Milan me rikthime, Pioli: Ndeshja me Monzën tregon ecurinë tonë

Monza dhe Milan luajnë nesër në 18:00 për javën e 23-të të Serie A. Kuqezinjtë e Stefano Piolit kërkojnë të vijojnë rezultatet e mira, teksa fitorja në Champions League me Tottenham ka zgjuar entuziasmin në ekip. Për mediat trajneri Pioli ka treguar rikthimet dhe mungesat, duke vënë theksin te dueli me Monzën.

 “Dua të përgëzoj Palladinon, skuadra e tij po luan mirë. Duhet të jemi të kujdesshëm. Rezultati në ndeshjen e parë ishte i mirë, por nuk ishte një sfidë e lehtë për ne. Është një mundësi që duhet shfrytëzuar sepse kemi lënë shumë pikë. Ne vijmë nga dy ndeshje të mira dhe duhet të mendojmë për të luajtur mirë nesër. Duhet të bëjmë më një paraqitje të mirë. Rezultati i kësaj përballje do të tregojë se si po ecën ekipi", tha fillimisht Pioli.

Më pas trajneri u ndal edhe te forma e lojtarëve dhe gjendja e tyre në prag të duelit. Tomori është në gjendje për të luajtur, teksa mbeten jashtë Benaccer dhe Calabria.

 “Tomori do të jetë i disponueshëm. Benaccer dhe Calabria nuk do të jenë me ne. Vranckx është gati për të na dhënë një dorë. Thiaw është një lojtar modern dhe ka karakteristika për t’u bërë një mbrojtës shumë i fortë. Çdo javë që kalon, gjendja e Ibrahimovic po përmirësohet. Ai ka punuar mirë gjatë javës dhe do të jetë me ne. Do të shoh se kë mund të zgjedh mes Giroud dhe Origi. De Ketelaere do të ketë shumë më tepër shanse për të treguar se sa vlen”, u shpreh Pioli.

S.DH/Shqiptarja.com

TAG:
• Milan
• Monza
• serie a
• stefano Pioli