Tiranë - Eshte perkujtuar sot 84 vjetori i ndarjes nga jeta të atdhetarit të shquar Mihal Grameno (1871- 1931).
Një ndër figurat e atdhetarizmit shqiptar, publicist, shkrimtar dhe veprimtar i lëvizjes patriotike e demokratike, Mihal Grameno lindi në janar të vitit 1871 në Korçë.
Mësimet e para ai i mori në qytetin e lindjes. Në moshë të re emigroi në Bukuresht të Rumanisë, ku u lidh me shoqërinë patriotike shqiptare "Drita".
Në vitet 1907-1908 iu bashkua çetës së Çerçiz Topullit dhe së bashku me luftëtarët e çetës kombëtare luftuan në Shqipërinë e Jugut për çlirimin kombëtar.
Mihal Grameno
Në vitin 1909 mori pjesë në Kongresin e Manastirit. Gjatë viteve 1915-1919 jetoi në Amerikë, ku punoi për lëvizjen e atdhetarëve shqiptarë të atjeshëm.
Më pas vazhdoi veprimtarinë si publicist duke mbrojtur idealet demokratike.
Mihal Grameno është një ndër novelistët e parë të letërsisë sonë. Kështu, përmenden novelat e tij "Oxhaku" (1909), "E puthura" dhe "Varri i Pagëzimit" etj.
Ai shkroi dy veprat: komedinë "Mallkimi i gjuhës shqipe" (1905) dhe dramën historike "Vdekja e Pirros" (1906), të cilat trajtojnë tema patriotike.
Gjithashtu, Mihal Grameno drejtoi gazetat "Lidhja orthodhokse" (1909-1910) dhe "Koha" (1911-1926). Ai vdiq në Korçë në vitin 1931.
/ATSH/