001M dhe me ortak të vetëm “ACR Holding” S.r.l.

Dje, datë 06.02.2013, në METE është protokolluar një njoftim i “Albanian Chrome” sh.p.k. me anë të të cilit vihemi në dijeni të faktit që ortakët e “ACR Holding” S.r.l. i kanë shitur shoqërisë “BAlfin” sh.p.k. 100% të kuotave të “ACR Holding” S.r.l.

Nisur nga ky njoftim kuptohet qëvetëm kuotat e shoqërisë “ACR Holding” s.r.l. i janë shitur “Balfin” sh.p.k, gjë e cila nuk ka sjellë ndryshim të shoqërisë konçesionare “Albanian Chrome” sh.p.k. me NIPT – K11613001M, dhe mbetet po Shoqëria Konçesionare e mësipërme që vazhdon të kryejë aktivitetin e përcaktuar në Marrëveshjen Konçesionare.

Në këtë lloj transaksioni nuk shiten kuotat e shoqërisë konçesionare, por shitet shoqëria italiane mëmë që ka krijuar shoqërinë konçesionare, dhe Ministria e Ekonomisë, Tregëtisë dhe Energjetikës është përpara po të njëjtës shoqëri konçesionare “Albanian Chrome” sh.p.k. biles me të njëjtin NIPT – K11613001M.

Sa më sipër,  sipas ligjit Nr. 9663 datë 18.12.2006 “Për Konçesionet”, Neni 27/ç dhe Marrëveshjes së Konçesionit, shoqëria “BAlfin” sh.p.k. e cila ka blerë 100% të kuotave të “ACR Holding” S.r.l. me aktivitet kryesor në Itali, nuk ka detyrim për të marrë miratimin paraprak të OSHA-së(Organi Shtetëror i Autorizuar)ose METE, për transferimin e aksioneve të një shoqërie që vepron në Itali.

Lidhur me informacionin e detajuar të kërkuar për proçedurën që ka filluar ndërmjet shoqërive “Albanian Chrom” sh.p.k dhe “Balfin” Sh.p.k për kalimin tek shoqëria “Balfin”sh.p.k. e të drejtave të aktivitetit të zotëruar aktualisht nga “Albanian Chrome” shpk, mbështetur në Marrëveshjen e Konçesionit të “Uzinës Ferro-Kromit Bulqizë, minierës së kromit Bulqizë, fabrikës së pasurimit Bulqizë dhe impiantit të seleksionimit Klos”, sqarojmë sa më poshtë:

1-     Transaksioni, për të cilin jemi njoftuar  nga “Albanian Chrome” sh.p.k.,  për kalimin tek shoqëria  “Balfin” sh.p.k e të drejtave të aktivitetit të zotëruar aktualisht nga “Albanian Chrome” sh.p.k mbështetur në Kontratën e Konçesionit të “Uzinës Ferro-Kromit Bulqizë, Minierës së Kromit Bulqizë, Fabrikës së Pasurimit Bulqizë dhe Impiantit të Seleksionimit Klos”, do të duhet të transferojë tek shoqëria “Balfin” sh.p.k të gjitha detyrimet dhe të drejtat e Konçesionarit, të parashikuara në Marrëveshjen e Konçesionit (për realizimin e planit të investimeve dhe tërehabilitimit të objekteve të konçesionit; për shlyerjen e detyrimeve ndaj OSHA dhe të tretëve).

Marrëveshja e Konçesionit, nuk përmban ndonjë dispozitë që të përcaktojë proçedura dhe detyrime të Konçesionarit për të përfshirë OSHA-në, (apo METE) në transaksionet e një kalimi të mundshëm të të drejtave dhe detyrimeve të Marrëveshjes Konçesionare.

2-     Shoqëria “Balfin” sh.p.k. në zbatim të legjislacionit në fuqi dhe Marrëveshjes së Konçesionit do të duhet të plotësojë kushtet e investitorit të sektorit duke vazhduar operimin e aktiviteteve të Konçesionit në fjalë me kapacitetet e saj financiare dhe asetet e Shoqërisë Konçesionare “Albanian Chrome” sh.p.k.,të rregjistruar në QKR.

3-     Transferimi i Lejes Konçesionare në fjalë është një iniciativë dhe marrëveshje e iniciuar nga palët, për të cilat METE nuk është palë.

4-     Realizimi i investimeve nga Shoqëria Konçesionare “Albanian Chrome” sh.p.k.  për periudhën Janar 2009 – Dhjetor 2012 është 7 944 659 USD.

5-     Shoqëria Konçesionare “Albanian Chrome” sh.p.k. ka një detyrim penaliteti kundrejt OSHA-së(METE-s) prej 1 693 163 EURO, për të cilin është rënë dakord midis palëve që të likuidohet nga vlera e TVSH-së së pa rimbursuar në adresë të Konçesionarit nga ana e Drejtorisë së Tatim-Paguesve të Mëdhenj. Mungesa e rimbursimit të TVSH ka mbajtur të bllokuar likuidimin e detyrimeve të ndërsjellta ACR – METE dhe Ministria  Financës – ACR. Jemi në pritje të zgjidhjes së këtij problemi.

6-     Nuk ka patur investime për hapjen e pusit 9 të Minierës së Kromit Bulqizë. Mbetet detyrim për t’u realizuar nga investitori.

7-     Rezervat e mineralit të kromit në Minierën e Bulqizës kanë qënë 3 027 273 Ton, nga të cilat janë prodhuar (nxjerrë) 1 255 00 Ton, gjatë periudhës së shfrytëzimit nga Konçesionari.

Aktualisht vlerësohen 1 772 273 ton rezervat e mineralit të kromit të mbetura.

8-     Sasia e rezervave të mineralit të kromit të mbetura pa u shfrytezuar mbi nivelin 14 të thellësisë së Minierës së Kromit Bulqizë është relativisht e vogël pasi prodhimi i 10 viteve të fundit është siguruar në pjesën më të madhe nga shfrytëzimi i atyre rezervave.

9-     Sasia e mineralit të kromit e prodhuar nga ACR për periudhën Janar 2009 – Dhjetor 2012 është 762 440 ton.